Raica sara na lewena

Raica na lewenivola

 E VEISAUTAKA NA BULA NA IVOLATABU

Au Dau Yaloca Qai Voravora

Au Dau Yaloca Qai Voravora
  • SUCU: 1974

  • VANUA: MEXICO

  • KA E KILAI KINA: VORAVORA NONA ITOVO NI SE ITABAGONE

NOQU BULA E LIU:

Au sucu ena korolevu o Ciudad Mante , ena yasayasa rairai totoka o Tamaulipas e Mexico. Era dau veikauaitaki qai yalovinaka na lewenivanua. Ia e vanua vakarerevaki ni levu tale ga kina na basulawa.

Au ikarua vei keitou na le va na veitacini tagane. Au papitaiso ena lotu Katolika, au lewe tale ga ni kena matasere ena dua na gauna. Au via cakava na ka e vakamarautaka na Kalou niu leqataka deu lai kama tawamudu i eli.

A biuti keitou o tamaqu niu se qai yabaki lima. Dua na ka noqu rarawa kei na galili. Keitou lomani koya vakalevu, au sega gona ni taura rawa se cava e biubiu kina. Levu na gauna sa cakacaka tu ga o tinaqu me qaravi keitou kina na gone.

Au vakaiulubaletaka na leqa mai vale meu vakalutu vuli kina, meu vakailala tale ga kei ira era qase cake vei au. Au vulica kina na vosavosa ca, vakatavako, butako, kei na vala. Au vulica tale ga na veivacu, veibo, kei na so tale na iwalewale ni vala e vakayagataki kina na liga kei na yava meu rawa ni lewai ira eso tale. Qori e vakavuna na voravora ni noqu itovo niu se itabagone. Levu na gauna au lai coko tu ena veivanavanai e dau caka, vakavica noqu voleka sara ni mate. Dua na ka nona rarawa o tinaqu ni dau lai kauti au mai ena gaunisala au sa davo tu kina me cicivaki au i valenibula!

Gauna au yabaki 16 kina, a gole yani i vale o Jorge keirau se veitokani sara ena gauna keirau se gone kina. A kaya ni dua na iVakadinadina i Jiova, e via wasea vei keitou e dua na itukutuku bibi. E vakamacalataka na ka e vakabauta qai yavutaka qori ena iVolatabu. Au taleitaka sara ga na ka au rogoca me baleta na yaca ni Kalou kei na nona inaki, niu se sega ni bau wilika na iVolatabu. Keitou mani ciqoma na veisureti i Jorge me keitou vulica na iVolatabu.

VEISAUTAKI AU NA IVOLATABU:

Au lomavakacegu dina niu rogoca ni sega ni yavutaki ena iVolatabu na ivakavuvuli ni eli. (Same 146:4; Dauvunau 9:5) Sa oti sara ga e keri na rere vakalialia a tu vei au e liu me baleta na Kalou. Au sa qai vakadeitaka  ni Tama dauloloma, qai vinakata mera marautaka na bula na luvena.

Au liaca ni toso tiko noqu vuli iVolatabu ni dodonu meu veisautaka noqu itovo. E bibi meu yalomalumalumu, meu muduka tale ga noqu ivakarau voravora. E vukei au vakalevu na ivakasala ena 1 Korinica 15:33. E tukuni kina: “Na ilala ca e vakacacana na itovo vinaka.” Au taura rawa e kea ni dodonu meu digia vinaka noqu ilala keu via veisautaka noqu itovo. Au mani vakanadakui ira noqu ilala makawa, au lai vakailala kei ira na lotu vaKarisito dina. O ira qori era sega ni veimoku se voravora nodra itovo mera walia kina nodra leqa. Ia era muria na ivakavuvuli vakaivolatabu.

Dua tale na tikinivolatabu e vukei au na Roma 12:17-19. E tukuni kina: “Kua ni sauma na ca e caka vei kemuni. . . . Ke rawa, saga moni veiyaloni kei ira na tamata kece. Ni kua ni sauma na ca e caka vei kemuni, . . . ni volai: ‘“E noqu na veisausaumi, au na sauma,” e kaya o Jiova.’” Au vakabauta ni na cakava o Jiova e dua na ka ena veika tawadodonu ena gauna kei na sala e donu vua. Toso na gauna, sa tekivu veisau vakamalua na noqu itovo.

Dua na ka guiguilecavi dredre a yaco ena dua na siga niu gole tiko i vale. Era buturaki au e dua tale na ilala daubasulawa keimami dau veimecaki tu e liu. A mokuta na dakuqu na nodra iliuliu qai kaya, “Cakava sara e dua na ka!” Au masu vakalekaleka ga vei Jiova, au kerea na nona veivuke meu vosota na veika e caka vei au. Dua na ka noqu via veisausaumi, ia au sega ni cakava ya. Keirau sota tale kei na nodra iliuliu na ilala ya ena siga tarava. E tuburi au na cudru katakata, ia au masu lo vei Jiova me vukei au meu lewa vinaka noqu cudru. Au kurabui ni gole mai na cauravou ya qai kaya: “Vosoti au ena ka e yaco ena bogi. Kila na cava, au via vakataki iko. Au via vulica na iVolatabu.” Au marau sara ga niu lewa vinaka noqu cudru! Keirau vuli iVolatabu rawa kina kei na cauravou ya.

Ka ni rarawa ni ratou muduka nodratou vuli iVolatabu na vo ni noqu vuvale. Ia au vakadeitaka meu vuli tiko ga, me kua ni dua na ka e tarova ya. Au kila ni na seavu na noqu rarawa keu veimaliwai wasoma kei ira na tamata ni Kalou, o ira qori era sa na noqu lewe ni vuvale vou. A toso vinaka noqu vuli iVolatabu, au qai papitaiso meu iVakadinadina i Jiova ena 1991.

KENA YAGA:

Au dau yaloca tu e liu, veivakasaurarataki, qai voravora. Ia e veisautaka vakadua na noqu bula na Vosa ni Kalou. Au sa gugumatua tiko ena gauna qo ena vunautaki ni itukutuku veivakacegui ena iVolatabu. Sa 23 na yabaki noqu vakaitavi voli ena cakacaka qori.

Au lai veivuke vakalailai ena valenivolavola ni iVakadinadina i Jiova e Mexico. Keirau sota e keri kei Claudia, e dua na goneyalewa lotu vaKarisito gugumatua, keirau qai vakamau ena 1999. Qori e dua na veivakalougatataki i Jiova vei au!

Keirau a veiqaravi ena ivavakoso ni vosa vagalu e Mexico, ena nodra vukei na didivara mera kilai Jiova. Oti keirau sureti me keirau lai veivakavulici ena iVolatabu e Belize. E sega ni levu sara na ka keirau taukena, ia keirau marautaka tiko na neirau veiqaravi. Keirau sega ni veivutunitaka na neirau toki i kea.

A tomana tale o tinaqu na nona vuli iVolatabu, qai papitaiso. Sa iVakadinadina i Jiova tale ga na tuakaqu, o watina, kei na tolu na luvedrau. Au a vunau vei ira eso na noqu itokani makawa, era sa qaravi Jiova tale ga ena gauna qo.

Ka ni rarawa nira sa mate eso na lewe ni noqu vuvale nira sega ni veisautaka na nodra itovo voravora. De dua au sa na tu tale ga ena ibulubulu ena gauna qo keu a sega ni veisau. Au vakavinavinaka vei Jiova ni solia vei au na gauna meu qaravi koya, meu veimaliwai kei ira na nona tamata era vosovoso qai yalovinaka ena nodra vukei au meu bulataka na ivakavuvuli vakaivolatabu.