Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

Au dau taleitaka na veimaliwai kei ira na itabagone keimami lotu vata

 E VEISAUTAKA NA BULA NA IVOLATABU

E ca na Uluqu ena Qito!

E ca na Uluqu ena Qito!
  • SUCU: 1928

  • VANUA: COSTA RICA

  • KA E KILAI KINA: DAUQITO, DAUVEIMAUILAVO

NOQU BULA E LIU

Au susu e Puerto Limón e dua na korolevu e tiko na kena ikelekele ni waqa ena ceva kei Costa Rica. Keitou le walu na veitacini, au ikavitu ni gone. A mate o Ta niu yabaki walu, mani veisusu duadua o Na.

Dua na qito au se taleitaka sara niu se gone na baseball. Au lai lewena sara e dua na timi ni baseball niu sa itabagone, ia au sega ni saumi kina. Niu yabaki 20 vakacaca, a tukuna vei au e dua na turaga niu rawa ni lewena e dua na timi ni baseball e Nicaragua era saumi na kena lewe ni timi. Ia au sega ni cakava qori ni sa tautauvimate o Na qai sega ni dua me qaravi koya. Au sega tale ga ni via lako i Nicaragua. Dua tale na gauna, au sureti meu lewena na timi ni baseball e Costa Rica. Au mani vakadonuya, au lewena kina na timi ni Costa Rica mai na 1949 ina 1952. Au qito vakavica e Cuba, Mexico, kei Nicaragua. Au dau biu ena dua na itutu nuitaki e rara, meu ciqo polo. Au rawa mada ga ni qito vaka17 qai sega ni dua na cala au cakava. Dua na ka noqu taleitaka nodra dau kaciva voli na yacaqu o ira na sarasara!

E vakasisila noqu ivakarau ni bula. Sa tiko e dua na noqu itau, ia au domona e levu tale na yalewa. Au dauveimauilavo, volia na tikite ni lotari, au daumateni tale ga. Na levu ni noqu mateni ena dua na siga, au sega mada ga ni kila seu lesu vakacava i neitou niu yadra ena siga tarava.

A yaco me iVakadinadina i Jiova o tinaqu ni se va tu qori na ivakarau ni noqu bula. Dua na ka nona vinakata meu tomani koya, ia a dreve na nona sasaga ni se kaukaua sara tu ga noqu via qito ena gauna qori. Na levu ni noqu taleitaka na qito, au bolea meu kua ni kana ena gauna ni tereni. Na ka ga e tu ena noqu vakasama na baseball, e ca na uluqu ena qito qori!

Ia au mavoa vakaca niu yabaki 29 niu saga meu ciqoma na polo ena dua na gauna ni qito. Au mani vakatulewataka meu sa cegu na qito, meu sa veivakavulici ga vei ira na dauqito era sega ni saumi.

 VEISAUTAKI AU NA IVOLATABU

Au ciqoma e dua na veisureti ena 1957 meu tiko ena nodra soqo na iVakadinadina i Jiova a caka ena dua na rara au dau qito kina e liu. Niu dabe toka ena vanua ni sarasara, dua na duidui levu au raica. Era veidokai na iVakadinadina ni vakatauvatani kei na nodra kosakosa kei na nodra dauvakacaca na dau sara qito. Qori e uqeti au meu vulica na iVolatabu kei ira na iVakadinadina i Jiova qai tiko ena nodra soqo ni lotu.

Au kurabuitaka na levu ni ivakavuvuli vakaivolatabu au vulica. Kena ivakaraitaki, e parofisaitaka o Jisu nira na vunautaka na itukutuku vinaka ni Matanitu ni Kalou e veiyasa i vuravura na nona tisaipeli ena iotioti ni veisiga. (Maciu 24:14) Au vulica tale ga nira sega ni rawailavo na lotu vaKarisito dina ena nodra vunautaka na itukutuku vinaka. Ni a kaya o Jisu: “E soli wale vei kemudou, dou solia wale tale ga.”Maciu 10:8.

Ni toso tiko noqu vuli iVolatabu, au vakatauvatana na ka au vulica kei na ka au raica vei ira na iVakadinadina i Jiova. Au qoroya nodra gugumatua ni vunautaka na itukutuku vinaka ni Matanitu ni Kalou e veiyasa i vuravura. Au vakadinata tale ga nira dausoli ka me vaka ga a veivakaroti kina o Jisu vei ira na lotu vaKarisito. Niu wilika ena Marika 10:21 na veisureti i Jisu, “Mo mai muri au,” au vinakata sara ga meu dua na iVakadinadina.

E taura na gauna meu muria na veika au vulica ena iVolatabu. Kena ivakaraitaki, dua na gauna balavu noqu voli tikite tu ni lotari e veimacawa qai dau tiko noqu naba “kalougata.” Ia au vulica ena iVolatabu ni Kalou e cati ira na daukocokoco era qarava na “kalou ni Kalougata.” (Aisea 65:11; Kolosa 3:5) Au mani vakatulewataka meu muduka na veimauilavo. Na imatai ni Sigatabu au sega ni volia kina na tikite ni lotari, e kacivaki na noqu naba! Era vakalialiai au e levu niu sega ni voli tikite ena macawa ya, ra qai uqeti au meu cakava tale. Ia au vakadeitaka niu na sega tale ni voli tikite ni lotari.

A vakatovolei noqu sa dua na “tamata vou” ena soqo au papitaiso kina meu iVakadinadina i Jiova. (Efeso 4:24) Niu gole tiko ina noqu icili ena dua na yakavi, keirau sota tale kei na yalewa a noqu itau tu e liu qai cikevi au meu lesuva na noqu ivakarau ni bula makawa. Ia au kaya niu na sega ni cakava ya niu sa muria tiko na ivakatagedegede ena iVolatabu. (1 Korinica 6:18) E qai kailavaka: “Na cava?” Ni sega ni kauaitaka na rai ni iVolatabu me baleta na ivalavala vakasisila, e kaya me keirau veibuku tale. Ia au curu ena noqu rumu qai lokataka na katuba. Mai na gauna au iVakadinadina kina ena 1958 me yacova mai nikua, au marau niu sega ni lesuva tale na noqu bula makawa.

KENA YAGA

Dua na ka na levu ni veivakalougatataki au sotava niu muria na ivakavuvuli vakaivolatabu! Kena ivakaraitaki, au kunea e levu na itokani vinaka, vakainaki noqu bula, au qai vakila na marau dina.

Au se taleitaka tiko ga na qito baseball, ia e sa sega ni ka bibi duadua ena noqu bula. E lekaleka ga na noqu rogo kei na noqu rawailavo ena baseball. Ia ena tawamudu noqu veiwekani kei na Kalou kei ira na nona tamata au sa maliwai ira tiko ena gauna qo. E kaya na iVolatabu: “Sa takali tiko yani na vuravura kei na kena gagadre, ia o koya e cakava na loma ni Kalou ena tu ga me sega ni mudu.” (1 Joni 2:17) E sega ni dua na ka ena gauna qo e uasivia na noqu lomani Jiova kei ira na nona tamata!