Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

O Bau Kila?

O Bau Kila?

E tokona na itukutuku ena iVolatabu na ka e kune ena vakekeli?

Tui Asiria o Sarikoni II, e cavuti ena Aisea 20:1

E vakamacalataki ena ivola na Biblical Archaeology Review, ni vakadinadinataki ena ka era kunea na daunivakekeli nira a bula dina e “rauta ni 50” era cavuti ena iVolatabu vakaIperiu. Okati tiko ena iwiliwili qori e 14 na tui Juta kei Isireli, so era kilai levu me vakataki Tevita kei Esekaia, so tale e sega, me vakataki Minemi kei Pika. Wili tale tiko ga kina e 5 na Fero, kei na 19 na tui ni Asiria, Papiloni, Moapi, Perisia, kei Siria. Eso tale era cavuti ena iVolatabu kei na itukutuku ni vakekeli, sega ni o ira ga na vuvale vakatui. Era cavuti tale ga kina na bete levu, vunivola, kei na so tale na ivakalesilesi.

E tomana na ivola qori nira “duavata e levu na dauvakadidike” ena kena vakadeitaki na yaca kece era kune ena vakekeli. E cavuti tale ga ena iVolatabu vaKirisi vaKarisito e levu era bula ena gauna makawa, kune ena vakekeli e levu na ivakadinadina nira a bula ena dua na gauna—me vakataki Eroti, Ponitio Pailato, Tiperiu, Kaiafa, kei Serikiu Paula.

Gauna cava era yali kina na laione ena vanua vakaivolatabu?

iYaloyalo e ceuti ena biriki ni lalaga e Papiloni makawa

Sa sega na laione ena vanua vakaivolatabu nikua, ia era kila na manumanu qo na dauvolaivolatabu nira cavuti vaka150 vakacaca ena iVolatabu. Levu ga na gauna era cavuti vakaivakatakarakara ena iVolatabu, so tale na gauna era volaitukutukutaki nira bula dina. Kena ivakaraitaki nodratou vakamate laione o Samisoni, ­Tevita kei Penaia. (Dauveilewai 14:5, 6; 1 Samuela 17:34, 35; 2 Samuela 23:20) Era veivakamatei tale ga na laione.1 Tui 13:24; 2 Tui 17:25.

Ena gauna makawa e kune e dua na mataqali laione na Asi­at­ic lion (na Panthera leo persica). Kune vakalevu mai Esia Lailai kei Kirisi me yaco i Palesitaina, Siria, Mesopotemia, kei na vuaira kei Idia. Nira manumanu mareqeti ra qai rerevaki, e laurai kina vakalevu ena nodra droini makawa mai na Tokalau kei Esia. Ceuti tale ga na kedra droini na laione me iukuuku ena vanua era dau taubale kina e Papiloni makawa.

Era vakasasataki ira na laione e Palesitaina na mataivalu ni lotu donuya na icavacava ni ika12 ni senitiuri G.V. Era rairai yali yani na laione ena vanua qori ni oti toka ga na yabaki 1300. Ia e volaitukutukutaki nira se kune tiko ga e Mesopotemia kei Siria me yacova na ika19 ni senitiuri, vaka kina e Irani kei Iraki ena itekitekivu ni ika20 ni senitiuri.