E matata qai matailalai na kedratou ivakamacala na va na ose kei na dauvodo ose e cavuti ena iVolatabu! E vaka sara ga eda raica tu e matada na ka e tukuni me baleti ratou. E tukuni ni rogo levu na nodratou cici na ose. Na imatai ni ose e vulavula, qai vodo tiko kina e dua na tui qaqa. Na ikarua ni ose e damudamu, o koya e vodo tiko kina e kauta tani na sautu e vuravura. Na ikatolu ni ose e loaloa, qai taura tu e dua na ivakarau o koya e vodo tiko kina. Qori e vakatakarakarataka na leqa ni kakana. E muri sara toka yani na ose vulaci, qai vakatakarakarataka na tauvimate kei na so tale na ka vakadomobula e kena itinitini na mate. E muri koya voleka tiko o Bulubulu, sa tilomi ira e dua na iwiliwili levu ni kawatamata!—Vakatakila 6:1-8.

“Dua na ka noqu rere ena imatai ni gauna au wilika kina na kedratou ivakamacala na va na dauvodo ose. Au nanuma ga ni sa voleka na Siga ni Lewa, ia au na sega ni bula niu sega ni vakarautaki au tu.”—Crystal.

“E vakatubuqoroqoro dina na ka e tukuni me baleti ratou na dauvodo ose, kei na duidui roka ni nodratou ose. Sa qai matata vei au na ka au wilika me baleti ratou niu sa kila na kena ibalebale.”—Ed.

Vakacava o duavata kei na rai nei Crystal me baleti ratou na va na dauvodo ose se o duavata kei Ed? Ni vakatauvatani kei na so tale na ka e vakamacalataki ena Vakatakila, e duatani duadua na raivotu me baleti ratou na dauvodo ose. Ena yaga vei iko na nomu kila na ibalebale ni raivotu qori. E yalataka na Kalou ni o na vakila na marau dina ke o wilika, vulica, qai muria na ka e volai ena Vakatakila.—Vakatakila 1:1-3.

Era rerevaka eso na raivotu me baleti ratou na dauvodo ose, ia e sega ni dodonu me rerevaki. Era kaya e vica vata na milioni ni vaqaqacotaka na nodra vakabauta na raivotu qori, qai vakadeitaka vei ira ni dua na gauna totoka sa tu qo e matada. O rawa ni vakila tale ga qori! O rawa ni wilika ena ulutaga tarava eso tale na ivakamacala me baleti ratou na dauvodo ose.