Vola o Marika 10:1-52
-
Vakawati kei na veisere (1-12)
-
Vosavakalougatataki ira na gone o Jisu (13-16)
-
Nona taro na tagane vutuniyau (17-25)
-
Soli iko ena vuku ni Matanitu ni Kalou (26-31)
-
Tukuni tale na mate nei Jisu (32-34)
-
Kerekere nei Jemesa kei Joni (35-45)
-
Jisu e kedra ivoli na lewe levu (45)
-
-
Rai na mataboko o Patimeo (46-52)
10 E biubiu mai kea o Jisu me gole ina iyalayala kei Jutia ena tai ni Joritani, era baci soqoni yani vua e dua na ilala levu. Mani vakavulici ira+ me vaka na nona ivakarau.
2 Era qai lako vua na Farisi mera vakatovolei koya. Era tarogi koya se vakatarai vua na tagane me sereki watina se sega.+
3 E qai kaya vei ira o Jisu: “Na cava a vakarota vei kemuni o Mosese?”
4 Era kaya: “E vakatara o Mosese me volai vei yalewa na ivola ni veisere, me qai vakatalai koya.”+
5 E tukuna vei ira o Jisu: “Ena vuku ni nomuni lomaqa+ e vola kina vei kemuni na ivakaro qori.+
6 Ia mai na ivakatekivu, ‘A bulia na Kalou na tagane kei na yalewa.+
7 Oya na vuna ena biuti tamana kina kei tinana o tagane,+
8 me rau sa na lewe dua ga,’+ erau na sega ni lewe rua, erau sa na lewe dua ga.
9 O koya gona, na ka sa vauca vata na Kalou me kua ni tawasea na tamata.”+
10 Ni ratou curu tale i vale, eratou tarogi koya na tisaipeli ena vosa a cavuta.
11 E kaya vei ratou: “Na tagane e sereka na watina qai vakawati tale sa veibutakoci,+ sa cala o koya vei watina,
12 na yalewa tale ga e sereki watina qai vakawati tale e sa veibutakoci.”+
13 Era sa qai kauta yani vei Jisu na gone lalai me tarai ira, ia eratou qai cudru na tisaipeli.+
14 E sega sara ga ni taleitaka o Jisu na ka e raica, mani kaya vei ratou: “Laivi ira na gone lalai mera lako mai vei au, dou kua ni tarovi ira, ni o ira va qo e nodra na Matanitu ni Kalou.+
15 Au tukuna vakadodonu vei kemudou, ni o koya e sega ni ciqoma na Matanitu ni Kalou me vaka e dua na gonelailai, ena sega sara ni curu kina.”+
16 E keveti ira na gone o koya qai vosa vakalougatataki ira, e tabaki ira tale ga e ligana.+
17 Ni lako tiko e gaunisala, e cici yani vua e dua na tagane, e tekiduru e matana qai tarogi koya: “Qasenivuli Vinaka, na cava meu cakava meu bula tawamudu kina?”+
18 E kaya vua o Jisu: “Na cava o kaya kina niu vinaka? Sega tale ni dua e vinaka, na Kalou ga.+
19 O kila vinaka na ivunau, ‘Mo kua ni laba,+ mo kua ni veibutakoci,+ mo kua ni butako,+ mo kua ni bubului lasu,+ mo kua ni veidabui,+ mo rokovi tamamu kei tinamu.’”+
20 E kaya vua na tagane: “Qasenivuli, au se cakava makawa mai qori niu se itabagone.”
21 E raici koya o Jisu, dua na ka nona lomani koya qai kaya: “E dua na ka o se sega ni cakava: Lai volitaka na ka kece e tu vei iko, solia na kena ilavo vei ira na dravudravua, o na qai vakaiyau mai lomalagi, oti mo mai muri au.”+
22 Ia e gole yani ena rarawa ni rogoca na vosa ya, ni levu sara na nona iyau.+
23 E veiraiyaki o Jisu qai kaya vei ratou nona tisaipeli: “Ena dredre sara vei ira na vakailavo mera curu ina Matanitu ni Kalou!”+
24 Eratou kurabui na tisaipeli ena nona vosa. Mani kaya tale vei ratou: “Ragone, e ka dredre dina me dua e curu ina Matanitu ni Kalou!
25 Ena rawarawa cake vua na kameli me curuma na matanicula, ena dredre vua na vutuniyau me curu ina Matanitu ni Kalou.”+
26 Eratou sa qai kurabui ga vakalevu, eratou kaya vua:* “O cei ena bula rawa?”+
27 E raici ratou vakadodonu o Jisu qai kaya: “E dredre qo ena rai vakatamata, ia e sega ni vaka kina vua na Kalou, ni ka kece e rawarawa vua na Kalou.”+
28 E qai tukuna vua o Pita: “Raica! Keitou sa biuta na ka kece, keitou sa muri kemuni.”+
29 E qai kaya o Jisu: “Au tukuna vakadodonu vei kemudou, e sega ni dua e biuta na vale se tacina se ganena se tamana se tinana se luvena se tikiniqele ena yacaqu kei na itukutuku vinaka+
30 me na sega ni soli vua e 100 vakacaca ena gauna qo—na vale, na tacina, na ganena, na tinana, na luvena, na tikiniqele, na veivakararawataki+—ena bula tawamudu ena gauna se bera mai.*
31 Ia e levu era liu era na muri, o ira na muri era na liu.”+
32 Sa qai gole cake i Jerusalemi o Jisu kei ratou na nona tisaipeli, e liu tiko o koya. Eratou kurabui na tisaipeli, ia era rere na muri tiko mai. E baci kauti ratou vakatikitiki na le Tinikarua qai tukuna vei ratou na ka ena vakarau sotava:+
33 “Raica! Tou sa lako cake tiko qo i Jerusalemi, ena lai soli na Luve ni tamata vei ira na iliuliu ni bete kei ira na vunivola. Era na tauca vua na itotogi mate, era na soli koya vei ira na kai veimatanitu,
34 era na vakalialiai koya, kasivita, kuitataka, qai vakamatei koya, ia ena vakaturi ni oti e tolu na siga.”+
35 Rau mani lako vua o Jemesa kei Joni, na luvei Sepeti,+ rau kaya: “Qasenivuli, keirau vinakata moni cakava na ka ga keirau kerea vei kemuni.”+
36 E kaya vei rau: “Na cava drau vinakata meu cakava vei kemudrau?”
37 Rau sauma: “Ni vakadonuya mada me dua vei keirau e dabe ena yasamuni imatau, dua tale ena yasamuni imawi ni oni sa cabeta na nomuni itutu lagilagi.”+
38 Qai kaya vei rau o Jisu: “Drau sega ni kila na ka drau kerea. Vakaevei, e rawa ni drau gunu ena bilo au gunu tiko kina, se papitaiso ena papitaiso au papitaiso kina?”+
39 Erau kaya vua: “Keirau rawa.” Mani kaya vei rau o Jisu: “Drau na gunu ena bilo au gunu tiko kina, drau na papitaiso+ tale ga ena papitaiso au papitaiso kina.
40 Ia au sega ni lewa se o cei me dabe ena yasaqu imatau se yasaqu imawi, sa tiko ga o ira e vakarautaki me nodra.”
41 Ni ratou rogoca na vo ni le tini, eratou katakatataki rau sara ga o Jemesa kei Joni.+
42 Ia e kacivi ratou o Jisu qai kaya: “Dou kila nira dau vakacolasau na iliuliu ni veimatanitu qai dau voravora na nodra veiliutaki na vetaicake.+
43 Mo dou kua ni va ya, ia o koya e via turaga vei kemudou me nomudou dauveiqaravi,+
44 o koya e via liu, me nomudou tamata cakacaka.
45 Na Luve ni tamata mada ga e sega ni lako mai me qaravi, ia me veiqaravi ga,+ me solia tale ga na nona bula me kedra ivoli e le levu.”+
46 Eratou sa qai yaco i Jeriko. Ia ni ratou biuti Jeriko tale o Jisu kei ratou na nona tisaipeli kei na dua na ilala levu, e dabe toka e batinisala+ e dua na daukerekere mataboko, na yacana o Patimeo (na luvei Timeo).
47 Ni rogoca ni ya o Jisu na kai Nasareci, sa qai kailavaka yani: “Luvei Tevita,+ Jisu, ni lomani au!”+
48 Era karaci koya na tu e kea me tiko lo, ia sa qai rogolevu ga na domona: “Luvei Tevita, ni lomani au!”
49 E tu vakadua o Jisu qai kaya: “Kaciva mai.” Era mani kaciva na mataboko, ra kaya vua: “Kua ni leqa, tucake, sa kacivi iko tiko o Jisu.”
50 Sega ni bera nona luvata nona isulu e sau, e tucake, qai lako yani vei Jisu.
51 E kaya vua o Jisu: “Na cava o vinakata meu cakava vei iko?” E kaya na tagane mataboko: “Raponai,* meu bau rai mada ga.”
52 Mani kaya vua o Jisu: “Lako, sa vakabulai iko nomu vakabauta.”+ E rai ena gauna vata ga ya,+ mai muri Jisu sara yani e gaunisala.
iVakamacala e ra
^ Se rawa ni, “eratou veikayaka.”
^ Se “na itabagauna mai muri.” Raica na iVakamacala ni Vosa.
^ Kena ibalebale “Qasenivuli.”
