Raica sara na lewena

Na Website ni iVakadinadina i Jiova

Digia na Vosa vakaViti

Na iValu Vakacava na Amaketoni?

Na iValu Vakacava na Amaketoni?

Kena iSau Vakaivolatabu

Qo na iotioti ni ivalu era na vala kina kei na Kalou na veimatanitu e vuravura. Era saqata na Kalou ena gauna qo na veimatanitu qori kei ira na tokona nira sega ni via vakarorogo ena nona veiliutaki. (Same 2:2) Na ivalu qo ena vakawabokotaka na veiliutaki vakatamata.​—Taniela 2:44.

E laurai ga vakadua ena iVolatabu na vosa “Amaketoni” ena Vakatakila 16:16. E parofisaitaki kina nira na soqoni na “tui kei vuravura” ena “vanua e vakatokai ena vosa vakaIperiu o Amaketoni,” na “ivalu ni siga levu ni Kalou Kaukaua Duadua.”​—Vakatakila 16:14.

O cei ena vala ena Amaketoni? Ena liutaka o Jisu Karisito na mataivalu vakalomalagi me ravuti ira na meca ni Kalou. (Vakatakila 19:11-16, 19-21) Qo o ira na saqata na veiliutaki ni Kalou ra qai beci koya.​—Isikeli 39:7.

Ena yaco ga ena Tokalau e Loma na Amaketoni? Ena sega ni yaco ga ena dua na vanua, ena roboti vuravura taucoko.​—Jeremaia 25:32-34; Isikeli 39:17-20.

Na Amaketoni e vu mai na vosa vakaIperiu Har Meghiddohn’, e kena ibalebale na “Ulunivanua o Mekito.” A dua na korolevu e Isireli makawa o Mekito. E tukuni ena itukutuku makawa ni levu na ivalu vakairogorogo e vakayacori e Mekito, wili kina na kena e volai ena iVolatabu. (Dauveilewai 5:19, 20; 2 Tui 9:27; 23:29) Ia e sega ni rawa ni dusia e dua na vanua dina e volekati Mekito. E sega e kea na ulunivanua levu, ena sega tale ga ni rauti ira kece na via valuta na Kalou na Buca o Jesirieli. Koya gona na Amaketoni ena tarai vuravura taucoko, nira na soqoni vata ena iotioti ni gauna na veimatanitu mera saqata na veiliutaki ni Kalou.

Na cava ena yaco ena ivalu na Amaketoni? Eda sega ni kila ena veivakarusai vakacava na Kalou. Ena rawa ni vakayagataka na ucaqereqere, uneune, uca bi, bukawaqa kei na sulifure, tibi ni liva, kei na matedewa. Qori na ka e dau vakayagataka ena veigauna sa oti. (Jope 38:22, 23; Isikeli 38:19, 22; Apakuki 3:10, 11; Sakaraia 14:12) Ia era na veivakamatei ga vakataki ira eso na meca ni Kalou nira vakasesei, era na qai kila ni Kalou ga e valuti ira tiko.​—Isikeli 38:21, 23; Sakaraia 14:13.

Ena vakarusa na vuravura na Amaketoni? Ena sega ni rusa na vuravura qele eda tiko kina, ni noda itikotiko tudei. (Same 37:29; 96:10; Dauvunau 1:4) Ena sega ni vakarusa na tamata kece na Amaketoni, ia ena bula kina “e dua na isoqosoqo levu” era lewena na tamata ni Kalou.​—Vakatakila 7:9, 14; Same 37:34.

Na vosa “vuravura” e volai ena iVolatabu e dusi ira tale ga na tamata ivakarau ca era saqata na Kalou. (1 Joni 2:15-17) Ena vakasama gona qo ena vakarusa kina na Amaketoni na “vuravura.”​—Maciu 24:3, Ai Vola Tabu.

Ena yaco ni naica na Amaketoni? Ni vakamacalataka tiko o Jisu na “veivakararawataki levu” ena tini ena Amaketoni, e kaya: “E sega ni dua e kila na siga ya kei na kena aua, era sega ni kila na agilosi mai lomalagi, e sega ni kila na Luvena, e kila duadua ga na Tamana.” (Maciu 24:21, 36) Ia e tukuni ena iVolatabu ni na yaco na Amaketoni donuya nona tekivu tiko tawarairai o Jisu ena 1914.​—Maciu 24:37-39.