Nɔ Ni Yohane Ŋma 16:1-33

  • Abaanyɛ agbe Yesu kaselɔi lɛ (1-4a)

  • Mumɔ krɔŋkrɔŋ lɛ nitsumɔ (4b-16)

  • Kaselɔi lɛ awerɛhoyeli lɛ baatsɔ miishɛɛ (17-24)

  • Yesu eye je lɛ nɔ kunim (25-33)

16  “Mikɛɛ nyɛ nibii nɛɛ koni nyɛnane akatɔ̃tɔ.  Mɛi baashwie nyɛ kɛbaaje kpeehe lɛ.*+ Anɔkwa, ŋmɛlɛtswaa lɛ miiba, be mli ni mɔ fɛɛ mɔ ni gbeɔ nyɛ+ lɛ baasusu akɛ ekɛ sɔɔmɔ krɔŋŋ ko miihã Nyɔŋmɔ.  Shi amɛbaafee nibii nɛɛ, ejaakɛ amɛleko Tsɛ lɛ loo mi.+  Shi mikɛɛ nyɛ nibii nɛɛ bɔ ni afee ni kɛ́ ŋmɛlɛtswaa ni amɛbaaba mli lɛ shɛ lɛ, nyɛkai akɛ mikɛɛ nyɛ nibii nɛɛ momo.+ “Shishijee lɛ, mikɛɛɛ nyɛ nibii nɛɛ ejaakɛ mikɛ nyɛ yɛ.  Shi amrɔ nɛɛ, miiya mɔ ni tsu mi lɛ ŋɔɔ,+ shi nyɛteŋ mɔ ko biii mi akɛ, ‘Nɛgbɛ oyaa?’  Shi akɛni mikɛ nyɛ ewie nibii nɛɛ hewɔ lɛ, awerɛho eyi nyɛtsuiiaŋ obɔ.+  Shi miikɛɛ nyɛ anɔkwale akɛ, ehi hã nyɛ akɛ miishi kɛmiiya. Ejaakɛ kɛ́ mishiii kɛyaaa lɛ, yelikɛbualɔ*+ lɛ baŋ nyɛŋɔɔ; shi kɛ́ mitee lɛ, matsu lɛ kɛba nyɛŋɔɔ.  Ni lɛ lɛ, kɛji eba lɛ, ekɛ odase ni mɔɔ shi baahã je lɛ yɛ esha he kɛ jalɛ he kɛ kojomɔ he:  klɛŋklɛŋ lɛ, yɛ esha he,+ ejaakɛ amɛheee minɔ amɛyeee;*+ 10  agbɛnɛ hu, yɛ jalɛ he, ejaakɛ miiya Tsɛ lɛ ŋɔɔ ni nyɛnaŋ mi dɔŋŋ; 11  agbɛnɛ hu, yɛ kojomɔ he, ejaakɛ akojo je nɛŋ nɔyelɔ lɛ.+ 12  “Miyɛ nibii pii lolo ni makɛɛ nyɛ, shi nyɛnyɛŋ mli nyɛmɔ amrɔ nɛɛ. 13  Shi kɛji lɛ,* ni ji anɔkwale lɛ mumɔ lɛ ba lɛ,+ ebaatsɔɔ nyɛ anɔkwale lɛ fɛɛ mli gbɛ, ejaakɛ etoŋ lɛ diɛŋtsɛ eyiŋ ewieŋ, shi moŋ nibii ni enuɔ lɛ, ebaawie, ni ebaajaje nibii ni baaba lɛ etsɔɔ nyɛ.+ 14  Lɛ ebaawo mihiɛ nyam,+ ejaakɛ ebaaŋɔ nɔ ni ji minɔ lɛ eko ni ebaajaje no etsɔɔ nyɛ.+ 15  Nibii fɛɛ ni Tsɛ lɛ yɔɔ lɛ, minɔ ni.+ No hewɔ ni mikɛɛ akɛ ebaaŋɔ nɔ ni ji minɔ lɛ eko ni ebaajaje no etsɔɔ nyɛ lɛ. 16  Eshwɛ fioo ni nyɛnaŋ mi dɔŋŋ,+ ni eshwɛ fioo hu ni nyɛbaana mi.” 17  Kɛkɛ ni ekaselɔi lɛ ateŋ mɛi komɛi kɛɛkɛɛ amɛhe akɛ: “Mɛni etsɔɔ be ni ekɛɛ wɔ akɛ, ‘Eshwɛ fioo ni nyɛnaŋ mi, ni eshwɛ fioo hu ni nyɛbaana mi,’ kɛ ‘ejaakɛ miiya Tsɛ lɛ ŋɔɔ’ lɛ?” 18  No hewɔ lɛ, amɛkɛɛ: “Mɛni etsɔɔ be ni ekɛɛ akɛ, ‘eshwɛ fioo’ lɛ? Wɔleee nɔ ni ewieɔ lɛ he nɔ ko.” 19  Yesu le akɛ amɛmiitao amɛbi lɛ sane, no hewɔ lɛ, ekɛɛ amɛ akɛ: “Wiemɔ ni miwie akɛ: ‘Eshwɛ fioo ni nyɛnaŋ mi, ni eshwɛ fioo hu ni nyɛbaana mi’ lɛ hewɔ nyɛbibiɔ nyɛhe saji nɛɛ? 20  Lɛɛlɛŋ, lɛɛlɛŋ, miikɛɛ nyɛ akɛ, nyɛbaafó ni nyɛbaawo yara, shi je lɛ baaná miishɛɛ waa diɛŋtsɛ; nyɛbaaye awerɛho, shi nyɛwerɛhoyeli lɛ baatsɔ miishɛɛ.+ 21  Kɛ́ yoo miikɔ̃mɔ lɛ, ewerɛ hoɔ ehe, ejaakɛ eŋmɛlɛtswaa lɛ eshɛ, shi kɛ́ ená efɔ gbekɛ lɛ, ekaiii amanehulu lɛ dɔŋŋ yɛ miishɛɛ ni enáa akɛ efɔ gbɔmɔ kɛba je lɛ mli lɛ hewɔ. 22  No hewɔ lɛ, amrɔ nɛɛ nyɛ hu nyɛmiiye awerɛho; shi mana nyɛ ekoŋŋ ni nyɛtsuii baaná miishɛɛ waa diɛŋtsɛ,+ ni mɔ ko shɔ̃ŋ nyɛmiishɛɛ lɛ yɛ nyɛdɛŋ. 23  Nakai gbi lɛ nɔ lɛ, nyɛbiŋ mi sane ko kwraa. Lɛɛlɛŋ, lɛɛlɛŋ, miikɛɛ nyɛ akɛ, kɛ́ nyɛbi Tsɛ lɛ nɔ ko lɛ,+ ekɛbaahã nyɛ yɛ migbɛ́i mli.+ 24  Kɛbashi amrɔ nɛɛ, nyɛbiko nɔ kome po yɛ migbɛ́i mli. Nyɛbia ni nyɛnine baashɛ nɔ, koni nyɛmiishɛɛ lɛ ayi obɔ. 25  “Mikɛ nyɛ wie nibii nɛɛ yɛ abɛbuai amli. Ŋmɛlɛtswaa lɛ miiba, be mli ni mikɛ nyɛ ewieŋ yɛ abɛbuai amli dɔŋŋ, shi moŋ majaje Tsɛ lɛ he sane matsɔɔ nyɛ faŋŋ. 26  Nakai gbi lɛ nɔ lɛ, nyɛbaabi Tsɛ lɛ nii yɛ migbɛ́i mli; shi kɛ́ miwie enɛ lɛ, mitsɔɔɔ akɛ mi mabi nii mahã nyɛ. 27  Ejaakɛ Tsɛ lɛ diɛŋtsɛ sumɔɔ nyɛ, akɛni nyɛsumɔɔ mi,+ ni nyɛheɔ nyɛyeɔ akɛ miba akɛ Nyɔŋmɔ najiaŋdamɔlɔ lɛ hewɔ.+ 28  Miba akɛ Tsɛ lɛ najiaŋdamɔlɔ, ni miba je lɛ mli. Amrɔ nɛɛ, miishi je lɛ mli, ni miiya Tsɛ lɛ ŋɔɔ.”+ 29  Ekaselɔi lɛ kɛɛ: “Naa! Agbɛnɛ oowie faŋŋ, ni owieee yɛ abɛbuai amli. 30  Amrɔ nɛɛ, wɔle akɛ ole nibii fɛɛ, ni ehiaaa ni mɔ ko abi bo sane ko. Enɛ wɔkɛheɔ wɔyeɔ akɛ ojɛ Nyɔŋmɔ ŋɔɔ.” 31  Yesu kɛɛ amɛ akɛ: “Ani nyɛmiihe nyɛmiiye agbɛnɛ? 32  Naa! Ŋmɛlɛtswaa lɛ miiba, anɔkwa eba, be mli ni nyɛbaagbɛ nyɛshwã ni nyɛteŋ mɔ fɛɛ mɔ baaya lɛ diɛŋtsɛ eshĩa, ni nyɛbaashi mikome.+ Shi jeee mikome ni, ejaakɛ Tsɛ lɛ kɛ mi yɛ.+ 33  Mikɛɛ nyɛ nibii nɛɛ koni nyɛtsɔ minɔ nyɛná toiŋjɔlɛ.+ Nyɛbaana amanehulu yɛ je lɛ mli, shi nyɛnáa ekãa! Miye je lɛ nɔ kunim.”+

Shishigbɛ Niŋmaa

Hei ni Yudafoi lɛ buaa amɛhe naa yɛ ní amɛsɔleɔ ní amɛkaneɔ ŋmalɛi.
Yɛ biɛ lɛ, aawie mumɔ krɔŋkrɔŋ lɛ he tamɔ nɔ ni mumɔ krɔŋkrɔŋ lɛ hiɛ gbɔmɔ su.
Loo “amɛjieee hemɔkɛyeli kpo yɛ mimli.”
Wiemɔ ni ji “lɛ” ni akɛtsu nii yɛ kuku 13 kɛ 14 lɛ kɔɔ “yelikɛbualɔ lɛ” ni awie he yɛ kuku 7 lɛ he. Yesu kɛ wiemɔ ni ji “yelikɛbualɔ lɛ” tsu nii kɛwie mumɔ krɔŋkrɔŋ lɛ ni ehiɛɛɛ gbɔmɔ su, shi moŋ eji hewalɛ ko lɛ he tamɔ nɔ ni mumɔ krɔŋkrɔŋ lɛ hiɛ gbɔmɔ su. Yɛ Greek mli lɛ, awieɔ wiemɔ ni ji “yelikɛbualɔ” lɛ he tamɔ nɔ ni ehiɛ gbɔmɔ su kɛji nɔ ni ekɔɔ he lɛ po jeee nɔ ko ni yɔɔ wala mli diɛŋtsɛ po.