Vola o Marika 13:1-37
13 Ni biuta mai na valenisoro o Jisu e qai kaya vua e dua nona tisaipeli: “Qasenivuli, raica mada na veivatu totoka qo kei na veivale qo!”+
2 Ia e kaya vua o Jisu: “O sa raica na vale lelevu qo? Era na sega ni veitaqataqai tale tiko va ya na vatu, era na talaraki kece.”+
3 Ni dabe toka ena Ulunivanua ni Veiolive qai raica mai na valenisoro, eratou lai tarogi koya lo o Pita, Jemesa, Joni, kei Adriu:
4 “Ni tukuna mada vei keitou se na yaco ninaica na veika qo, na cava tale ga na ivakatakilakila ni sa voleka na ivakataotioti ni ka kece qo?”+
5 E mani kaya vei ratou o Jisu: “Dou qarauna me kua ni dua e vakacalai kemudou.+
6 E levu era na vakayagataka na yacaqu ra qai kaya, ‘O yau na Karisito,’ era na vakacalai kina e levu.
7 Kena ikuri, ni dou rogoca na ivalu kei na itukutuku ni ivalu, dou kua ni kidroa, era na yaco mada na ka kece qo, ia e se bera na icavacava.+
8 “Era na veivaluvaluti na veivanua kei na veimatanitu,+ ena yaco na uneune ena levu na vanua, ena vakilai tale ga na leqa ni kakana.+ Qo era itekitekivu ga ni veika rarawa.+
9 “Dou qarauni kemudou vinaka. Era na kauti kemudou ina mataveilewai,+ dou na vakanakuitataki e valenilotu,+ dou na kau tale ga ina matadra na kovana kei na tui ena vukuqu, mo dou vakadinadina kina vei ira.+
10 Ena vunautaki tale ga e liu na itukutuku vinaka ina veimatanitu kece.+
11 Ia ni dou kau mo dou lai lewai, dou kua ni lomaleqataka na ka mo dou tukuna, dou tukuna ga na ka e tukuni vei kemudou ena gauna ya, dou na sega ni vosa, ena vosa ga ena vukumudou na yalo tabu.+
12 O tuakana ena vakavuna na mate i tacina, o tama ena vakavuna na mate i luvena, o ira na gone era na saqati ira na nodra itubutubu, era na vakavuna tale ga na nodra mate.+
13 Era na cati kemudou na tamata kece ena vuku ni yacaqu.+ Ia o koya e vosota me yacova na icavacava+ ena vakabulai.+
14 “Ia ni dou raica ni sa tiko ena vanua e sega ni dodonu me tu kina na ka vakasisila e dauveivakarusai+ (me yalomatua o koya e wilika qo me rawa ni kila na kena ibalebale), mera dro sara ina veiulunivanua o ira na tiko e Jutia.+
15 O koya e tiko e delanivale me kua tale ni lako sobu ina nona vale se me curu i loma me kauta mai kina e dua na ka,
16 o koya tale ga e tiko ena iteitei me kua ni suka me lai kauta na nona isulu e sau.
17 Era na rarawa na yalewa bukete kei ira na vakasucu gone ena siga ya!+
18 Dou masulaka tiko me kua ni yaco qo ena vulaililiwa,
19 ni na qai yaco na veivakararawataki+ ena ivakatagedegede e sega ni bau vakilai vakadua me tekivu mai na nona bulia na vuravura na Kalou, ena sega tale ga ni yaco e muri.+
20 O koya gona, ke sega ni vakalekalekataka o Jiova* na gauna ya, ena sega ni dua e bula rawa, ia ena vakalekalekataka na gauna+ ena vukudra na nona digitaki.
21 “Ke dua e qai kaya vei kemudou, ‘Raica! Sa tu qo na Karisito,’ ‘Raica! Sa tu ya o koya,’ dou kua ni vakabauta.+
22 Era na basika mai na Karisito lasu kei na parofita lasu+ mera vakaraitaka eso na cakamana kei na ka e veivakurabuitaki mera veivakacalai kina, ke rawa, o ira mada ga na digitaki.
23 O koya gona, dou qarauni kemudou.+ Au sa vakasalataki kemudou rawa qo.
24 “Ena gauna ya, ni oti na veivakararawataki ya, ena qai vakabutobutotaki na matanisiga, ena sega ni cila tale ga na vula,+
25 era na lutu mai lomalagi na kalokalo, era na yavavala na veika kaukaua ni lomalagi.
26 Era na qai raica na Luve ni tamata+ ni lako mai ena o ena lewa cecere kei na lagilagi.+
27 Ena qai talai ira na agilosi, ena kumuni ira vata na nona digitaki mai na matanicagi vava, mai na iyalayala kei vuravura ina iyalayala kei lomalagi.+
28 “Dou vuli mai na ivakatautauvata ni vunilolo: Ni rovu mai na tabana qai belebele na drauna, dou kila sara ni sa voleka na vulaikatakata.+
29 Ni dou raica tale ga nira sa yaco na ka kece qo, dou kila ni sa voleka o koya, sa tu sara ga e katuba.+
30 Au tukuna vakadodonu vei kemudou, ena sega ni takali na itabatamata qo ena yaco mada e liu na ka kece qo.+
31 Ena takali o lomalagi kei vuravura,+ ia na noqu vosa ena sega ni takali.+
32 “E sega ni dua e kila na siga ya kei na kena aua, era sega ni kila na agilosi mai lomalagi, e sega ni kila na Luvena, e kila duadua ga o Tamana.+
33 Dou vakatawa, dou yadra tiko,+ ni dou sega ni kila na gauna lokuci.+
34 E vaka e dua na turaga e biuta nona vale me lako i vanuatani qai lesi ira nona dauveiqaravi mera lewa nona vale+ kei na itavi mera dui qarava. Oti sa qai vakaroti koya na ivakatawa ni katuba me yadra tiko.+
35 Mo dou yadra tiko gona ni dou sega ni kila na gauna ena lako mai kina na itaukeinivale,+ de lako mai ena yakavi se na bogi se ni bera na bogilevu se matakacaca,*+
36 me kua kina ni lako mai vakasauri o koya qai raica ni dou moce tu.+
37 Na ka ga au kaya vei kemudou au kaya vei ira kece: Dou yadra tiko.”+
