Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ (NIKASEMƆ NƆ) JUNE 2013

Sanebimɔi ni Jɛ Kanelɔi Adɛŋ

Sanebimɔi ni Jɛ Kanelɔi Adɛŋ

Namɛi ji “Nyɔŋmɔ bihii” ni atsĩ amɛtã yɛ 1 Mose 6:2, 4 lɛ akɛ amɛhi shi dani Nu Afua lɛ ba lɛ?

Ŋwanejee ko bɛ he akɛ amɛji Nyɔŋmɔ mumɔŋ bii. Shi mɛni tsɔɔ nakai?

Kukuji enyɔ nɛɛ ateŋ klɛŋklɛŋ nɔ lɛ kɛɔ akɛ: “Nyɔŋmɔ bihii lɛ yana akɛ gbɔmɛi abiyei lɛ ahe yɛ fɛo, ni amɛwɛwɛɛ amɛteaŋ yei fɛɛ ni amɛsumɔɔ.”1 Mose 6:2.

Wiemɔ ni ji “Nyɔŋmɔ bihii” kɛ “Nyɔŋmɔ bii” lɛ je kpo yɛ Hebri Ŋmalɛi amli yɛ 1 Mose 6:2, 4; Hiob 1:6; 2:1; 38:7; kɛ Lala 89:7 lɛ. Mɛni ŋmalɛi nɛɛ haa wɔleɔ yɛ “Nyɔŋmɔ bihii” lɛ ahe?

Eka shi faŋŋ akɛ, “Nyɔŋmɔ bii” ni atsĩ amɛtã yɛ Hiob 1:6 lɛ ji mumɔŋ bɔɔ nii ni naa ekpe shi yɛ Nyɔŋmɔ hiɛ. No mli lɛ, Satan ní tee ‘shikpaa yɛ shikpɔŋ lɛ nɔ’ lɛ hu fata amɛhe. (Hiob 1:7; 2:1, 2) Nakai nɔŋŋ atsĩ “Nyɔŋmɔ bii lɛ” atã yɛ Hiob 38:4-7 lɛ akɛ, ‘amɛbɔ oshe’ beni Nyɔŋmɔ ‘to shikpɔŋ lɛ koŋtɛ lɛ.’ Eyɛ faŋŋ akɛ amɛji ŋwɛi bɔfoi, ejaakɛ no mli lɛ abɔko adesai. Ŋwanejee ko bɛ he akɛ “Nyɔŋmɔ bii,” ni Ga Biblia lɛ wie amɛhe yɛ Lala 89:7 lɛ akɛ, “nyɔŋmɔi abii lɛ” hu ji mumɔŋ bɔɔ nii ni kɛ Nyɔŋmɔ yɔɔ ŋwɛi lɛ, shi jeee gbɔmɛi.

Belɛ, namɛi ji “Nyɔŋmɔ bihii” ni atsĩ amɛtã yɛ 1 Mose 6:2, 4 lɛ akɛ amɛhi shi dani Nu Afua lɛ ba lɛ mɔ? Yɛ Biblia mli anɔkwalei ni wɔsusu he kɛtsɔ hiɛ lɛ kɛ gbeekpamɔ naa lɛ, nilee yɛ mli akɛ wɔɔmu sane naa akɛ, sane nɛɛ kɔɔ Nyɔŋmɔ mumɔŋ bii ni ba shikpɔŋ lɛ nɔ lɛ ahe.

Ewa kɛha mɛi komɛi akɛ amɛaakpɛlɛ nɔ akɛ ŋwɛi bɔfoi baasumɔ ni amɛná bɔlɛ. Yesu wiemɔi ni yɔɔ Mateo 22:30 lɛ tsɔɔ akɛ aboteee gbalashihilɛ mli yɛ ŋwɛi, ni anáaa bɔlɛ hu yɛ jɛmɛ. Kɛlɛ, ŋwɛi bɔfoi etsake amɛhe amɛtsɔmɔ gbɔmɛi yɛ shihilɛi komɛi amli pɛŋ, ni amɛkɛ gbɔmɛi ye nii ni amɛnu nii. (1 Mose 18:1-8; 19:1-3) No hewɔ lɛ, nilee yɛ mli akɛ wɔɔmu sane naa akɛ, amɛbaanyɛ amɛkɛ yei aná bɔlɛ kɛ́ amɛtsake amɛhe amɛtsɔmɔ gbɔmɛi.

Biblia mli amaniɛbɔi yɛ ni haa wɔheɔ wɔyeɔ akɛ ŋwɛi bɔfoi komɛi fee nakai. Yuda 6, 7 lɛ kɛ esha ni Sodoma hii, mɛi ni yanyiɛ heloo kroko sɛɛ lɛ fee lɛ to “ŋwɛi bɔfoi hu ni ehiɛɛɛ amɛ diɛŋtsɛ amɛnukpayeli lɛ mli, shi moŋ amɛshi amɛ diɛŋtsɛ amɛshihilɛhe” lɛ he. Nɔ ko ni je amɛhe yɛ sane nɛɛ mli ji akɛ, nakai bɔfoi lɛ kɛ Sodoma hii lɛ fɛɛ “bɔ ajwamaŋ aahu . . . ni amɛyanyiɛ heloo kroko sɛɛ.” Amaniɛbɔɔ ni tamɔ nakai nɔŋŋ ni yɔɔ 1 Petro 3:19, 20 lɛ kɛ bɔfoi toigbolɔi lɛ to bɔfoi ni hi shi yɛ “Noa gbii lɛ amli” lɛ ahe. (2 Pet. 2:4, 5.) No hewɔ lɛ, abaanyɛ akɛ gbɛ ni bɔfoi toigbolɔi ni hi shi yɛ Noa gbii lɛ amli lɛ kɔ lɛ ato esha ni Sodoma kɛ Gomora fee lɛ he.

Kɛ́ wɔnu shishi akɛ “Nyɔŋmɔ bihii” ni atsĩ amɛtã yɛ 1 Mose 6:2, 4 lɛ ji bɔfoi ni tsake amɛhe amɛtsɔmɔ gbɔmɛi ni kɛ yei baná bɔlɛ lɛ, wɔbaana akɛ nilee yɛ mli akɛ aaamu sane naa nakai.

 Biblia lɛ kɛɔ akɛ Yesu ‘yashiɛ etsɔɔ mumɔi ni awo amɛ tsuŋ lɛ.’ (1 Pet. 3:19) Mɛni enɛ tsɔɔ?

Bɔfo Petro wie mumɔi nɛɛ ahe akɛ mɛi ni “blema lɛ amɛbooo toi, beni Nyɔŋmɔ ŋmɛ etsui shi ni emɛ amɛ aahu yɛ Noa gbii lɛ amli” lɛ. (1 Pet. 3:20) Eyɛ faŋŋ akɛ no mli lɛ, Petro miiwie mumɔŋ bɔɔ nii ni yafata Satan he kɛtse atua lɛ ahe. Yuda wie ŋwɛi bɔfoi ni “ehiɛɛɛ amɛ diɛŋtsɛ amɛnukpayeli lɛ mli, shi moŋ amɛshi amɛ diɛŋtsɛ amɛshihilɛhe lɛ” ahe, ni etsɔɔ mli akɛ Nyɔŋmɔ kɛ “naanɔ kpãai efimɔ amɛ eto duŋ kpii mli eha gbi wulu lɛ nɔ kojomɔ lɛ.”Yuda 6.

Mɛɛ gbɛ nɔ mumɔŋ bɔɔ nii nɛɛ booo toi yɛ Noa gbii lɛ amli? Dani Nu Afua lɛ baaba lɛ, mumɔŋ bɔɔ nii nɛɛ tsɔmɔ amɛhe gbɔmɛi—nɔ ko ni Nyɔŋmɔ hako amɛ hegbɛ akɛ amɛfee. (1 Mose 6:2, 4) Kɛfata he lɛ, nɔ ni nakai bɔfoi lɛ ni kɛ yei baná bɔlɛ lɛ fee lɛ ji nihiinii. Nyɔŋmɔ ebɔɔɔ ŋwɛi bɔfoi ni amɛkɛ yei aná bɔlɛ. (1 Mose 5:2) Abaakpata nɛkɛ ŋwɛi bɔfoi fɔji ni gbo Nyɔŋmɔ nɔ toi lɛ ahiɛ yɛ Nyɔŋmɔ be ni eto lɛ mli. Shi taakɛ Yuda tsɔɔ lɛ, amrɔ nɛɛ amɛyɛ “duŋ kpii mli”—kɛ́ wɔɔkɛɛ lɛ, awo amɛ tsuŋ yɛ mumɔŋ.

Mɛɛ be Yesu yashiɛ etsɔɔ “mumɔi ni awo amɛ tsuŋ” nɛɛ, ni mɛɛ gbɛ nɔ etsɔ efee enɛ? Petro ŋma akɛ enɛ ba mli beni “aha [Yesu] wala yɛ mumɔ gbɛfaŋ” lɛ sɛɛ. (1 Pet. 3:18, 19) Kadimɔ hu akɛ, Petro kɛɛ Yesu ‘yashiɛ.’ Wiemɔ ni ji ‘yashiɛ’ ni Petro kɛtsu nii yɛ sane nɛɛ mli lɛ tsɔɔ akɛ, sane nɛɛ ba dani Petro ŋma eklɛŋklɛŋ wolo lɛ. Belɛ, enɛ tsɔɔ akɛ Yesu tee eyajaje toigbalamɔ ni sa ni akɛbaaba mumɔi fɔji nɛɛ anɔ lɛ etsɔɔ amɛ yɛ eshitee lɛ sɛɛ. Yesu eyahaaa amɛ hiɛnɔkamɔ ko. Eyajaje fɔbuu kojomɔi eshwie amɛnɔ. (Yona 1:1, 2) Akɛni Yesu jie hemɔkɛyeli kpo ni eye anɔkwa kɛtee gbele mli, ni atee lɛ shi—ni ekɛtsɔɔ akɛ Abonsam bɛ enɔ hewalɛ ko—hewɔ lɛ, eyɛ hegbɛ akɛ eyajajeɔ fɔbuu nɛɛ eshwieɔ amɛnɔ.Yoh. 14:30; 16:8-11.

Wɔsɛɛ lɛ, Yesu baafimɔ Satan kɛ bɔfoi nɛɛ ni ebaashɛrɛ amɛ eshwie bu kwɔŋkwɔŋ lɛ mli. (Luka 8:30, 31; Kpoj. 20:1-3) Kɛyashi nakai be lɛ baashɛ lɛ, akɛ mumɔi ni booo toi nɛɛ ewo duŋ kpii mli, ni amɛnaagbee hiɛkpatamɔ lɛ miimɛ amɛ.Kpoj. 20:7-10.