Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 E VEISAUTAKA NA BULA NA IVOLATABU

Au Sikalutu ena Levu na Gauna, ia Au Sega ni Soro

Au Sikalutu ena Levu na Gauna, ia Au Sega ni Soro
  • SUCU: 1953

  • VANUA: OSITERELIA

  • KA E KILAI KINA: BOBULA INA IYALOYALO VAKASISILA

NOQU BULA E LIU:

A biubiu mai Jamani o tamaqu ena 1949 me toki i Ositerelia. E lai vaqara cakacaka e Victoria, dua na yasa i Ositerelia. Rau sota e kea kei tinaqu, rau vakamau sara. Au qai sucu ena 1953.

Oti ga e vica na yabaki, a vulica na iVolatabu kei ira na iVakadinadina i Jiova o tinaqu. Levu gona na ivakavuvuli vakaivolatabu au se kila ga mai na gauna au se gone kina. Ia e sevaka na lotu o tamaqu. Toso na gauna, sa rerevaki koya o noqu Na ena vuku ni nona itovo voravora kei na nona dau veivakarerei. A vulica tiko ga na iVolatabu o Na, qai marautaka vakalevu na ka e vulica. A qai dua tale na ganequ, e dau vakamacala vei keirau o Na ena gauna e yali kina mai vale o Ta. E dau vakamacalataka vei keirau na parataisi, kei na yaga ni neirau muria na ivakatagedegede ena iVolatabu.—Same 37:10, 29; Aisea 48:17.

Au biubiu mai vale niu yabaki 18 ni sa rui voravora o Ta. Au vakabauta na veika e vakavulici au kina o Na ena iVolatabu. Ia e sega ni tara na lomaqu, au sega ni muria kina. Au lai cakacaka ena dua na vanua ni keli koala, au vakamau tale ga niu yabaki 20. Gauna e sucu kina na imatai ni luvei keirau, au vakasamataka tale se cava sara mada e bibi ena noqu bula. Au kila ni na yaga ena neitou vuvale na ivakavuvuli vakaivolatabu, au mani vuli iVolatabu kei na dua na iVakadinadina i Jiova. Ia e sega ni taleitaka qori o watiqu. Dua na gauna niu vakarau gole ina nodra soqoni ni lotu na iVakadinadina i Jiova, sa vakamatatataka sara ga vei au o watiqu meu muduka noqu vuli iVolatabu seu biubiu mai vale. Au sega ni kila na cava meu cakava, au sa mani vakamalumalumu ga ina ka e vinakata. Au veivutunitaka na ka au cakava ya niu kila ni cala.

Na noqu bobula ina iyaloyalo vakasisila a tekivu mai vanua ni cakacaka. Au taleitaka na ka au dau raica, ena yasana adua e vakasisila tale vei au. Dua na ka na ora ni lomaqu. Au kila mai na veika au vulica ena dua na gauna ena iVolatabu ni cala na ka au cakava tiko. De dua ena totogitaki au kina na Kalou. Ia au sega ni muduka rawa na noqu sara iyaloyalo vakasisila ni sa tiki sara ga ni noqu bula. Au sa bobula kina.

Dua na gauna balavu e buawa tu kina vei au na ivakatagedegede a vakavulica o tinaqu. Na mawe ni veika ca au dau vakasamataka sa laurai sara ga ena noqu itovo. Au dau vosavosa ca, au taleitaka  tale ga na veiwali ca. Au raica vakamamada na veiyacovi. Au se vakamau tu, ia au veibutakoci tale tiko ga. Toso na gauna, au sa sevaka qai vakasisilataka na veika au cakava voli.

A qai kavoro noqu bula vakawati, qori e gauna veilecayaki sara ga vei au. Au mani masu vei Jiova mai vu ni lomaqu. Oti e ruasagavulu na yabaki, au qai vulica tale na iVolatabu. Sa takali ena gauna qori o tamaqu, sa papitaiso tale ga o tinaqu me dua na iVakadinadina i Jiova.

VEISAUTAKI AU NA IVOLATABU:

Na noqu ivakarau ni bula sa veicalati sara ga kei na ivakatagedegede savasava ena iVolatabu. Au sa qai vakadeitaka meu cakava na veiveisau e gadrevi meu vakila kina na lomavakacegu e yalataki ena iVolatabu. Au muduka na noqu vosavosa ca, au saga tale ga meu lewa vinaka noqu cudru. Sa biu vakatikitiki noqu ivakarau ni bula vakasisila, au muduka na veimauilavo, na gunu sivia, kei na butako.

Era sega ni taura rawa na noqu itokani vakacakacaka na vuna au cakava kina na veiveisau levu ya. Tolu na yabaki nodra saga toka meu lesuva noqu ivakarau ni bula makawa. So na gauna au sikalutu tale ina veiba katakata kei na vosa ca. Era dau marau sara ga noqu itokani vakacakacaka ni yaco qori ra qai kaya: “Oi, nanumi ga sa veisau o Joe.” E mosimosi qai veivakayalolailaitaki dina na vosa va qori!

E sega ni caka rawa na iyaloyalo vakasisila ena noqu vanua ni cakacaka, na kena e laurai ena iyaya vakalivaliva kei na kena e tabaki. Era dau vakauta wavoki na noqu itokani vakacakacaka na itaba vakasisila ena kompiuta, me vaka ga au dau cakava tu e liu. Era vakadredretaka sara ga na noqu itokani vakacakacaka na noqu sasaga meu valuta noqu malumalumu. Au mani kere veivuke vua e vakavulici au tiko ena iVolatabu. E vakarogoci au vinaka niu talaucaka na lomaqu. Oti sa qai vakaraitaka vei au eso na tikinivolatabu ena vukei au. E uqeti au tale ga meu kerea tiko ga na veivuke i Jiova ena masu.—Same 119:37.

Au kerei ira na noqu itokani vakacakacaka ena dua na siga me keimami veivosaki mada. E le rua e nodrau malumalumu tiko na alakaolo, au mani tukuna me soli vei rau na bia. Era vosavosa na kena vo ra qai kaya ni sega ni dodonu ya baleta erau saga tiko na le rua me rau valuta na nodrau malumalumu. Au sa qai kaya vei ira ni ituvaki vata sara ga ya au tiko kina. Era sa qai kila ena siga ya noqu itokani vakacakacaka niu saga tiko meu valuta na noqu malumalumu. Era sega tale ni vakasaurarataki au meu lesuva noqu bula makawa.

Toso na gauna, au valuta rawa noqu malumalumu ena veivuke i Jiova. Au papitaiso ena 1999 meu dua na iVakadinadina i Jiova. Dua na ka noqu vakavinavinaka niu a vakayacora na veiveisau, au mai marautaka tu kina nikua na bula.

Au sa qai kila na vuna e sevaka kina o Jiova na veika au dau taleitaka tu e liu. Ni Tama dauloloma, a taqomaki au o Jiova mai na leqa au rawa ni sotava ena sara iyaloyalo vakasisila. Au vakadinadinataka na ka e tukuni ena Vosa Vakaibalebale 3:5, 6: “Mo nuitaki Jiova ena lomamu taucoko, mo kua ni vakararavi ena nomu yalomatua. Mo nanumi koya ena ka kece o cakava, ena vakadodonutaka na nomu ilakolako o koya.” E itataqomaki vei au na ivakatagedegede ena iVolatabu, e vuavuaivinaka tale ga kina na ka kece au cakava.—Same 1:1-3.

KENA YAGA:

Au dau beci au tu e liu ena vuku ni noqu ivakarau ni bula. Ia qo au sa lomavakacegu, au marautaka na bula niu kila sa vosoti au o Jiova qai tokoni au. Au vakamautaki Karolin ena yabaki 2000, e tautauvata na ka keirau vakabauta, e lomani Jiova tale ga. Sa vakilai ena neirau vuvale na vakacegu. Keirau kalougata dina ni keirau lewena e dua na vuvale era cavutu mai na veiyasa i vuravura na lewena, e savasava nodra itovo ra qai dau veilomani.