Keitou tiko vakavuvale e Tellancourt, e dua na koro ena vuaicake kei Varanise. E turaga ni Varanise o tamaqu, e marama ni Itali o tinaqu. Niu se qai yabaki walu keitou toki ina dua na vanua era vakaitikotiko kina na dravudravua ena saula kei Roma, e Itali. Dredre dina na bula e vale ena vanua qori. Rau dau veiba kaukaua na noqu itubutubu ena vuku ni leqa vakailavo.

Niu sa yabaki 15 e uqeti au o tinaqu meu kua ni tu ga e vale, meu lai qara eso na noqu ilala. Dau levu gona na gauna au sega ni tiko kina e vale. Sega ni dede au sa vakailala cala. Sotava sara kina e dua na turaga au nanuma ga ni vinaka nona ivalavala. E qai solia vei au na wainimate gaga, au mani vakayagataka ena noqu viavia qase. E totolo ga noqu coko ena vakayagataki vakatani ni wainimate gaga kei na ivalavala dukadukali. E levu na gauna e vakayacori vei au na ivalavala vakasisila. Au vakawalena vakalevu noqu bula; sega ni dua na ka vei au na bula se mate. Dua na ka noqu galili. Au saga meu vakamatei au niu se qai yabaki 16 niu gunuva na yaqona ni valagi kaukaua na whiskey au qai rika ena dua na drano. Au sega tu kina ni vakilai au me tolu na siga.

Au tekivu kauaitaka noqu bula, ia au ivalavala voravora, bula lawaki ca tale ga. Au dau volitaki au meu veiyacovi kei ira na so, ia au vakamatenitaki ira ena wainimate gaga, au qai butakoca na iyaya talei kece e tu ena nodra vale. Era dau vakayagataki au na isoqosoqo daubasulawa lelevu meu volitaki wainimate gaga e Itali. Levu na gauna era dau vaqaqai au na ovisa. E vaka me sa sega tu ni vakainaki na noqu bula, au sa sega mada ga ni lewa vinaka na ka au cakava. Ia au vakabauta ni tiko na inaki ni noqu bula. Au masuta kina na Kalou me solia tale mada vei au e dua na yabaki ni vakacegu kei na marau.

Au toki i Igiladi niu sa yabaki 24. Ena vuku ni noqu dau veimaliwai kei ira na volitaki wainimate gaga, e rivarivabitaki kina noqu bula. Ni bera niu biubiu, au lai sikovi tinaqu, au kidroa ni rau veitalanoa tiko ena iVolatabu kei na dua na turaga, o Annunziato Lugarà. * Au kilai koya vinaka ni dau basulawa,  au mani taroga se cava e cakava tiko e kea. E vakamacalataka sara na veisau e vakayacora ena nona bula me iVakadinadina i Jiova kina, e uqeti au meu yalataka niu na lai raici ira na iVakadinadina e Igiladi. Au mani vakadonuya, ia niu yaco e kea, au suka tale ina noqu bula e liu.

Dua na siga au sotava e dua na iVakadinadina ena tolonisala osooso e Igiladi ni soli Vale ni Vakatawa tiko kei na Yadra! Au mani kerea vua me keirau vuli iVolatabu niu nanuma lesu na noqu yalayala vei Annunziato.

Au kurabuitaka sara ga na veika au vulica kina. Kena ivakaraitaki, e uqeti au na veika e tukuni ena 1 Joni 1:9, me baleta na Kalou: “Ke da vakatusa noda ivalavala ca, ena vosota na noda ivalavala ca, ena vakasavasavataki keda tale ga.” E uqeti au sara ga na tikinivolatabu qori, niu kila ni dukadukali na noqu bula. Au tekivu gole ena nodra vale ni soqoni na iVakadinadina i Jiova, na Kingdom Hall. Era kidavaki au vakayalololoma. E uqeti au na nodra veivolekati meu lewena na nodra ivavakoso, ni vaka e dua na vuvale—qori sara ga na ka au dau diva tu ena dua na gauna balavu.

E rawarawa noqu biuta na wainimate gaga kei na ivalavala vakasisila, ia e dredre vakalevu noqu veisautaka na noqu itovo. Au raica ni dodonu meu dau veidokai, meu veinanumi tale ga. Au se saga tiko ga meu biuta eso na itovo makawa. Ena veivuke ga i Jiova au toso rawa kina vakayalo. Ni oti e ono na vula noqu vuli iVolatabu, au papitaiso meu iVakadinadina i Jiova ena 1997.

Oti noqu papitaiso, keirau vakamau kei Barbara, se qai iVakadinadina i Jiova vou tale ga. Nona raica e dua na noqu itokani na levu ni noqu veisau, e vuli iVolatabu sara kina. Rau qai iVakadinadina kei ganena ni toso na gauna. E vuli iVolatabu tale ga na taci buqu, sa yabaki 80 vakacaca, e papitaiso ni bera ni mate.

Au qase ni ivavakoso ena vanua au tiko kina, keirau veiqaravi vakaitalatala vakatabakidua kei watiqu, me keirau veivakavulici ena iVolatabu vei ira na vosa vakaItali e Lodoni. So na gauna dau vakayalolailaitaki au na noqu bula e liu, ia dua na vu ni veivakayaloqaqataki levu o Barbara. Au sa mai lewena tu qo e dua na vuvale au dau diva tu, dua tale ga na Tamaqu dauloloma me vaka ga na ka au dau vinakata voli. Au a kerea na Kalou me solia tale mada vei au e dua na yabaki ni vakacegu kei na marau, ia e levu tale na ka e solia mai!