Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ (NIKASEMƆ NƆ) JUNE 2013

Ohiɛ Asɔ Bɔ ni Yehowa Yeɔ Anɔkwa kɛ Bɔ ni Ekɛ Eshai Faa Lɛ

Ohiɛ Asɔ Bɔ ni Yehowa Yeɔ Anɔkwa kɛ Bɔ ni Ekɛ Eshai Faa Lɛ

“Bo, Nuŋtsɔ [Yehowa], ohi ni oŋɔfaa mra, ni omɔbɔnalɛ fa ha mɛi fɛɛ ni bolɔɔ tsɛɔo lɛ.”LALA 86:5.

1, 2. (a) Mɛni hewɔ wɔhiɛ sɔɔ nanemɛi ni yeɔ anɔkwa ni kɛ eshai faa lɛ? (b) Mɛɛ sanebimɔi abaaha hetoo yɛ nikasemɔ nɛɛ mli?

NAMƆ ji naanyo kpakpa? Nyɛmi yoo ko ni atsɛɔ lɛ Ashley lɛ wie akɛ: “Mi lɛ, mɔ ni mibuɔ lɛ akɛ naanyo kpakpa ji mɔ ni be fɛɛ be lɛ efee klalo akɛ ebaaye ebua bo, ni kɛ́ otɔ̃ lɛ, ekɛbaafa bo.” Wɔ fɛɛ wɔsumɔɔ nanemɛi ni yeɔ anɔkwa ni kɛ eshai faa. Amɛhaa wɔnuɔ he akɛ wɔyɛ shweshweeshwe, ni asumɔɔ wɔ.Abɛi 17:17.

2 Yehowa ji Naanyo ni fe fɛɛ ni yeɔ anɔkwa ni kɛ eshai faa ni wɔbaanyɛ wɔná. Lalatsɛ lɛ wie ehe akɛ: “Bo, Nuŋtsɔ [Yehowa], ohi ni oŋɔfaa mra, ni omɔbɔnalɛ fa ha mɛi fɛɛ ni bolɔɔ tsɛɔo lɛ.” (Lala 86:5) Kɛ́ akɛɛ mɔ ko yeɔ anɔkwa ni ekɛ eshai faa lɛ, te atsɔɔ tɛŋŋ? Mɛɛ gbɛ nɔ Yehowa jieɔ sui kpakpai nɛɛ akpo? Ni te wɔɔfee tɛŋŋ wɔkase lɛ lɛ? Sanebimɔi nɛɛ ahetoi lɛ baaye abua wɔ ni wɔha suɔmɔ ni wɔyɔɔ kɛha Yehowa, ni ji wɔ-Naanyo ni fe fɛɛ lɛ mli awa. Ni ebaaha naanyobɔɔ ni yɔɔ wɔ kɛ wɔnyɛmimɛi lɛ ateŋ lɛ hu mli awa.1 Yoh. 4:7, 8.

YEHOWA YEƆ ANƆKWA

3. Kɛ́ akɛɛ anɔkwafo ji mɔ ko lɛ, te atsɔɔ tɛŋŋ?

3 Anɔkwafo ji mɔ ko ni yeɔ mɔ ko ni esumɔɔ lɛ lɛ anɔkwa. Ejieɔ esuɔmɔ lɛ kpo kɛtsɔ ya ni eyaa nɔ eyeɔ ebuaa mɔ kroko lɛ ni efĩɔ esɛɛ hu lɛ nɔ. Jeee be ni nibii miiya nɔ jogbaŋŋ pɛ kɛkɛ ni efeɔ enɛ, shi moŋ efeɔ nakai yɛ shihilɛi ni jaraa po amli. Biblia lɛ wieɔ Yehowa he akɛ, “anɔkwafo.” Mɔ ko mɔ ko bɛ ni yeɔ anɔkwa tamɔ lɛ.5 Mose 7:9.

4, 5. (a) Mɛɛ gbɛ nɔ Yehowa tsɔɔ akɛ eyeɔ anɔkwa? (b) Mɛɛ gbɛ nɔ kɛ́ wɔjwɛŋ bɔ ni Yehowa yeɔ etsuji anɔkwa lɛ nɔ lɛ, ewoɔ wɔ hewalɛ?

4 Mɛɛ gbɛ nɔ Yehowa tsɔɔ akɛ eyeɔ anɔkwa? Ekwaaa enɔkwa jálɔi lɛ kɔkɔɔkɔ. Amɛteŋ mɔ kome, ni ji Maŋtsɛ David lɛ, wie anɔkwa ni Yehowa yeɔ lɛ  he akɛ: “Mɛi ni yeɔ bo anɔkwa lɛ bo hu oyeɔ amɛ anɔkwa.” (2 Sam. 22:26, Ga Biblia hee) Beni David kɛ naagbai kpe lɛ, Yehowa jɛ anɔkwayeli mli ekudɔ lɛ, ebu ehe, ni ehere lɛ. (2 Sam. 22:1) David diɛŋtsɛ ná niiashikpamɔi ni tsɔɔ akɛ jeee wiemɔ kɛkɛ Yehowa wieɔ akɛ eji anɔkwafo, shi moŋ anaa yɛ bɔ ni eyeɔ ebuaa etsuji lɛ mli. Mɛni hewɔ Yehowa ye David anɔkwa lɛ? Ejaakɛ David ye lɛ anɔkwa. Yehowa sumɔɔ etsuji yɛ anɔkwa ni amɛyeɔ lɛ hewɔ, ni eyeɔ mɛi ni yeɔ lɛ anɔkwa lɛ anɔkwa.Abɛi 2:6-8.

5 Kɛ́ wɔjwɛŋ bɔ ni Yehowa yeɔ etsuji anɔkwa lɛ nɔ lɛ, ewoɔ wɔ hewalɛ waa. Nyɛmi nuu anɔkwafo ko ni atsɛɔ lɛ Reed lɛ kɛɛ akɛ: “Kɛ́ mikane bɔ ni Yehowa ye ebua David yɛ efimɔ beaŋ lɛ he sane lɛ, eyeɔ ebuaa mi waa.” Ekɛfata he akɛ: “Yehowa tee nɔ ebaa David yi beni anyiɛ esɛɛ ni ewɔɔ tɛkpoji amli lɛ po. Ni enɛ woɔ mi hewalɛ waa! Ehaa minaa akɛ, ekɔɔɔ he eko bɔ ni shihilɛ lɛ baaji loo bɔ ni nibii baafee basaa aha lɛ, Yehowa baaya nɔ eye ebua mi, kɛ́ mitee nɔ miye lɛ anɔkwa.” Ŋwanejee ko bɛ he akɛ bo hu nakai nɔŋŋ onuɔ he.Rom. 8:38, 39.

6. Mɛɛ gbɛi krokomɛi anɔ Yehowa tsɔɔ akɛ eyeɔ anɔkwa, ni te etsuji náa enɛ he sɛɛ amɛhaa tɛŋŋ?

6 Mɛɛ gbɛi krokomɛi anɔ Yehowa tsɔɔ akɛ eyeɔ anɔkwa? Gbɛ kome ji akɛ, eyeɔ lɛ diɛŋtsɛ eshishitoo mlai lɛ anɔ be fɛɛ be. Ekɛɔ akɛ: “Kɛyashi gbɔlɛ mli lɛ, mi nɔŋŋ ni.” (Yes. 46:4) Yiŋ ni ekpɛɔ lɛ fɛɛ damɔɔ eshishitoo mlai ni tsakeee lɛ anɔ. (Mal. 3:6) Kɛfata he lɛ, Yehowa tsɔɔ akɛ eyeɔ anɔkwa kɛtsɔ eshiwoo nɔ ni eyeɔ be fɛɛ be lɛ nɔ. (Yes. 55:11) Enɛ hewɔ lɛ, Yehowa tsuji anɔkwafoi fɛɛ náa anɔkwa ni eyeɔ lɛ he sɛɛ. Yɛ mɛɛ gbɛ nɔ? Kɛ́ wɔbɔ mɔdɛŋ akɛ wɔbaahi shi yɛ Yehowa shishitoo mlai lɛ anaa lɛ, wɔbaanyɛ wɔná nɔmimaa akɛ ebaaye eshiwoo akɛ ebaajɔɔ wɔ lɛ nɔ.Yes. 48:17, 18.

KASEMƆ YEHOWA ANƆKWAYELI LƐ

7. Mɛni ji gbɛ kome ni wɔɔtsɔ nɔ wɔtsɔɔ akɛ wɔyeɔ anɔkwa taakɛ Yehowa feɔ lɛ?

 7 Te wɔɔfee tɛŋŋ wɔye anɔkwa taakɛ Yehowa feɔ lɛ? Gbɛ kome ji, ní wɔbaafee nɔ ko kpakpa wɔha mɛi ni yɔɔ shihilɛi ni jaraa amli lɛ. (Abɛi 3:27) Akɛ nɔkwɛmɔnɔ lɛ, ani ole nyɛmi ko ni nijiaŋ eje wui yɛ ekolɛ hela, shiteekɛwoo ni jɛ wekumɛi aŋɔɔ, loo efatɔi komɛi ahewɔ? Mɛni hewɔ obɔɔɔ mɔdɛŋ akɛ okɛ “wiemɔi kpakpai ni ji miishɛjemɔ wiemɔi” baawo lɛ hewalɛ? (Zak. 1:13) * Kɛ́ ofee nakai lɛ, belɛ ootsɔɔ akɛ oji anɔkwafo kɛ naanyo kpakpa “ni kpɛtɛɔ mɔ gbagbalii fe nyɛmi.”Abɛi 18:24.

8. Te wɔɔfee tɛŋŋ wɔkase bɔ ni Yehowa yeɔ anɔkwa lɛ, akɛ nɔkwɛmɔnɔ lɛ, yɛ gbalashihilɛ mli lɛ?

8 Wɔbaanyɛ wɔkase bɔ ni Yehowa yeɔ anɔkwa lɛ kɛtsɔ anɔkwa ni wɔɔye mɛi ni wɔsumɔɔ lɛ nɔ. Akɛ nɔkwɛmɔnɔ lɛ, kɛ́ wɔbote gbalashihilɛ mli lɛ, wɔle akɛ esa akɛ wɔye wɔhefatalɔi anɔkwa. (Abɛi 5:15-18) No hewɔ lɛ, wɔkaŋ po akɛ wɔbaafee nɔ ko ni baaha wɔfite gbãla. (Mat. 5:28) Kɛfata he lɛ, kɛ́ wɔwieee wɔnyɛmimɛi lɛ ahe saji fɔji loo wɔyeee amɛhe osheku lɛ, no tsɔɔ akɛ wɔyeɔ amɛ anɔkwa.Abɛi 12:18.

9, 10. (a) Namɔ titri esa akɛ wɔye lɛ anɔkwa? (b) Mɛni hewɔ jeee be fɛɛ be eyɔɔ mlɛo akɛ wɔɔbo Yehowa toi lɛ?

9 Nɔ ni fe fɛɛ lɛ, wɔmiisumɔ ni wɔye Yehowa anɔkwa. Te wɔɔfee tɛŋŋ wɔfee nakai lɛ? Kɛtsɔ nɔ ni Yehowa sumɔɔ lɛ ni wɔɔsumɔ kɛ nɔ ni enyɛɔ lɛ ni wɔɔnyɛ, ní agbɛnɛ hu wɔhi shi yɛ gbɛ ni saa ehiɛ lɛ nɔ. (Nyɛkanea Lala 97:10.) Babaoo ni wɔsusuɔ nii ahe tamɔ Yehowa lɛ, babaoo  ni efeɔ mlɛo kɛhaa wɔ akɛ wɔbaabo lɛ toi.Lala 119:104.

10 Anɔkwa, jeee be fɛɛ be eyɔɔ mlɛo akɛ aaabo Yehowa toi. Ekolɛ ebaabi ni wɔmia wɔhiɛ waa dani wɔbaanyɛ wɔye lɛ anɔkwa. Eeenyɛ efee akɛ, oshijafoi komɛi ni ji Kristofoi lɛ miitao abote gbalashihilɛ mli, shi amɛnáko mɔ ko ni sa yɛ Yehowa jálɔi lɛ ateŋ. (1 Kor. 7:39) Ekolɛ nyɛmi yoo oshijafo ko baana akɛ enanemɛi nitsulɔi ni jeee Odasefoi lɛ bɔɔ mɔdɛŋ be fɛɛ be akɛ amɛbaaha lɛ nuu. Ni nakai beaŋ nɔŋŋ lɛ, ekolɛ nyɛmi yoo nɛɛ nuɔ shoofeemɔ he waa. Shi etswa efai shi akɛ, ekɛ mɔ ko ni sɔmɔɔɔ Nyɔŋmɔ enyiɛŋ, ejaakɛ eesumɔ ni eya nɔ eye Yehowa anɔkwa. Ani wɔhiɛ esɔɔɔ nyɛmimɛi ni yeɔ anɔkwa tamɔ nɛkɛ lɛ? Yehowa baajɔɔ mɛi fɛɛ ni yeɔ anɔkwa yɛ shihilɛi ni jaraa ni amɛkɛkpeɔ lɛ fɛɛ sɛɛ lɛ.Heb. 11:6.

“Naanyo ko yɛ ni kpɛtɛɔ mɔ gbagbalii fe nyɛmi.”—Abɛi 18:24 (Kwɛmɔ kuku 7)

“Nyɛŋɔfafaa nyɛhe.”—Efe. 4:32 (Kwɛmɔ kuku 16)

YEHOWA KƐ ESHAI FAA

11. Kɛ́ akɛɛ mɔ ko kɛ eshai faa lɛ, te atsɔɔ tɛŋŋ?

11 Yehowa sui ni asumɔɔ waa lɛ ateŋ ekome ji shwelɛ ni eyɔɔ akɛ ekɛ eshai aaafa lɛ. Kɛ́ akɛɛ mɔ ko kɛ eshai faa lɛ, te atsɔɔ tɛŋŋ? Etsɔɔ akɛ mɔ lɛ kɛ mɔ ko ni etɔ̃ enɔ lɛ he baake lɛ, kɛ́ eyɛ yiŋtoo kpakpa ni eeedamɔ nɔ efee nakai. No etsɔɔɔ akɛ mɔ ni kɛ eshai faa lɛ kpɛlɛɔ nɔ ni mɔ lɛ fee lɛ nɔ loo efeɔ enii oookɛɛ mɔ lɛ efeko nɔ ko. Moŋ lɛ, lɛ diɛŋtsɛ ekpɛɔ mli akɛ ebaaŋmɛɛ sane lɛ he. Biblia lɛ tsɔɔ akɛ Yehowa kɛ mɛi ni tsakeɔ amɛtsui lɛɛlɛŋ lɛ ahe ‘faa amɛ mra.’Lala 86:5.

12. (a) Mɛɛ gbɛ nɔ Yehowa kɛ eshai faa? (b) Kɛ́ akɛɛ ‘agbe’ mɔ ko he eshai lɛ, te atsɔɔ tɛŋŋ?

12 Mɛɛ gbɛ nɔ Yehowa tsɔɔ akɛ ekɛ eshai faa? Biblia lɛ kɛɔ akɛ Yehowa ‘kɛfaa aahu,’ ni tsɔɔ akɛ ekɛfaa kwraa, ni ekaiii dɔŋŋ. (Yes. 55:7) Te wɔfeɔ tɛŋŋ wɔleɔ akɛ Yehowa kɛfaa kwraa lɛ? Susumɔ shi ni ewo yɛ Bɔfoi lɛ Asaji 3:19, 20 lɛ he okwɛ. (Nyɛkanea.) Bɔfo Petro kɛɛ etoibolɔi lɛ akɛ “nyɛtsakea nyɛtsuiiaŋ, ni nyɛkua nyɛsɛɛ.” Kɛ́ eshafeelɔ ko tsake etsui lɛɛlɛŋ lɛ, eshwaa ehe waa yɛ gbɛ fɔŋ ni ekɔ lɛ he. Etswaa efai shi hu akɛ efeŋ  nakai efɔŋ lɛ dɔŋŋ. (2 Kor. 7:10, 11) Kɛfata he lɛ, kɛ́ eshafeelɔ ko tsake etsui lɛɛlɛŋ lɛ, ‘ekuɔ esɛɛ’ kɛjɛɔ egbɛ fɔŋ lɛ nɔ, ni ekɔɔ gbɛ ni sa Nyɔŋmɔ hiɛ. Kɛ́ Petro toibolɔi lɛ tsake amɛtsui lɛɛlɛŋ lɛ, mɛni baajɛ mli kɛba? Petro kɛɛ ‘abaagbe’ amɛhe eshai lɛ. Hela wiemɔ ni atsɔɔ shishi akɛ ‘abaagbe’ lɛ tsɔɔ akɛ, “abaatsumɔ hiahia.” No hewɔ lɛ, kɛ́ Yehowa kɛ eshai lɛ fa lɛ, etamɔ nɔ ni etsumɔ lɛ hiahia. Ekɛfaa kwraa.Heb. 10:22; 1 Yoh. 1:7.

13. Mɛni wiemɔ ni ji, “amɛhe eshai lɛ mikaiŋ dɔŋŋ” lɛ tsɔɔ wɔ yɛ Yehowa he?

13 Te wɔfeɔ tɛŋŋ wɔleɔ akɛ kɛji Yehowa kɛ eshai fa lɛ, ekaiii dɔŋŋ lɛ? Susumɔ Yeremia gbalɛ ni kɔɔ kpaŋmɔ hee lɛ ni akɛ Kristofoi ni afɔ amɛ mu lɛ fee, ní abaatsɔ nɔ akɛ mɛi fɛɛ ni náa kpɔ̃mɔ afɔleshaa lɛ mli hemɔkɛyeli lɛ ahe eshai afa amɛ lɛ he okwɛ. (Nyɛkanea Yeremia 31:34.) Yehowa kɛɛ akɛ: “Maŋɔ amɛnishaianii lɛ mafa, ni amɛhe eshai lɛ mikaiŋ dɔŋŋ!” No hewɔ lɛ, Yehowa woɔ wɔ shi akɛ, kɛ́ ekɛ wɔhe eshai fa wɔ lɛ, wɔsɛɛ lɛ edamɔŋ no nɔ egbalaŋ wɔtoi kɔkɔɔkɔ. Eyaaa nɔ esusuuu wɔhe eshai ni ekɛfa wɔ lɛ ahe koni no aha ewie wɔhiɛ loo egbala wɔtoi ekoŋŋ. Moŋ lɛ, kɛ́ Yehowa kɛ eshai fa lɛ, eshɛɔ efɔ̃ɔ esɛɛ, ni tsɔɔ akɛ ekaiii dɔŋŋ.Rom. 4:7, 8.

14. Mɛɛ gbɛ nɔ kɛ́ wɔjwɛŋ bɔ ni Yehowa kɛ eshai faa lɛ nɔ lɛ, eshɛjeɔ wɔmii waa? Okɛ enɛ he nɔkwɛmɔnɔ aha.

14 Kɛ́ wɔjwɛŋ bɔ ni Yehowa kɛ eshai faa lɛ nɔ lɛ, eshɛjeɔ wɔmii waa. Susumɔ nɔkwɛmɔnɔ nɛɛ he okwɛ. Afii komɛi ni eho nɛ lɛ, ashwie nyɛmi yoo ko ni wɔbaatsɛ lɛ akɛ Elaine lɛ kɛjɛ asafo lɛ mli. Afii babaoo sɛɛ lɛ, ahe lɛ ekoŋŋ. Elaine kɛɛ akɛ: “Eyɛ mli akɛ mikɛɛ mɛi krokomɛi akɛ miheɔ miyeɔ akɛ Yehowa kɛ mihe eshai lɛ efa mi moŋ, shi bei pii lɛ minuɔ he akɛ ekɛ mi teŋ jɛkɛ, loo akɛ, ebɛŋkɛ mɛi krokomɛi kpaakpa fe mi.” Shi beni Elaine kane bɔ ni Biblia lɛ wieɔ bɔ ni Yehowa kɛ eshai faa lɛ he, ni ejwɛŋ nɔ lɛ, eshɛje emii waa. Ekɛfata he akɛ: “Minu bɔ ni Yehowa sumɔɔ mi ní edɔɔ mihe lɛ he yɛ gbɛ ni minuko he nakai dã lɛ nɔ.” Sane ni nyiɛ sɛɛ nɛɛ ni ekane lɛ ná enɔ hewalɛ waa: “Kɛ́ Yehowa kɛ wɔhe eshai lɛ ke wɔ lɛ, ehe ehiaaa ní wɔnu he akɛ muji ní nakai eshai lɛ kɛwo wɔhe lɛ yɛ wɔhe lolo yɛ wɔwala be ní eshwɛ lɛ mli fɛɛ.” * Elaine kɛɛ akɛ: “Mibayɔse akɛ, asomoaŋ miyiŋ tsɔko akɛ Yehowa baanyɛ ekɛ mihe eshai lɛ afa mi kwraa, ni misusu akɛ maya nɔ matere jatsu nɛɛ miwala gbii abɔ fɛɛ. Mile akɛ ebaahe be moŋ, shi amrɔ nɛɛ miinu he akɛ manyɛ matsi mabɛŋkɛ Yehowa, ni ákɛ awo jatsu ko yɛ minɔ.” Yehowa ji Nyɔŋmɔ ni yɔɔ suɔmɔ ni kɛ eshai faa lɛɛlɛŋ!Lala 103:9.

KASEMƆ BƆ NI YEHOWA KƐ ESHAI FAA LƐ

15. Te wɔɔfee tɛŋŋ wɔkase bɔ ni Yehowa kɛ eshai faa lɛ?

15 Wɔbaanyɛ wɔkase bɔ ni Yehowa kɛ eshai faa lɛ kɛtsɔ mɛi ahe eshai ni wɔkɛaafa amɛ kɛ́ amɛtɔ̃ wɔnɔ lɛ nɔ. (Nyɛkanea Luka 17:3, 4.) Kaimɔ akɛ kɛ́ Yehowa kɛ eshai fa lɛ, eyaaa nɔ esusuuu nɔ ni wɔfee lɛ he. Wɔ hu kɛ́ wɔkɛ mɛi krokomɛi ahe eshai fa amɛ lɛ, wɔbaanyɛ wɔjie yɛ wɔjwɛŋmɔŋ kwraa, ní wɔwoŋ nakai sane lɛ nɔ dɔŋŋ wɔsɛɛ ko.

16. (a) Kɛ́ akɛɛ wɔkɛ mɛi ahe eshai afa amɛ lɛ, ani no tsɔɔ akɛ wɔbaakpɛlɛ nɔ ni amɛfee lɛ nɔ loo wɔbaaha amɛye wɔ sane fɔŋ? Tsɔɔmɔ mli. (b) Kɛ́ wɔmiitao Nyɔŋmɔ kɛ wɔhe eshai afa wɔ lɛ, mɛni esa akɛ wɔfee?

 16 Kɛ́ akɛɛ wɔkɛ mɛi ahe eshai afa amɛ lɛ etsɔɔɔ akɛ wɔbaakpɛlɛ nɔ ni amɛfee lɛ nɔ loo ni wɔbaaha amɛye wɔ sane fɔŋ. Jeee nakai kwraa. Moŋ lɛ, nɔ ni etsɔɔ kɛkɛ ji akɛ, wɔbaaŋmɛɛ sane lɛ he ní wɔbɛɛɛ mɔ lɛ wɔwooo wɔmli. Esa akɛ wɔkadi hu akɛ, kɛ́ wɔmiitao Nyɔŋmɔ kɛ wɔhe eshai afa wɔ lɛ, esa akɛ wɔ hu wɔkɛ mɛi krokomɛi  ahe eshai afa amɛ. (Mat. 6:14, 15) Yehowa kaiɔ akɛ “sũ kɛkɛ ji wɔ,” ni ákɛ wɔyeee emuu. (Lala 103:14) No hewɔ lɛ, kɛ́ mɛi komɛi wie amɛshi wɔ loo amɛfee wɔ nɔ ko lɛ, esa akɛ wɔ hu wɔkai akɛ amɛyeee emuu tamɔ wɔ nɔŋŋ, ní no atsirɛ wɔ ni wɔjɛ wɔtsuiŋ wɔkɛfa amɛ.Efe. 4:32.

Esa akɛ wɔjɛ wɔtsuiŋ wɔsɔle wɔha mɔ ko ni efee wɔ ɔn ko ni edɔ wɔ waa lɛ (Kwɛmɔ kuku 17)

17. Kɛ́ nyɛmi ko efee wɔ nɔ ko ni edɔ wɔ waa lɛ, mɛni baaye abua wɔ ni wɔkɛfa lɛ?

 17 Eji anɔkwale akɛ, bei komɛi lɛ ewa akɛ wɔkɛ mɛi ahe eshai aaafa amɛ. No mli lɛ, ewa kɛha klɛŋklɛŋ afii 100 lɛ mli Kristofoi ni afɔ amɛ mu lɛ ateŋ mɛi komɛi po akɛ amɛaasaa béi. (Fil. 4:2) Kɛ́ nyɛmi ko efee wɔ nɔ ko ni edɔ wɔ waa lɛ, mɛni baaye abua wɔ ni wɔkɛfa lɛ? Susumɔ Hiob sane lɛ he okwɛ. Yɛ nɔ najiaŋ ni Elifaz, Bildad, kɛ Zofar aaafee amɛnii akɛ Hiob nanemɛi lɛ, amɛwie amɛshi lɛ moŋ, ni enɛ dɔ lɛ waa. (Hiob 10:1; 19:2) Sɛɛ mli lɛ, Yehowa kã nanemɛi gbohii nɛɛ ahiɛ yɛ amɛnifeemɔ lɛ hewɔ. Nyɔŋmɔ kɛɛ amɛ ni amɛya Hiob ŋɔɔ koni amɛyashã afɔle amɛha amɛhe. (Hiob 42:7-9) Shi Yehowa bi ni Hiob hu afee nɔ ko. Mɛni ni? Yehowa kɛɛ Hiob akɛ, esɔle kɛkpa fai eha nakai hii lɛ. Hiob fee taakɛ Yehowa fã lɛ lɛ, ni Yehowa jɔɔ lɛ yɛ eshai ni ekɛfa lɛ hewɔ. (Nyɛkanea Hiob 42:10, 12, 16, 17.) Mɛni wɔkaseɔ yɛ sane nɛɛ mli? Kɛ́ wɔjɛ wɔtsuiŋ wɔsɔle wɔha mɔ ko ni efee wɔ nɔ ko ni edɔ wɔ waa lɛ, no baaye abua wɔ ni wɔŋmɛɛ sane lɛ he kwraa.

YAA NƆ OHA OHIƐ ASƆ YEHOWA SUI LƐ JOGBAŊŊ

18, 19. Te wɔɔfee tɛŋŋ wɔya nɔ wɔná hiɛsɔɔ babaoo wɔha Yehowa sui ni asumɔɔ waa lɛ?

18 Eŋɔɔ wɔnaa waa akɛ wɔnyɛ wɔkase Yehowa sui lɛ ahe nii saŋŋ. Wɔna akɛ anyɛɔ abɛŋkɛɔ lɛ, ekwɛɛɛ hiɛaŋ, efeɔ ejurɔ, enuɔ nii ashishi, eyeɔ anɔkwa, ni ekɛ eshai faa. Anɔkwa, babaoo yɛ lolo ni wɔbaakase yɛ Yehowa he. Wɔbaanyɛ wɔkase ehe nii babaoo kɛya naanɔ, ni enɛ baaha wɔná miishɛɛ. (Jaj. 3:11) Wɔkɛ bɔfo Paulo kpãa gbee yɛ nɔ ni ewie akɛ: “Oo, bɔ ni Nyɔŋmɔ nifalɛ kɛ ŋaa kɛ nilee mli kwɔ ha nɛ” lɛ he. Wɔ hu wɔbaanyɛ wɔwie nakai nɔŋŋ yɛ Nyɔŋmɔ suɔmɔ kɛ esui ekpaa ni wɔkase he nii yɛ nikasemɔi nɛɛ amli lɛ ahe.Rom. 11:33.

19 Eba akɛ wɔ fɛɛ wɔbaaya nɔ wɔná hiɛsɔɔ babaoo wɔha Yehowa sui ni asumɔɔ waa lɛ. Wɔbaanyɛ wɔfee enɛ kɛtsɔ esui lɛ ahe nii ni wɔbaakase, wɔbaajwɛŋ nɔ, ni wɔbaajie amɛ kpo yɛ wɔshihilɛ mli lɛ nɔ. (Efe. 5:1) Ŋwanejee ko bɛ he akɛ, kɛ́ wɔfee nakai lɛ, wɔkɛ lalatsɛ lɛ ni ŋma akɛ: “Mi lɛ, Nyɔŋmɔ ŋɔɔ hilɛ hi ha mi” lɛ baakpã gbee waa.Lala 73:28.

^ kk. 7 Kɛ́ ootao saji krokomɛi ni kɔɔ enɛ he lɛ, kwɛmɔ sane ni yitso ji “Ani Owo Mɔ ko Hewalɛ Nyɛsɛɛ Nɛɛ?” ni je kpo yɛ January 15, 1995 Buu-Mɔɔ lɛ mli lɛ, kɛ sane ni yitso ji “Wɔhiɛ Adɔ Suɔmɔ kɛ Nitsumɔi Kpakpai Ahe—Yɛ Mɛɛ Gbɛ Nɔ?” ni je kpo yɛ April 1, 1995 Buu-Mɔɔ lɛ mli lɛ.