Raica sara na lewena

Gauna Cava ena Yaco Kina na iCavacava?

Gauna Cava ena Yaco Kina na iCavacava?

Kena isau vakaivolatabu

Me kilai na gauna ena rusa kina na vuravura e vinaka meda kila rawa e liu na ibalebale ni “vuravura” e tukuni tiko ena iVolatabu. Na vosa vaKirisi koʹsmos e vakadewataki me “vuravura,” levu na gauna e dau vakaibalebaletaki vei ira na kawatamata vakabibi o ira era sega ni kila na Kalou kei na nona inaki. (Joni 15:18, 19; 2 Pita 2:5) Ia so na gauna e vakaibalebaletaki na koʹsmos ina ka era cakava na tamata.​—1 Korinica 7:​31; 1 Joni 2:​15, 16. *

Na cava na “icavacava ni veika vakavuravura”?

Na vosa “icavacava ni veika vakavuravura” e laurai ena levu na vakadewa ni iVolatabu ni vakayagataki me “ivakataotioti ni veika vakavuravura,” se “cava na itabagauna qo.” (Maciu 24:3; English Standard Version) Na matavosa qori e vakaibalebaletaki ina icavacava ni veiliutaki vakatamata sega ni kena vakarusai na vuravura qo se o ira na kawatamata.​—1 Joni 2:​17.

E kaya na iVolatabu “nira na vakarusai laivi na daucaka ca” me rawa nira marautaka na bula ena vuravura na tamata vinaka. (Same 37:​9-​11) Ena yaco na veivakarusai qori donuya na “veivakararawataki levu” ena ivalu na Amaketoni.​—Maciu 24:21, 22; Vakatakila 16:14, 16.

Ena yaco ninaica na icavacava ni veika vakavuravura qo?

E kaya o Jisu: “E sega ni dua e kila na siga ya kei na kena aua, era sega ni kila na agilosi mai lomalagi, e sega ni kila na Luvena, e kila duadua ga o Tamana.” (Maciu 24:36, 42) E tukuna tale ga o Jisu ni na yaco vakidacala na icavacava “ena aua dou sega ni namaka.”​—Maciu 24:44.

Eda sega ni kila na siga kei na aua ena yaco kina na icavacava, ia e vakaraitaka o Jisu eso na “ivakatakilakila” se na ka ena yaco e vakaraitaka ni sa voleka sara na ivakataotioti ni veika vakavuravura. (Maciu 24:​3, 7-​14) E tukuna tale ga na iVolatabu nida bula tu qo ena “gauna ni icavacava” kei na “iotioti ni veisiga.”​—Taniela 12:4; 2 Timoci 3:​1-5.

Vakacava ena vo tale tiko eso na ka ni oti na icavacava ni veika vakavuravura?

Io, ena tu ga na vuravura qo. E kaya na iVolatabu ni na “sega ni yavalati mai na kena vanua me tawamudu, io me tawamudu.” (Same 104:5) Era na tawana na vuravura na tamata me vaka e yalataka na iVolatabu: “O ira na yalododonu era na taukena na vuravura, era na qai bula tawamudu kina.” (Same 37:29) Sa na qai vakalesuya mai na Kalou na nona inaki taumada:

^ para. 3 Na vosa vaKirisi ai·onʹ e vakadewataki tale ga ena so na iVolatabu me “vuravura.” Ena ikotokoto qori e tautauvata na ai·onʹ kei na koʹsmos ni vakaibalebaletaka na veika era cakava na tamata.