ULUTAGA LEVU | SA VOLEKA NA ICAVACAVA?

“Na iCavacava”—Kena iBalebale?

SARAVA/ROGOCA

Cava o dau vakasamataka ni tukuni “Sa voleka na icavacava!”? O raitayaloyalotaka nona vunau tiko e dua na italatala ena domoilevu qai kaukaua nona itautau ni vosa mai na tevali? Se dua na qase vakumi e duri toka ena kona ni gaunisala, e vakaisulu yara balavu, e vau na wa e tolona, qai taura tu na ivakatakilakila ni itukutuku ni veivakarusai? So era kauai nira vakasamataka na ituvaki va qori, so tale era vakatitiqa se lasa vei ira.

E kaya na iVolatabu: “Sa na qai yaco na icavacava.” (Maciu 24:14) E vakatokai tale ga me “siga levu ni Kalou” kei na “Amaketoni.” (Vakatakila 16:14, 16) E levu sara nodra ivakamacala veicalati qai vereverea na veimatalotu me baleta na ulutaga qo. Ia e matata na ka e vakamacalataka na iVolatabu me baleta na icavacava—na ka ena yaco kina, kei na ka ena sega ni yaco. Vakamatatataki ena Vosa ni Kalou meda kila ke sa voleka na icavacava se sega. Uasivi sara ni vakavulici keda ena sala meda bula kina! Meda vakadodonutaka mada eso na rai cala kei na ibalebale dina ni icavacava. Na cava sara mada na ibalebale ni “icavacava” e tukuni ena iVolatabu?

CAVA ENA SEGA NI YACO ENA ICAVACAVA

ENA SEGA NI VAKARUSAI KINA O VURAVURA.

E kaya na iVolatabu: “Sa vakataudeitaka na yavu ni vuravura [na Kalou], ena sega ni yavalati mai na kena vanua me tawamudu, io me tawamudu.” (Same 104:5) Veivakadeitaki na tikinivolatabu qo kei na so tale ni na sega sara ga ni vakarusa na vuravura na Kalou se vakatara me rusa!—Dauvunau 1:4; Aisea 45:18.
ENA SEGA NI YACO ENA DUA NA GAUNA TAWALOKUCI.

Tukuni ena iVolatabu ni sa lokuca tu na Kalou na gauna ena yaco kina na icavacava, kena ibalebale ni tiko na kena gauna. E kaya: “E sega ni dua e kila na siga ya kei na kena aua, era sega ni kila na agilosi mai lomalagi, e sega ni kila na Luvena, e kila duadua ga o Tamana. Dou vakatawa, dou yadra tiko, ni dou sega ni kila na gauna lokuci.” (Marika 13:32, 33) Matata kina ni tiko na nona “gauna lokuci” na Kalou (o ‘Tamada’) me baleta na icavacava.
E SEGA NI UQETA NA TAMATA SE KA ERA LULUTU MAI MALIWALALA.

Ena tekivu vakacava na icavacava? E kaya na Vakatakila 19:11: “Au raica ni tadola na lomalagi, au raica sara e dua na ose vula. O koya e vodo tiko kina e yacana o Yalodina kei na Daudina.” E tomana na tikina e 19: “Au qai raica na manumanu kila, na tui kei vuravura, kei na nodra mataivalu nira soqoni vata mera vala kei koya e vodo ose tiko kei na nona mataivalu.” (Vakatakila 19:11-21) Levu na ka e vakamacalataki qori era ivakatakarakara ga, ia qo na ka eda sa kila tiko: Ena tala mai na Kalou na nona mataivalu agilosi me vakarusai ira na nona meca.

Na ka e volai tu ena iVolatabu me baleta na icavacava e sega ni itukutuku ca, e itukutuku vinaka ga

KA ENA YACO ENA ICAVACAVA

ENA VAKAWABOKOTAKI KINA NA MATANITU VAKATAMATA.

E kaya na iVolatabu: “Ena vakarautaka na Kalou ni lomalagi e dua na matanitu ena sega sara ni vakarusai. Ena sega ni soli na matanitu qo vua e dua tale na tamata. Ena vurumemeataka, ena vakawabokotaki ira na veimatanitu kece qori, ena tu ga me tawamudu.” (Taniela 2:44) Me vaka sa tukuni oti, nira na vakarusai “na tui kei vuravura, kei na nodra mataivalu” nira “soqoni vata mera vala kei koya e vodo ose tiko kei na nona mataivalu.”—Vakatakila 19:19.
ENA VAKAOTI KINA NA IVALU, ITOVO KAUKAUA KEI NA IVALAVALA TAWADODONU.

“Ena mai vakaotia [na Kalou] na ivalu e vuravura taucoko.” (Same 46:9) “Nira na tiko ga e vuravura na yalododonu, ena tiko dei kina na tawacala. O ira na tamata ca era na muduki tani e vuravura, kei ira na dauveivakaisini era na kau tani mai kina.” (Vosa Vakaibalebale 2:21, 22) “Raica! Au sa vakavoutaka na ka kece.”—Vakatakila 21:4, 5.
ENA RUSA KINA O LOTU NI SEGA NI DOKA NA KALOU SE VAKACEGUI KEDA.

“O ira na parofita era parofisaitaka na ka lasu, kei ira na bete, era lewa ena nodra kaukaua ga. . . . Na cava oni na cakava ni yaco mai na icavacava?” (Jeremaia 5:31) “Levu era na tukuna vei au ena siga ya, ‘Turaga, Turaga, keimami a sega ni parofisai ena yacamuni, qai vakasavi ira na timoni ena yacamuni, keimami cakava tale ga e levu na cakacaka veivakurabuitaki ena yacamuni?’ Au na qai tukuna vei ira: ‘Au sega sara ga ni kilai kemuni! Ni lako tani, o kemuni na daucaka ca!’”—Maciu 7:21-23.
ERA NA RUSA KINA O IRA NA TOKONA RA QAI MURIA TIKO GA NA IVAKARAU NI BULA NIKUA.

E kaya o Jisu Karisito: “Qo na yavu ni veilewai: ni sa lako mai vuravura na rarama, e taleitaka ga na tamata na butobuto sega ni rarama, ni torosobu na nodra ivalavala.” (Joni 3:19) A tukuni taumada ena iVolatabu e dua na veivakarusai e vuravura ena gauna a bula tiko kina na turaga yalodina o Noa. “E vakarusai kina na vuravura ena gauna ya ni luvuci ena wai. Ia ena vosa vata ga ya e maroroi kina na lomalagi kei na vuravura ni gauna qo me qai vakamai, e vakalaivi tale ga me yacova na siga ni lewa mera vakarusai kina o ira na sega ni doka na Kalou.”—2 Pita 3:5-7.

Na “siga ni lewa mera vakarusai kina” sa roro tiko mai qo e vakatauvatani kei na veivakarusai a yaco e “vuravura” ena gauna i Noa. Na cava a vakarusai? A sega ni rusa noda vuravura; era “vakarusai” ga o ira na “sega ni doka na Kalou,” era kena meca. Era na vakarusai tale ga va qori o ira na meca ni Kalou ena nona “siga ni lewa” sa roro tiko mai qo. Ia era na bula na itokani ni Kalou, me vakataki Noa ga kei na nona vuvale.—Maciu 24:37-42.

Vakasamataka mada na totoka ni vuravura qo ni sa vagalalataki ira kece na daucaka ca na Kalou! Matata vinaka na ka e volai tu ena iVolatabu me baleta na icavacava e sega ni itukutuku ca, e itukutuku vinaka ga. De o na rairai vaqaqa: ‘E tukuna na iVolatabu na gauna ena yaco kina? Sa voleka? Cava meu cakava meu bula kina?’