Lalai 77:1-20
Kɛhã lalatsɔɔlɔ lɛ; yɛ Yedutun* nɔ. Asaf nɔ.+ Lala ni afo.
77 Mawó migbee nɔ matsɛ Nyɔŋmɔ;Mabo matsɛ Nyɔŋmɔ, ni ebaabo mi toi.+
2 Matao Yehowa sɛɛ gbɛ yɛ mihaomɔ gbi lɛ nɔ.+
Mikpãa miniji amli nyɔɔŋ fɛɛ mitsɔɔ lɛ ni etɔɔɔ mi.*
Mikpɛlɛɛɛ* miishɛjemɔ.
3 Kɛ́ mikai Nyɔŋmɔ lɛ, mikɛ̃mɔɔ;+Mihaoɔ, ni mihewalɛ fɛɛ tãa.*+ (Sela)
4 Ohiɛɔ mihiŋmɛii amli, ni miwɔɔɔ;Mihaoɔ, ni minyɛɛɛ mawie.
5 Mijwɛŋɔ blema gbii lɛ ahe,+Afii ni eho jeeŋmɔ lɛ.
6 Kɛ́ eshɛ nyɔɔŋ lɛ, mikaiɔ milala* lɛ;+Mijwɛŋɔ nii anɔ yɛ mitsui mli;+Mitaoɔ* nii amli jogbaŋŋ.
7 Ani Yehowa baashɛ wɔ efɔ̃ kɛaatee naanɔ?+
Ani enaŋ wɔ mɔbɔ dɔŋŋ?+
8 Ani esuɔmɔ ni tsakeee lɛ sɛɛ efo kɛmiiya naanɔ?
Ani eshiwoo lɛ hu sɛɛ baafo yɛ yinɔi fɛɛ amli?
9 Ani Nyɔŋmɔ hiɛ ekpa edromɔ lɛ nɔ,+Ani emlifu lɛ ehã emɔbɔnalɛ lɛ sɛɛ efo? (Sela)
10 Ani miya nɔ miwie akɛ: “Nɔ ni haoɔ mi lɛ nɛ:*+
Mɔ Ni Nɔ Kwɔ Fe Fɛɛ lɛ etsake bɔ ni ekɛ wɔ yeɔ ehãa”* lɛ?
11 Makai Yah nitsumɔi lɛ;Makai naakpɛɛ nii ni ofee blema tɔ̃ɔ lɛ.
12 Majwɛŋ onitsumɔi lɛ fɛɛ anɔNi masusu onifeemɔi lɛ ahe.+
13 Ao Nyɔŋmɔ, ogbɛi lɛ yɛ krɔŋkrɔŋ.
Ao Nyɔŋmɔ, mɛɛ nyɔŋmɔ je agbo tamɔ bo?+
14 Bo ji anɔkwa Nyɔŋmɔ lɛ, mɔ ni feɔ naakpɛɛ nii lɛ.+
Ojie ohewalɛ lɛ kpo otsɔɔ majimaji lɛ.+
15 Okɛ ohewalɛ* lɛ ekpɔ̃ omaŋbii lɛ,+Yakob bii* lɛ kɛ Yosef bii* lɛ. (Sela)
16 Ao Nyɔŋmɔ, nui lɛ na bo;Nui lɛ na bo ni amɛhao.+
Ni nui ni mli kwɔlɔ lɛ fee hamahama.
17 Atatui lɛ fɔse nu shwie shi.
Nugbɔ shimɔ yɛ atatui lɛ amli,Ni ogãimlibii lɛ ho kɛtee kɛba yɛ kɔɔyɔɔ lɛ mli.+
18 Onugbɔshiimɔ lɛ gbɛɔ+ tamɔ shwiilii ataii;*Sarawai gbalaa ni ekpɛɔ la ehãa mɛi ni yɔɔ shikpɔŋ lɛ nɔ lɛ;+Shikpɔŋ lɛ kpokpo ni ehoso.+
19 Ogbɛ lɛ kã ŋshɔ lɛ mli,+Onanegbɛ lɛ kã nui babaoo amli;Shi anaaa onajiamaamɔhei lɛ.
20 Otsɔ Mose kɛ Aaron nɔ*+Onyiɛ omaŋbii lɛ ahiɛ tamɔ tooku.+
Shishigbɛ Niŋmaa
^ Kwɛmɔ Wiemɔi Titrii Amligbalamɔ lɛ.
^ Hebri sht. ŋm., “ni miniji eshɔ̃ɔɔ.”
^ Loo “Misusuma ekpɛlɛɛɛ.”
^ Hebri sht. ŋm., “mimumɔ tɔɔ biti.”
^ Hebri sht. ŋm., “Mimumɔ taoɔ.”
^ Loo “misaŋkutswaa.”
^ Hebri sht. ŋm., “etsake eninejurɔ yɛ wɔnɔ.”
^ Loo “Nɔ ni tsurɔɔ mi lɛ nɛ.”
^ Hebri sht. ŋm., “onine.”
^ Hebri sht. ŋm., “bihii.”
^ Hebri sht. ŋm., “bihii.”
^ Loo “akoklolontoi.”
^ Hebri sht. ŋm., “nine nɔ.”
