Yona 1:1-17

  • Yona ka akɛ ebaajo foi kɛje Yehowa hiɛ (1-3)

  • Yehowa hã ahum ko ni naa wa tswa (4-6)

  • Yona ji mɔ ni hã naagba lɛ ba (7-13)

  • Ashɛ Yona afɔ̃ ŋshɔ ni efee hamahama lɛ mli (14-16)

  • Ŋshɔŋ loo wulu ko mi Yona (17)

1  Yehowa kɛɛ Amitai binuu Yona*+ akɛ:  “Tee shi ní oya Ninive+ maŋ kpeteŋkpele lɛ mli, ni oyajaje fɔbuu kojomɔ oshi lɛ, ejaakɛ amɛnɔfɔŋfeemɔ lɛ ebashɛ mihiɛ.”  Shi Yona te shi koni ejo foi kɛje Yehowa hiɛ kɛya Tarshish; ekpeleke shi kɛtee Yopa ni eyana meele ko ni miiya Tarshish. No hewɔ lɛ, ewo meele nyɔmɔ lɛ ni ebote mli koni ekɛ amɛ aya Tarshish, koni eje Yehowa hiɛ.  Kɛkɛ ni Yehowa hã kɔɔyɔɔ ko ni naa wa tswa yɛ ŋshɔ lɛ hiɛ, ni ahum ni naa wa tswa yɛ ŋshɔ lɛ hiɛ aahu akɛ, meele lɛ miihe ajwa.  Amlakui* lɛ she gbeyei aahu akɛ amɛteŋ mɔ fɛɛ mɔ bɔi enyɔŋmɔ tsɛmɔ kɛhã yelikɛbuamɔ. Amɛbɔi meele lɛ mli nibii lɛ shɛrɛmɔ kɛ ŋshɔ lɛ mli shwiemɔ koni meele lɛ afee huyɛhuyɛ.+ Shi Yona lɛ, no mli lɛ etee meele lɛ shishigbɛ eyakã shi, ni ewɔ vii yɛ jɛmɛ.  Meele lɛ kudɔɔtsɛ lɛ tsi ebɛŋkɛ lɛ, ni ekɛɛ lɛ akɛ: “Mɛni hewɔ owɔɔ lɛ? Tee shi ni obo otsɛ onyɔŋmɔ lɛ! Ekolɛ, anɔkwa Nyɔŋmɔ lɛ baasusu wɔhe, ni wɔhiɛ kpãtãŋ.”+  Kɛkɛ ni amɛkɛɛkɛɛ amɛhe akɛ: “Nyɛbaa, nyɛhãa wɔfɔ̃a oshiki+ koni wɔkɛna mɔ ni sa akɛ ashwa yɛ amanehulu nɛɛ hewɔ.” No hewɔ lɛ, amɛfɔ̃ oshiki, ni oshiki lɛ gbee Yona nɔ.+  Amɛkɛɛ lɛ akɛ: “Ofainɛ kɛɛmɔ wɔ, namɔ sa akɛ ashwa yɛ amanehulu ni eba wɔnɔ nɛɛ hewɔ? Mɛɛ nitsumɔ otsuɔ, ni nɛgbɛ ojɛ? Mɛɛ maŋ nɔ ojɛ, ni namɛi ji omaŋbii?”  Ehã hetoo akɛ: “Hebrinyo ji mi, ni Yehowa, ŋwɛi Nyɔŋmɔ lɛ, mɔ ni fee ŋshɔ kɛ shikpɔŋ gbiŋ lɛ, lɛ gbeyei misheɔ.”* 10  Kɛkɛ ni gbeyei mɔmɔ gbɔmɛi lɛ fe tsutsu lɛ, ni amɛbi lɛ akɛ: “Mɛni ofee nɛɛ?” (Gbɔmɛi lɛ ná le akɛ eejo foi kɛmiije Yehowa hiɛ, ejaakɛ ekɛɛ amɛ.) 11  No hewɔ lɛ, amɛkɛɛ lɛ akɛ: “Mɛni wɔfee bo koni ŋshɔ lɛ aŋmɛ dɛmm ahã wɔ?” Ejaakɛ ŋshɔ lɛ miiya nɔ eefee hamahama waa. 12  Ekɛɛ amɛ akɛ: “Nyɛwóa mi ni nyɛshɛa mi nyɛfɔ̃a ŋshɔ lɛ mli, ni ŋshɔ lɛ baaŋmɛ dɛmm ehã nyɛ; ejaakɛ mile akɛ mi mihewɔ nɛkɛ ahum ni naa wa nɛɛ eba nyɛnɔ lɛ.” 13  Shi gbɔmɛi lɛ wiri waa* bɔ ni afee ni amɛkɛ meele lɛ aku sɛɛ kɛba shikpɔŋ gbiŋ nɔ, shi amɛnyɛɛɛ, ejaakɛ ŋshɔ lɛ tee nɔ efee hamahama waa ewo amɛ. 14  Kɛkɛ ni amɛbolɔ amɛtsɛ Yehowa amɛkɛɛ: “Ao, Yehowa, agbɛnɛ wɔmiikpa bo fai, kaahã wɔhiɛ miikpãtã yɛ nuu nɛɛ hewɔ!* Okɛ mɔ ni efeko nɔ ko lá he sɔ̃ akatere wɔ, ejaakɛ ofee nɔ ni sa ohiɛ, Yehowa.” 15  Kɛkɛ ni amɛwó Yona ni amɛshɛ lɛ amɛfɔ̃ ŋshɔ lɛ mli; ni ŋshɔ lɛ kpa hamahamafeemɔ lɛ. 16  Kɛkɛ ni gbɔmɛi lɛ she Yehowa gbeyei waa,+ ni amɛshã afɔle amɛhã Yehowa, ni amɛwowoo shii srɔtoi. 17  Agbɛnɛ, Yehowa hã ŋshɔŋ loo wulu ko mi Yona, ni Yona hi ŋshɔŋ loo lɛ musuŋ jetsɛremɔ kɛ jenamɔ gbii etɛ.+

Shishigbɛ Niŋmaa

Eshishi ji, “Okpo.”
Amlakui ji mɛi ni tsuɔ nii yɛ meele loo lɛlɛ mli.
Loo “lɛ mijáa.”
Loo “gbɔmɛi lɛ ka akɛ amɛbaawiri kɛtsɔ mli.”
Loo “yɛ nuu nɛɛ susuma hewɔ!”