Raica sara na lewena

Ena Vakarusai na Vuravura?

Ena Vakarusai na Vuravura?

Kena isau vakaivolatabu

Sega. Ena sega ni vakarusai, vakamai se sosomitaki na vuravura qo. E kaya na iVolatabu na Kalou e bulia na vuravura me tawa me tawamudu.

  • “O ira na yalododonu era na taukena na vuravura, era na qai bula tawamudu kina.”​—Same 37:29.

  • “Ena vakataudeitaka na yavu ni vuravura o koya [na Kalou], ena sega ni yavalati mai na kena vanua me tawamudu, io me tawamudu.”​—Same 104:5.

  • “Na vuravura ena tu ga me tawamudu.”​—Dauvunau 1:4.

  • “O koya e bulia na vuravura, na Dauveibuli e vakataudeitaka . . . sega ni bulia me lala, e bulia ga me tawa.”​—Aisea 45:18.

Era na vakacacana vakadua na tamata na vuravura?

Ena sega ni vakalaiva na Kalou me vakarusa vakadua na tamata na vuravura ena ka ni veivagagai, veivaluvaluti, se so tale na ka. Ia ena “vakawabokotaki ira . . . na vakarusai vuravura tiko.” (Vakatakila 11:18) Ena cakava vakacava qori?

Na Kalou ena sosomitaka na matanitu vakatamata e sega ni rawa ni taqomaka na vuravura ina dua na matanitu uasivi vakalomalagi. (Taniela 2:​44; Maciu 6:​9, 10) Na matanitu qori ena liutaka na Luve ni Kalou o Jisu Karisito. (Aisea 9:​6, 7) Ni se bula i vuravura o Jisu, e vakaraitaka na kaukaua ena nona lewa na veika buli. (Marika 4:​35-​41) Ni Tui ni Matanitu ni Kalou o Jisu, ena lewa na vuravura kei na veika buli kece. Ena bulia tale se vakavinakataka na ituvaki kei vuravura me vaka ga na were o Iteni.​—Maciu 19:28; Luke 23:43.

E vakavuvulitaka na iVolatabu ni na vakamai na vuravura?

Sega. Na rai cala qori e dau basika ni nanumi cala na 2 Pita 3:7, e kaya: “E maroroi kina na lomalagi kei na vuravura ni gauna qo me qai vakamai”. Dikeva mada e rua na tikina ena vukei keda meda kila vinaka na ibalebale ni veivosa qori:

  1. E vakayagataka na iVolatabu na vosa “lomalagi,” “vuravura,” kei na “bukawaqa”se kama me dusia e levu na ka. Kena ivakaraitaki, e kaya na Vakatekivu 11:1: “E dua ga nodra vosa e vuravura taucoko.” Na “vuravura” e cavuti qo e vakaibalebaletaka na kawatamata.

  2. Na veitikina wavolita ni 2 Pita 3:7 e dusia na ibalebale ni lomalagi, vuravura, kei na bukawaqa e tukuni tiko i kea. Na tikina e  5 kei na 6 e tukuni kina na veika e yaco ina Waluvu ena siga i Noa. Ena siga ya e vakarusai na vuravura makawa, e tu ga na vuravura qele qo. Na Waluvu qori e vakarusai ira na tamata voravora, se “vuravura.” (Vakatekivu 6:​11) E vakarusai talega e dua na mataqali “lomalagi,” o ira na tamata era liutaka na kawatamata. Koya gona era vakarusai na tamata, sega ni vuravura qele. E ratou bula ga o Noa kei na nona vuvale, ratou tawana tale ga na vuravura ni oti na Waluvu.​—Vakatekivu 8:​15-​18.

Me vaka ga na wai ena gauna ni Waluvu na veivakarusai se “vakamai,” ena 2 Pita 3:7 era na vakarusai na tamata ca, sega ni vuravura qele. E yalataka o Jiova na “lomalagi vou kei na vuravura vou” era na “tiko kina na yalododonu.” (2 Pita 3:​13) Na “vuravura vou” se na ilawalawa tamata vou, ena liutaki ira na “lomalagi vou”se veiliutaki vou oya na Matanitu ni Kalou. Ena parataisi na vuravura, qai vakilai na vakacegu ena veiliutaki ni Matanitu ni Kalou.​—Vakatakila 21:​1-4.