Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ (NIKASEMƆ NƆ̃) JUNE 2013

Ohiɛ Asɔ Yehowa Sui lɛ Jogbaŋŋ

Ohiɛ Asɔ Yehowa Sui lɛ Jogbaŋŋ

“Nyɛfea Nyɔŋmɔ kaselɔi, tamɔ bii ni asumɔɔ.”EFE. 5:1.

1. (a) Te Yehowa sui lɛ ateŋ nɔ ni baa ojwɛŋmɔŋ bei pii lɛ? (b) Mɛɛ gbɛi anɔ Nyɔŋmɔ sui lɛ ahe nii ni oookase lɛ baanyɛ aye abua bo?

KƐ OJWƐŊ Yehowa he lɛ, te esui lɛ ateŋ nɔ ni baa ojwɛŋmɔŋ lɛ? Nɔ ni baa wɔteŋ mɛi pii ajwɛŋmɔŋ ji suɔmɔ, jalɛsaneyeli, nilee, kɛ hewalɛ. Kɛlɛ, wɔle akɛ Yehowa yɛ sui kpakpai krokomɛi hu. Yɛ anɔkwale mli lɛ, kɛ́ wɔɔkɛɛ lɛ, awie Yehowa sui srɔtoi ni fa fe 40 ahe yɛ wɔwoji lɛ amli. Kɛ́ wɔkase sui nɛɛ ahe nii beni wɔfeɔ wɔweku jamɔ loo aŋkro nikasemɔ lɛ, wɔbaaná he sɛɛ waa! Mɛɛ gbɛi anɔ wɔbaanyɛ wɔná nikasemɔ ni tamɔ nɛkɛ lɛ he sɛɛ? Ebaaha wɔhiɛ asɔ wɔŋwɛi Tsɛ lɛ sui lɛ babaoo. Ni no baaha wɔkase Yehowa, ni wɔtsi wɔbɛŋkɛ lɛ kpaakpa.Yosh. 23:8; Lala 73:28.

2. (a) Okɛ nɔkwɛmɔnɔ ko atsɔɔ bɔ ni wɔɔfee wɔná hiɛsɔɔ babaoo wɔha Yehowa sui lɛ mli. (b) Mɛni he wɔbaasusu yɛ nikasemɔ nɛɛ kɛ nikasemɔi enyɔ ni baanyiɛ sɛɛ lɛ amli?

2 Shi kɛ́ akɛɛ aná “hiɛsɔɔ” aha nɔ ko lɛ, te atsɔɔ tɛŋŋ? Taakɛ akɛbaatsu nii yɛ nikasemɔ nɛɛ mli lɛ, etsɔɔ akɛ ayɔse bɔ ni nakai nɔ lɛ jara wa ha. Ekolɛ fiofio lɛ, wɔbaaná hiɛsɔɔ babaoo wɔha nɔ ko. Akɛ nɔkwɛmɔnɔ lɛ, bɔ ni wɔnyaa niyenii ko he lɛ mli baawa fiofio kɛ́ wɔnu eŋma, wɔsa wɔnaa, ni agbɛnɛ wɔ diɛŋtsɛ wɔhoo eko lɛ. Nakai nɔŋŋ kɛ́ wɔkase Yehowa su ko he nii, wɔjwɛŋ bɔ ni Yehowa jieɔ lɛ kpo lɛ nɔ, ni wɔjie nakai su lɛ eko kpo lɛ, ebaaha wɔná hiɛsɔɔ babaoo wɔha nakai su lɛ. (Efe. 5:1) Wɔbaasusu Nyɔŋmɔ sui komɛi ni wɔfɔɔɔ amɛhe wiemɔ lɛ ahe yɛ nikasemɔ nɛɛ kɛ nikasemɔi srɔtoi enyɔ ni baanyiɛ sɛɛ lɛ amli. Kɛ́ wɔmiisusu su fɛɛ su he lɛ, wɔbaaha sanebimɔi nɛɛ ahetoo: Mɛni su nɛɛ tsɔɔ? Mɛɛ gbɛ nɔ Yehowa jieɔ lɛ kpo? Ni te wɔɔfee tɛŋŋ wɔjie lɛ kpo taakɛ Yehowa feɔ lɛ?

 ANYƐƆ ABƐŊKƐƆ YEHOWA

3, 4. (a) Kɛ́ akɛɛ anyɛɔ abɛŋkɛɔ mɔ ko lɛ, te atsɔɔ tɛŋŋ? (b) Mɛɛ gbɛ nɔ Yehowa tsɔɔ akɛ abaanyɛ abɛŋkɛ lɛ?

3 Klɛŋklɛŋ lɛ, nyɛhaa wɔsusua nɔ ni atsɔɔ kɛji akɛɛ anyɛɔ abɛŋkɛɔ mɔ ko lɛ he. Etsɔɔ akɛ emli hi, ekɛ sanegbaa waaa, ni enáa dekã kɛboɔ mɛi atoi. Bɔ ni mɔ ko ni anyɛɔ abɛŋkɛɔ lɛ lɛ wieɔ, bɔ ni efeɔ enii, kɛ bɔ ni efeɔ ehiɛ ŋmɔlɔŋmɔlɔ lɛ fɛɛ haa anaa akɛ eesumɔ ni ebo mɛi atoi ni eye ebua amɛ.

4 Mɛɛ gbɛ nɔ Yehowa tsɔɔ akɛ abaanyɛ abɛŋkɛ lɛ? Eyɛ mli akɛ Yehowa ji jeŋ muu fɛɛ Bɔlɔ moŋ, shi efɔ̃ɔ wɔ nine ni wɔbɛŋkɛ lɛ yɛ sɔlemɔ mli, ni efee klalo akɛ ebaabo wɔ toi ni eye ebua wɔ. (Nyɛkanea Lala 145:18; Yesaia 30:18, 19.) Wɔbaanyɛ wɔkɛ Nyɔŋmɔ awie bei abɔ ni wɔsumɔɔ, yɛ he fɛɛ he kɛ be fɛɛ be. Kɛ́ wɔkɛ lɛ wie lɛ, emli fuuu. (Lala 65:3; Yak. 1:5) Biblia lɛ wieɔ Yehowa he tamɔ eji gbɔmɔ adesa, koni wɔnyɛ wɔbɛŋkɛ lɛ. Akɛ nɔkwɛmɔnɔ lɛ, lalatsɛ David ŋma akɛ, “Yehowa hiŋmɛi kã” wɔhe, ni ‘eninejurɔ hiɛ’ wɔmli. (Lala 34:16; 63:9) Gbalɔ Yesaia kɛ Yehowa to tookwɛlɔ he ni ekɛɛ akɛ: “Eeehiɛ etoobii lɛ yɛ ekpɔkɔiaŋ, ni eeehole amɛ eshãkã etsitsi.” (Yes. 40:11) Bo lɛ susumɔ he okwɛ. Yehowa miisumɔ ni wɔtsi wɔbɛŋkɛ lɛ kpaakpa tamɔ toobi ni tookwɛlɔ ni mli hi ewo lɛ eshãkã etsitsi! Kɛ́ wɔsusu wɔ-Tsɛ lɛ he yɛ nɛkɛ gbɛ nɔ lɛ, ehaa wɔsumɔɔ lɛ waa! Te wɔɔfee tɛŋŋ wɔkase Yehowa lɛ?

SU KO NI HE HIAA WAA

5. Mɛni hewɔ ehe hiaa ni asafoŋ onukpai afee mɛi ni anyɛɔ abɛŋkɛɔ lɛ?

5 Nyɛsɛɛ nɛɛ, abibii Odasefoi komɛi ni yɔɔ maji srɔtoi anɔ lɛ akɛ, “Mɛɛ su kɛ́ asafoŋ onukpa ko jie lɛ kpo lɛ onyaa he waa?” Amɛteŋ mɛi babaoo kɛɛ amɛsumɔɔ asafoŋ onukpai ni anyɛɔ abɛŋkɛɔ amɛ. Eyɛ mli akɛ esa akɛ Kristofoi fɛɛ ajie su nɛɛ kpo moŋ, shi  ehe miihia ni asafoŋ onukpai titri afee nakai. (Yes. 32:1, 2) Mɛni hewɔ ehe hiaa ni asafoŋ onukpai afee mɛi ni anyɛɔ abɛŋkɛɔ lɛ? Nyɛmi yoo ko wie akɛ: “Ja anyɛɔ abɛŋkɛɔ asafoŋ onukpa ko dani abaanyɛ aná esui kpakpai krokomɛi lɛ ahe sɛɛ.” Wiemɔ nɛɛ ji anɔkwale. No hewɔ lɛ, te ooofee tɛŋŋ oha mɛi anyɛ abɛŋkɛ bo lɛ?

6. Mɛni ji gbɛ kome ni obaanyɛ otsɔ nɔ oha mɛi abɛŋkɛ bo?

6 Gbɛ kome ni obaanyɛ otsɔ nɔ ojie su nɛɛ kpo ji, ni osusu mɛi krokomɛi ahe, ni oná shwelɛ lɛ akɛ obaaye obua amɛ. Kɛ́ ofee nakai lɛ, nyɛmimɛi hii kɛ yei, ni gbekɛbii hu fata he lɛ baasumɔ ni amɛbɛŋkɛ bo. (Mar. 10:13-16) Gbekɛ nuu ko ni eye afii 12 ni atsɛɔ lɛ Carlos lɛ kɛɛ akɛ: “Kɛ́ mikwɛ bɔ ni asafoŋ onukpai lɛ ŋmɔɔ ni amɛjieɔ mlihilɛ kpo yɛ asa lɛ nɔ lɛ, mináa he miishɛɛ waa.” Kɛɛmɔ ni asafoŋ onukpa ko baakɛɛ akɛ, anyɛɔ abɛŋkɛɔ lɛ lɛ kɛkɛ faaa; esa akɛ ejie su nɛɛ kpo. (1 Yoh. 3:18) Te eeefee tɛŋŋ efee nakai lɛ?

7. Mɛni hewɔ efeɔ mlɛo kɛhaa mɛi komɛi akɛ amɛkɛ wɔ aaagba sane kɛ́ wɔtsɛ wɔtsitsinaatsɛɛnii lɛ, ni mɛni enɛ tsɔɔ wɔ?

7 Susumɔ nɔkwɛmɔnɔ nɛɛ he okwɛ: Nyɛsɛɛ nɛɛ, nyɛmi nuu ko tee kpee yɛ maŋsɛɛ. Beni ekɛ kɔɔyɔŋ lɛlɛ kuɔ esɛɛ kɛyaa emaŋ ní etsɛ etsitsinaatsɛɛnii ni aŋma, ‘Nyɔŋmɔ Maŋtsɛyeli Lɛ Aba!’ yɛ nɔ lɛ, mɛi ni tsuɔ nii yɛ kɔɔyɔŋ lɛlɛ lɛ mli lɛ ateŋ mɔ kome kɛɛ, “Hɛɛ, eba!” Sɛɛ mli lɛ, amɛgba sane, ni eha nuu lɛ wɔwoji tɛtrɛbii lɛ eko. Wɔteŋ mɛi pii ená niiashikpamɔ ni tamɔ nɛkɛ. Shi mɛni hewɔ bei pii lɛ, kpee tsitsinaatsɛɛnii lɛ teɔ sanegbaa shi lɛ? Ejaakɛ tsitsinaatsɛɛnii lɛ haa mɛi shweɔ akɛ amɛle he ni wɔyaa, ni ehaa amɛnaa akɛ wɔmiisumɔ ni wɔkɛ amɛ agba wɔhemɔkɛyeli lɛ he sane. Nakai nɔŋŋ esa akɛ asafoŋ onukpai hu aha nyɛmimɛi lɛ ana akɛ amɛmiisumɔ ni amɛkɛ amɛ agba sane be fɛɛ be. Mɛɛ gbɛi komɛi asafoŋ onukpai baanyɛ atsɔ nɔ afee enɛ?

8. Mɛɛ gbɛ nɔ asafoŋ onukpai haa anaa akɛ amɛsusuɔ mɛi ahe, ni te enɛ haa asafoŋbii lɛ nuɔ he amɛhaa tɛŋŋ?

8 Eyɛ mli akɛ maŋ fɛɛ maŋ kɛ ekusum moŋ, shi kɛ́ wɔfeɔ wɔhiɛ ŋmɔlɔŋmɔlɔ, wɔtaa mɛi adɛŋ kɛ miishɛɛ, loo wɔŋaa mɛi kɛ miishɛɛ lɛ, no tsɔɔ akɛ wɔsusuɔ amɛhe diɛŋtsɛ. Namɔ esa akɛ etsɔ hiɛ efee enɛ? Kadimɔ nɔkwɛmɔnɔ ni Yesu fee lɛ. Mateo bɔ amaniɛ akɛ, yɛ kpee ko ni Yesu kɛ ekaselɔi lɛ baafee lɛ shishi lɛ, “Yesu ba ekɛ amɛ bawie.” (Mat. 28:18) Nakai nɔŋŋ ŋmɛnɛ lɛ, asafoŋ onukpai lɛ bɔɔ mɔdɛŋ amɛbɛŋkɛɔ mɛi, ni amɛkɛ amɛ gbaa sane. Te enɛ haa asafoŋbii lɛ nuɔ he amɛhaa tɛŋŋ? Nyɛmi yoo gbɛgbalɔ ko ni eye afii 88 lɛ kɛɛ akɛ: “Bɔ ni asafoŋ onukpai lɛ kɛ miishɛɛ hereɔ mi, ni amɛwoɔ mi hewalɛ kɛ́ mitee Maŋtsɛyeli Asa lɛ nɔ lɛ haa misumɔɔ amɛsane waa.” Nyɛmi yoo kroko hu kɛɛ akɛ: “Ekolɛ abuŋ lɛ nɔ ko tsɔ moŋ, shi kɛ́ asafoŋ onukpa ko kɛ miishɛɛ here mi kɛba asafoŋ kpee shishi lɛ, mináa miishɛɛ waa.”

NÁ DEKÃ OHA NYƐMIMƐI LƐ NI OBO AMƐ TOI

9, 10. (a) Mɛɛ Yehowa nɔkwɛmɔnɔ wɔbaanyɛ wɔkase? (b) Te asafoŋ onukpai aaafee tɛŋŋ akase Yehowa?

 9 Eka shi faŋŋ akɛ, kɛ́ wɔnaaa dekã wɔhaaa mɛi lɛ, amɛnyɛŋ amɛbɛŋkɛ wɔ. Wɔbaanyɛ wɔkase Yehowa nɔkwɛmɔnɔ lɛ yɛ enɛ gbɛfaŋ. Biblia lɛ kɛɔ akɛ: “Ekɛ wɔteŋ mɔ fɛɛ mɔ teŋ jekɛɛɛ.” (Bɔf. 17:27) Nɔ kome ni asafoŋ onukpai feɔ ni haa amɛnáa dekã amɛhaa mɛi ji, amɛheɔ be ni  amɛkɛ nyɛmimɛi lɛ—gbekɛbii kɛ onukpai fɛɛ—gbaa sane dani ajeɔ kpeei ashishi, kɛ beni akpa. Nyɛmi nuu gbɛgbalɔ ko wie akɛ: “Kɛ́ asafoŋ onukpa ko bi mi akɛ, ‘Te oyɔɔ tɛŋŋ?’ ni ebo hetoo ni maha lɛ lɛ toi lɛ, ehaa minuɔ he akɛ esusuɔ mihe waa.” Nyɛmi yoo ko ni kɛ nɔ ni miihe ashɛ afii 50 esɔmɔ Yehowa lɛ wie akɛ: “Asafoŋ onukpai ni náa dekã amɛkɛ mi gbaa sane kɛ́ akpa asafoŋ kpeei lɛ haa minuɔ he akɛ mihe hiaa waa.”

10 Eji anɔkwale akɛ asafoŋ onukpai yɛ sɔ̃i babaoo ni esa akɛ amɛtsu he nii. Shi esa akɛ amɛkɛfee oti ni ma amɛhiɛ akɛ, amɛbaaná dekã ni amɛkɛ nyɛmimɛi lɛ agba sane.

YEHOWA KWƐƐƐ HIƐAŊ

11, 12. (a) Kɛ́ akɛɛ mɔ ko kwɛɛɛ hiɛaŋ lɛ, te atsɔɔ tɛŋŋ? (b) Mɛɛ gbɛ nɔ Biblia lɛ haa wɔnaa akɛ Yehowa kwɛɛɛ hiɛaŋ?

11 Yehowa sui ni asumɔɔ waa lɛ eko hu ji, hiɛaŋ ni ekwɛɛɛ. (Bɔf. 10:34) Kɛ́ akɛɛ mɔ ko kwɛɛɛ hiɛaŋ lɛ, te atsɔɔ tɛŋŋ? Etsɔɔ akɛ ekɛ mɔ fɛɛ mɔ yeɔ yɛ gbɛ ni sa nɔ. Shi dani wɔbaanyɛ wɔkɛ mɔ fɛɛ mɔ aye yɛ gbɛ ni sa nɔ lɛ, ja wɔnu he akɛ esa akɛ akɛ mɔ fɛɛ mɔ aye yɛ gbɛ ni sa nɔ. Mɔ ni kwɛɛɛ hiɛaŋ lɛ kɛ mɛi fɛɛ yeɔ yɛ gbɛ ni sa nɔ, ni ebuuu mɛi komɛi akɛ amɛbaa shi yɛ bɔ ni amɛyɔɔ loo shika abɔ ni amɛyɔɔ lɛ naa. Ekɛ mɔ fɛɛ mɔ yeɔ yɛ nɔ gbɔmɔ ni mɔ lɛ ji diɛŋtsɛ lɛ naa.

12 Mɔ ni feɔ hiɛaŋ ni akwɛɛɛ lɛ he nɔkwɛmɔnɔ ni fe fɛɛ ji Yehowa. E-Wiemɔ lɛ kɛɔ akɛ, Nyɔŋmɔ “jeee mɛi ahiɛaŋkwɛlɔ.” (Nyɛkanea Bɔfoi lɛ Asaji 10:34, 35; 5 Mose 10:17.) Sane ko ni ba yɛ Mose beaŋ lɛ haa wɔnaa enɛ faŋŋ.

Zelofehad biyei lɛ ahiɛ sɔ hiɛaŋ ni Nyɔŋmɔ kwɛɛɛ lɛ (Kwɛmɔ kuku 13, 14)

13, 14. (a) Mɛɛ naagba Zelofehad biyei lɛ kɛkpe? (b) Mɛɛ gbɛ nɔ Yehowa tsɔɔ akɛ ekwɛɛɛ hiɛaŋ?

 13 Beni eshwɛ fioo ni Israelbii lɛ baabote Shiwoo Shikpɔŋ lɛ nɔ lɛ, nyɛmimɛi yei enumɔ komɛi ni boteko gbalashihilɛ mli lɛ kɛ naagba ko kpe. Mɛni ji naagba lɛ? Amɛtsɛ Zelofehad egbo, ni anyɛŋ akɛ eshikpɔŋ lɛ aha amɛ. Mɛni hewɔ? Ejaakɛ yɛ Mla lɛ naa lɛ, bihii pɛ abaanyɛ akɛ shikpɔŋ aha. Shi amɛtsɛ gbo ni ebɛ binuu. (4 Mose 26:33, 52-55) No hewɔ lɛ, ani akɛ shikpɔŋ lɛ baaha wekumɛi krokomɛi? Mɛni Zelofehad biyei lɛ baafee?

14 Nyɛmimɛi yei enumɔ lɛ yana Mose ni amɛbi lɛ akɛ: “Mɛɛba aaajie wɔtsɛ gbɛ́i yɛ eweku lɛ mli, yɛ binuu ni ebɛ lɛ hewɔ?” Ni amɛkpa fai akɛ: “Nyɛhaa wɔ wɔgbɛnaa yɛ wɔtsɛ nyɛmimɛi lɛ ateŋ!” Ani Mose here nɔ akɛ, ‘Nakai mla lɛ kɛɛ, no hewɔ lɛ nɔ ko bɛ ni mafee’? Dabi, ekɛ ‘amɛsane lɛ tee Yehowa hiɛ.’ (4 Mose 27:2-5)  Mɛɛ hetoo Yehowa kɛha lɛ? Ekɛɛ Mose akɛ: “Bɔ ni Zelofehad biyei lɛ kɛɛ lɛ ja; ha amɛ gbɛfaŋnɔ ko kɛ̃ yɛ amɛtsɛ nyɛmimɛi lɛ ateŋ, ni amɛtsɛ gboshinii lɛ ashɛ amɛdɛŋ.” Yehowa kɛwaaa jɛmɛ. Ekɛɛ Mose ni ekɛ enɛ afata Mla he akɛ: “Kɛji nuu ko gbo ni ebɛ binuu lɛ, no lɛ nyɛhaa egboshinii lɛ atsɔa ebiyoo nɔ̃.” (4 Mose 27:6-8; Yosh. 17:1-6) Kɛjɛ nakai be lɛ sɛɛ lɛ, Israel yei fɛɛ ni kɛ shihilɛ ni tamɔ nɛkɛ kpe lɛ ná gboshinii.

15. (a) Mɛɛ gbɛ nɔ Yehowa kɛ ewebii, ni mɛi ni bɛ yelikɛbualɔ po fata he lɛ, yeɔ ehaa? (b) Mɛɛ Biblia mli amaniɛbɔi krokomɛi ole ni tsɔɔ akɛ Yehowa kwɛɛɛ hiɛaŋ?

15 Enɛ tsɔɔ faŋŋ akɛ Yehowa kwɛɛɛ hiɛaŋ! Yehowa kɛ yei nɛɛ ni bɛ mɔ ko ni baaye abua amɛ lɛ ye yɛ gbɛ ni sa nɔ, ni ekɛ woo ha amɛ taakɛ efeɔ ehaa Israelbii krokomɛi lɛ. (Lala 68:6) Enɛ ji Biblia mli amaniɛbɔi ni tsɔɔ akɛ Yehowa kwɛɛɛ hiɛaŋ yɛ bɔ ni ekɛ etsuji fɛɛ yeɔ ehaa lɛ ateŋ ekome kɛkɛ.1 Sam. 16:1-13; Bɔf. 10:30-35, 44-48.

WƆBAANYƐ WƆKASE YEHOWA

16. Te wɔɔfee tɛŋŋ wɔkase hiɛaŋ ni Yehowa kwɛɛɛ lɛ?

16 Te wɔɔfee tɛŋŋ wɔkase hiɛaŋ ni Yehowa kwɛɛɛ lɛ? Kaimɔ akɛ dani wɔbaanyɛ wɔjie su nɛɛ kpo jogbaŋŋ lɛ, ja wɔnu he akɛ esa akɛ akɛ mɔ fɛɛ mɔ aye yɛ gbɛ ni sa nɔ. Ekolɛ onaa ohe akɛ oji mɔ ko ni kwɛɛɛ hiɛaŋ. Shi jeee be fɛɛ be eyɔɔ mlɛo akɛ wɔɔna bɔ ni wɔbuɔ mɛi krokomɛi wɔhaa. No hewɔ lɛ, te ooofee tɛŋŋ ona akɛ okwɛɛɛ hiɛaŋ lɛɛlɛŋ lɛ? Beni Yesu miitao ele mɔ ni mɛi susuɔ akɛ eji lɛ, ebi enanemɛi ni eheɔ amɛ eyeɔ waa lɛ akɛ: “Namɔ mɛi kɛɔ akɛ gbɔmɔbi lɛ ji?” (Mat. 16:13, 14) Mɛni hewɔ okaseee Yesu nɔkwɛmɔnɔ lɛ? Obaanyɛ obi onaanyo ko ni oheɔ oyeɔ waa akɛ elakaŋ bo lɛ akɛ, ‘Kɛ́ okwɛ lɛ, ani miji mɔ ko ni kwɛɔ hiɛaŋ? Ani mɛi naa mi akɛ mɔ ko ni kwɛɛɛ hiɛaŋ?’ Kɛ́ ekolɛ ekɛɛ bo akɛ, bei komɛi lɛ okɛ mɛi ni jɛ maŋ kroko nɔ lɛ yeɔ jogbaŋŋ fe mɛi krokomɛi loo otseɔ ohiɛ waa ohaa mɛi ni yɔɔ nii, loo mɛi ni le woloŋ lɛ, mɛni esa akɛ ofee? Sɔlemɔ waa obi Yehowa ni eye ebua bo ni otsake bɔ ni obuɔ mɛi krokomɛi ohaa lɛ, koni onyɛ okɛ mɛi fɛɛ aye yɛ gbɛ ni sa nɔ ni okwɛɛɛ hiɛaŋ taakɛ efeɔ lɛ.—Mat. 7:7; Kol. 3:10, 11.

17. Mɛɛ gbɛi anɔ wɔbaanyɛ wɔkɛ mɛi aye ní wɔkwɛɛɛ hiɛaŋ?

 17 Yɛ asafo lɛ mli lɛ, wɔbaanyɛ wɔkase Yehowa kɛtsɔ bulɛ kɛ mlihilɛ kpo ni wɔɔjie wɔtsɔɔ mɛi fɛɛ lɛ nɔ. Akɛ nɔkwɛmɔnɔ lɛ, kɛ́ wɔmiifɔ̃ nyɛmimɛi nine kɛha henaabuamɔ ko lɛ, esa akɛ wɔfɔ̃ mɛi srɔtoi fɛɛ, ní mɛi ni jɛ maŋ kroko nɔ, ohiafoi, awusai, loo okulafoi fata he lɛ nine. (Nyɛkanea Galatabii 2:10; Yakobo 1:27.) Agbɛnɛ hu, yɛ shiɛmɔ nitsumɔ lɛ mli lɛ, wɔkɛ mɛi srɔtoi fɛɛ, ní mɛi ni jɛ maŋ kroko nɔ lɛ fata he lɛ wieɔ ni wɔkwɛɛɛ hiɛaŋ. Yehowa gbɛjianɔtoo lɛ feɔ Biblia kasemɔ woji yɛ wiemɔi aaafee 600 amli. Enɛ haa wɔnáa hegbɛ kɛtsɔɔ faŋŋ akɛ wɔkwɛɛɛ hiɛaŋ!

18. Mɛni obaafee kɛtsɔɔ akɛ ohiɛ sɔɔ bɔ ni anyɛɔ abɛŋkɛɔ Yehowa kɛ bɔ ni ekwɛɛɛ hiɛaŋ lɛ?

18 Kɛ́ wɔhe be kɛjwɛŋ bɔ ni anyɛɔ abɛŋkɛɔ Yehowa, kɛ bɔ ni ekwɛɛɛ hiɛaŋ lɛ he lɛ, ebaaha wɔná hiɛsɔɔ babaoo wɔha lɛ. Ni esa akɛ hiɛsɔɔ nɛɛ atsirɛ wɔ ni wɔkase Yehowa, ni wɔjie esui lɛ akpo yɛ bɔ ni wɔkɛ wɔnyɛmimɛi kɛ mɛi ni wɔkɛkpeɔ yɛ shiɛmɔ nitsumɔ lɛ mli lɛ yeɔ wɔhaa lɛ mli.

“Yehowa bɛŋkɛ mɛi fɛɛ ni tsɛɔ lɛ lɛ.”—Lala 145:18, Ga Biblia hee (Kwɛmɔ kuku 9)

“Ejaakɛ Yehowa . . . kwɛɛɛ mɛi ahiɛaŋ.”—5 Mose 10:17 (Kwɛmɔ kuku 17)