Ibuot 31

Mme Utom Jehovah—Ẹkponi Ẹnyụn̄ Ẹnyene Ndyọ

N̄kukụt 10—Ediyarade 15:1–16:21

Ibuotikọ: Jehovah ke temple esie; ẹn̄wan̄a eso iyatesịt esie itiaba ẹduọk ke isọn̄

Ini edisu: 1919 osịm Armageddon

1, 2. (a) Ewe ọyọhọ idiọn̄ọ ita ke John obụk? (b) Ewe utom mme angel ke mme asan̄autom Jehovah ẹkefiọk ke anyanini?

 N̄WAN oro amande eyen erenowo! Akwa dragon oyom ndita eyen oro! Idiọn̄ọ iba eke heaven ẹmi ẹwụtde ata in̄wan̄în̄wan̄ ke Ediyarade ibuot 12, ẹnam nnyịn ifiọk ite ke akani eneni emi abuanade Mfri an̄wan Abasi ye Satan ye mfri esie eke mme demon ke ekpere ata utịt esie. Ke ndinam mme idiọn̄ọ ẹmi an̄wan̄a, John ọdọhọ ete: “Ekem akamba idiọn̄ọ owụt idem ke enyọn̄ . . . Idiọn̄ọ efen onyụn̄ owụt idem.” (Ediyarade 12:1, 3, 7-12) Idahaemi John obụk aban̄a ọyọhọ idiọn̄ọ ita ete: “Ekem n̄kụt idiọn̄ọ en̄wen ke enyọn̄, akamba ye utịbe, angel itiaba, ẹmi ẹnyenede akpatre ufen itiaba, koro iyatesịt Abasi ọyọhọ ama ke mmọ [“koro otode ke mmọ ẹmeda iyatesịt Abasi ẹsịm utịt,” NW].” (Ediyarade 15:1) Ọyọhọ idiọn̄ọ ita emi n̄ko enyene akpan n̄kpọ oro ọwọrọde ọnọ mme asan̄autom Jehovah.

² Tịmfiọk mme akpan utom ẹmi mme angel ẹfiakde ẹnyene ke ndinam uduak Abasi mma. Ke anyanini mme asan̄autom Jehovah ẹma ẹfọfiọk akpanikọ emi. Kamse, ke ndausụn̄ odudu spirit Abasi andiwet psalm eke eset ama akam etịn̄ ikọ ọnọ mme utọ angel oro, akpakde mmọ ete: “Ẹtoro Jehovah, mbufo mme angel esie, ẹmi ẹdahade uko, ẹmi ẹnamde uyo esie, ẹnyụn̄ ẹkopde uyo ikọ esie.” (Psalm 103:20) Idahaemi, ke obufa edinam emi, ẹnọ mme angel utom ndin̄wan̄a akpatre ufen itiaba oro nduọk.

3. Nso idi ufen itiaba oro, ndien nso ke edin̄wan̄a mmọ nduọk owụt?

³ Mme ufen ẹmi ẹdi nso? Ukem nte uyo  ukotowo itiaba oro, mmọ ẹdi ndot-ndot etop ubiomikpe emi ẹtan̄ade nte Jehovah esede nsio nsio ikpehe ererimbot emi ẹnyụn̄ ẹdụride owo utọn̄ ẹban̄a akpatre utịp ubiereikpe esie. (Ediyarade 8:1–9:21) Edin̄wan̄a mmọ nduọk anyan ubọk owụt edinọ mme ubiereikpe oro, ke ini ẹsobode mbon oro ẹdide ntak iyatesịt Jehovah ke usen ikan̄ ikan̄ iyatesịt esie. (Isaiah 13:9-13; Ediyarade 6:16, 17) Ntem, otode ke mmọ “ẹmeda iyatesịt Abasi ẹsịm utịt.” Edi mbemiso etịn̄de aban̄a edin̄wan̄a ufen ẹmi nduọk, John etịn̄ ọnọ nnyịn aban̄a ndusụk owo ẹmi ufen ẹmi mîditụkke idiọk idiọk. Sia ẹkesịnde ndibọ idiọn̄ọ unam emi, mme anam-akpanikọ ẹmi ẹkwọ ikwọ itoro ẹnọ Jehovah nte mmọ ẹtan̄ade usen usiene esie.—Ediyarade 13:15-17.

Ikwọ Moses ye eke Eyenerọn̄

4. Nso iwọrọ iwụt John idem idahaemi?

⁴ Idahaemi n̄wọrọnda n̄kpọ ndise ọwọrọ owụt John idem: “Ekem n̄kụt se ibietde inyan̄ glass emi abuahade ye ikan̄; ye mmọ emi ẹkekande ẹbọhọ unam oro ye mbiet esie ye ibat enyịn̄ esie, nte ẹdade ke mben inyan̄ glass oro, ye harp Abasi ke ubọk mmọ.”—Ediyarade 15:2.

5. “Inyan̄ glass emi abuahade ye ikan̄” ada aban̄a nso?

⁵ “Inyan̄ glass” emi edi ukem ye enyeemi John ekebemde iso okụt, odude ke iso ebekpo Abasi. (Ediyarade 4:6) Enye ebiet “n̄kpọdiọhọ mmọn̄” (aban̄ mmọn̄) eke temple Solomon, emi mme oku ẹkesikoide mmọn̄ ndida nyet idemmọ. (1 Ndidem 7:23) Enye ke ntem ada ediye ediye aban̄a “mmọn̄,” oro edi, Ikọ Abasi, emi Jesus adade eyet esop oku eke mme Christian oro ẹyetde aran. (Ephesus 5:25, 26; Mme Hebrew 10:22) Inyan̄ glass emi ‘abuaha ye ikan̄,’ owụtde nte ke ẹdomo mbon ẹmi ẹyetde aran mi ẹnyụn̄ ẹnam mmọ ẹsana nte mmọ ẹsụkde ibuot ẹnọ n̄kokon̄ edumbet oro ẹnịmde ẹnọ mmọ. Adianade do, enye  anam nnyịn iti ite ke Ikọ Abasi n̄ko ọdọn̄ọ mme ikan̄ ikan̄ ikọ ubiereikpe ọnọ mme asua esie. (Deuteronomy 9:3; Zephaniah 3:8) Ẹwụt ndusụk ikan̄ ikan̄ ubiereikpe ẹmi ke akpatre ufen itiaba oro ẹyomde ndin̄wan̄a nduọk mi.

6. (a) Mmanie ẹdi mbon ikwọ ẹmi ẹdade ke iso inyan̄ glass eke heaven, ndien nnyịn isan̄a didie ifiọk? (b) Ke nso usụn̄ ke mmọ ‘ẹkan’?

⁶ Akpanikọ oro nte ke n̄kpọdiọhọ mmọn̄ oro ke temple Solomon okodu ọnọ mme oku ndida nnam n̄kpọ omowụt nte ke mbon ikwọ oro ẹdade ke iso inyan̄ glass eke heaven ẹdi otu mme oku. Mmọ ẹkama “harp Abasi” ke ubọk, ndien nnyịn ke ntre imabuan mmọ ye mbiowo 24 ye owo 144,000 oro, sia otu ẹmi n̄ko ẹkwọde ikwọ ye mbre harp. (Ediyarade 5:8; 14:2) Mbon ikwọ oro John okụtde “[ẹkan] ẹbọhọ unam oro ye mbiet esie ye ibat enyịn̄ esie.” Ntre anaedi mmọ ẹdi mbon oro ẹtode ke otu 144,000 ẹmi ẹdude uwem ke isọn̄ ke utịt eyo emi. Nte otu, mmọ ke akpanikọ ẹmekan. Ke ekperede ndisịm isua 90 toto ke 1919, mmọ ẹma ẹsịn ndibọ idiọn̄ọ unam oro m̀mê ndiberi edem ke mbiet esie nte n̄kukụre idotenyịn owo kaban̄a emem. Ediwak mmọ ẹma ẹyọyọ ke edinam akpanikọ tutu osịm n̄kpa, ndien mmọemi, idahaemi ẹdude ke heaven, nte eyịghe mîdụhe ye akwa idatesịt ẹtiene nditọete mmọ oro ẹsụk ẹdude ke isọn̄ ẹkwọ ikwọ.—Ediyarade 14:11-13.

7. Didie ke ẹkesikama harp ke Israel eset, ndien didie ke edidu oro harp Abasi odude ke n̄kukụt John okpotụk nnyịn?

⁷ Mme anam-akpanikọ ẹmi ẹkande mi ẹkama harp Abasi ke ubọk. Ke emi, mmọ ẹbiet mme Levite eke temple eset, ẹmi ẹkesituakde ibuot ẹnọ Jehovah ke ikwọ emi ẹbrede harp ẹsịn. Ndusụk mmọ n̄ko ẹma ẹsida mbre harp ẹtịn̄ prọfesi. (1 Chronicles 15:16; 25:1-3) Inem inem uyo harp ẹma ẹsidian inem ke ikwọ idara ye akam itoro ye ekọm oro nditọ Israel ẹkesinọde Jehovah. (1 Chronicles 13:8; Psalm 33:2; 43:4; 57:7, 8) Ke ini ukụt m̀mê ntan̄mfep, owo ikesikopke uyo harp. (Psalm 137:2) Edidu oro harp Abasi ẹdude ke n̄kukụt emi ekpenyene ndidemede idotenyịn nnyịn mban̄a idara idara, ikwọ itoro edikan ye ekọm oro ẹnọde Abasi nnyịn. a

8. Nso ikwọ ke ẹkwọ, ndien nso idi mme ikọ ikwọ esie?

⁸ Oro edi se John obụkde: “Mmọ ẹnyụn̄ ẹkwọ ikwọ Moses owo Abasi [“ofụn Abasi,” NW] ye ikwọ Eyenerọn̄, ẹte, Mme utom Fo ẹkponi ẹnyụn̄ ẹnyene ndyọ, O Ọbọn̄ Abasi, Andikara kpukpru n̄kpọ; mme usụn̄ Fo ẹnen ẹnyụn̄ ẹdi akpanikọ, O Edidem mme obio. Anie editre nditen̄e Fi, O Ọbọn̄, ndinyụn̄ nnọ enyịn̄ Fo ubọn̄? Koro Afo ikpọn̄ edi edisana; kpukpru mme idụt ẹyenyụn̄ ẹdi ẹdituak ibuot ke iso Fo; koro ndinen ikpe Fo ẹma ẹyarade ẹwụt idem.”—Ediyarade 15:3, 4.

9. Ntak ẹkotde ikwọ oro, ke ubak ubak, “ikwọ Moses”?

⁹ Mme andikan ẹmi ẹkwọ “ikwọ Moses,” oro edi, ikwọ emi ebietde enyeoro Moses ọkọkwọde ke mme mbiet idaha ntre. Ke nditọ Israel ẹma ẹkekụt ufen duop oro ke Egypt ye nsobo ẹmi ẹkesobode udịmekọn̄ Egypt ke Ididuot Inyan̄, Moses ama ada mmọ usụn̄ ke utọ ikwọ edikan oro ẹketorode Jehovah, ẹtan̄ade ẹte: “Jehovah eyeda ubọn̄ ke nsinsi.” (Exodus 15:1-19) Odot didie ntem nte mbon ikwọ ẹmi ke n̄kukụt John, ke ẹma ẹkekan unam oro, ẹnyụn̄ ẹdi se ẹbuande mmọ ke editan̄a akpatre ufen itiaba oro, ẹkpenyene n̄ko ndikwọ ikwọ nnọ “Edidem emi akarade ke kpukpru eyo”!—1 Timothy 1:17.

10. Nso ikwọ en̄wen ke Moses okotịm, ndien didie ke akpatre ufan̄ikọ esie enyene ebuana ye akwa otuowo mfịn?

¹⁰ Ke ikwọ en̄wen, emi ẹketịmde nte Israel ekeben̄ede idem ndikan Canaan, akanieren oro, Moses ama ọdọhọ idụt oro ete: “Nyetan̄a enyịn̄ Jehovah; mbufo ẹnọ Abasi nnyịn ubom.” Akpatre ufan̄ikọ ikwọ emi n̄ko ama esịn udọn̄ ọnọ mbon oro mîkedịghe nditọ Israel, ndien ikọ Moses eke odudu spirit Abasi omosụhọde edisịm akwa otuowo eke usen mfịn: “Mbufo mme idụt, ẹtiene ikọt esie ẹsion̄o n̄kpo idara.” Ndien ntak emi mmọ ẹkpedarade? Koro idahaemi Jehovah “[eyesio]  usiene iyịp ifịn esie, [eyenyụn̄] osio usiene ye mme asua esie.” Edinọ edinen ubiereikpe emi eyeda akwa idara ọsọk kpukpru owo oro ẹdoride enyịn ke Jehovah.—Deuteronomy 32:3, 43; Rome 15:10-13; Ediyarade 7:9.

11. Didie ke ikwọ oro John okokopde akaiso ndisu?

¹¹ Didie ke Moses ke idemesie akpadara ntem ndidu ke usen Ọbọn̄ idahaemi, etienede mbon ikwọ eke heaven ọkwọ ete: “Kpukpru mme idụt ẹyenyụn̄ ẹdi ẹdituak ibuot ke iso Fo”! Akakan ikwọ oro amakaiso ndisu ke utịbe utịbe usụn̄ mfịn nte nnyịn ikụtde ediwak miliọn owo ẹtode “mme idụt,” oro idahaemi ẹbụn̄ọde idara idara ẹdụk esop Jehovah eke isọn̄, idịghe sụk ke n̄kukụt edi ke ata idem-n̄kpọ.

12. Ntak emi ẹkotde ikwọ mme andikan oro n̄ko “ikwọ Eyen-erọn̄”?

¹² Nte ededi, emi idịghe ikwọ Moses kpọt edi edi n̄ko ikwọ “Eyen-erọn̄.” Didie ke edi ntre? Moses ekedi prọfet Jehovah ọnọ Israel, edi Moses ke idemesie ama etịn̄ prọfesi ete ke Jehovah eyenam prọfet oro ebietde imọ adaha ada. Enyeemi ke akpanikọ ekedi Eyenerọn̄, Jesus Christ. Ke adan̄aemi Moses ekedide “ofụn Abasi,” Jesus ekedi Eyen Abasi, ke nditịm ntịn̄, Akamba Moses. (Deuteronomy 18:15-19; Utom 3:22, 23; Mme Hebrew 3:5, 6) Ntem, mbon ikwọ oro n̄ko ẹkwọ “ikwọ Eyen-erọn̄.”

13. (a) Didie ke Jesus ebiet Moses, okposụkedi okponde akan enye? (b) Didie ke nnyịn ikeme ndidiana kiet ye mbon ikwọ oro?

¹³ Ukem nte Moses, Jesus ama ọkwọ itoro Abasi an̄wan̄wa onyụn̄ etịn̄ prọfesi aban̄a edikan oro Enye edikande kpukpru mme asua esie. (Matthew 24:21, 22; 26:30; Luke 19:41-44) Jesus n̄ko ama asak iso ese ini emi mme idụt ẹdidụkde ẹdi nditoro Jehovah, ndien nte awa-idem “Eyen-erọn̄ Abasi,” enye ama ayak uwem esie nte owo ọnọ man emi ekeme nditịbe. (John 1:29; Ediyarade 7:9; men Isaiah 2:2-4; Zechariah 8:23 domo.) Ndien kpa nte Moses ekedide edifiọk enyịn̄ Abasi, Jehovah, onyụn̄ otorode enyịn̄ oro, ntre Jesus anam ẹdiọn̄ọ enyịn̄ Abasi. (Exodus 6:2, 3; Psalm 90:1, 17; John 17:6) Sia Jehovah edide anam-akpanikọ, mme ubọn̄ ubọn̄ un̄wọn̄ọ esie iditreke-tre ndisu. Ke akpanikọ, ndien, nnyịn idi kiet ye mbon ikwọ anam-akpanikọ ẹmi, ye Eyenerọn̄, n̄ko ye Moses, ke ndinyịme ikọ ikwọ oro: “Anie editre nditen̄e Fi, O Ọbọn̄ [Jehovah], ndinyụn̄ nnọ enyịn̄ Fo ubọn̄?”

Mme Angel ye Mme Eso

14. Mmanie ke John okụt nte ẹwọrọde ke temple, ndien nso ke ẹnọ mmọ?

¹⁴ Odot ete nnyịn ikop ikwọ mme andikan oro ẹyetde aran mi. Ntak-a? Koro ke isọn̄ mmọ ẹma ẹtan̄a mme ubiereikpe ẹmi ẹdọn̄ọde ke mme eso oro ẹkeyọhọde ye iyatesịt Abasi. Edi edin̄wan̄a mme eso ẹmi nduọk abuana mbon en̄wen akan mme ikpîkpu owo, nte John akade iso ndiwụt ete: “Ke n̄kpọ ẹmi ẹma ẹkebe, n̄kụt, ndien ẹberede esịt-esịt ubet efe ntiense emi odude ke heaven; ndien angel itiaba ẹmi ẹnyenede ufen itiaba ẹto ke temple oro ẹwọn̄ọ, ẹsịne edisana nsem-nsem itiat [“linen,” NW], ẹnyụn̄ ẹbọbọ mbọbọ o-gold ke ikpanesịt mmọ. Ndien kiet ke otu n̄kpọ-uwem inan̄ ọnọ angel itiaba oro eso o-gold itiaba, eke ẹyọhọde ye iyatesịt Abasi, Andidu uwem ke nsinsi-nsinsi.”—Ediyarade 15:5-7.

15. Ntak emi mîdịghe n̄kpọ n̄kpaidem kemi angel itiaba oro ẹwọrọde ke temple?

¹⁵ Kaban̄a temple nditọ Israel, emi ọkọdọn̄ọde se idade iban̄a mme n̄kpọ eke heaven, akwa oku ikpọn̄îkpọn̄ ekesidụk Ata Edisana Ebiet, oro ẹkotde mi “esịt esịt ubet.” (Mme Hebrew 9:3, 7) Enye ada aban̄a ebiet oro Jehovah odude ke heaven. Nte ededi, ke heaven ke idemesie, idịghe Akwa Oku, Jesus Christ ikpọn̄ enyene ifet ndidụk ke iso Jehovah edi mme angel ẹnam ntre n̄ko. (Matthew 18:10; Mme Hebrew 9:24-26) Idịghe n̄kpọ n̄kpaidem, ndien, nte ke ẹmekụt angel itiaba nte ẹwọrọde ẹto esịt esịt ubet ke heaven. Mmọ ẹnyene utom otode Jehovah Abasi ke idemesie ete: Ẹn̄wan̄a mme eso ẹyọhọde ye iyatesịt Abasi ẹduọk.—Ediyarade 16:1.

16. (a) Nso iwụt ite ke angel itiaba oro ẹtịm ẹdot ke utom mmọ? (b) Nso iwụt ite ke mbon en̄wen ẹbuana ke akwa utom edin̄wan̄a mme ndamban̄a eso oro nduọk?

¹⁶ Mme angel ẹmi ẹtịm ẹdot ke utom emi. Mmọ ẹsịne edisana, nyayama linen, owụtde nte ke mmọ ẹsana ke n̄kan̄ eke spirit, ẹnen ke enyịn Jehovah. N̄ko, mmọ ẹbọbọ mbọbọ  o-gold. Ẹsiwak ndibọbọ mbọbọ ke ini owo eben̄ede idem ọnọ ọkpọsọn̄ utom oyomde ẹnam ẹma. (Leviticus 8:7, 13; 1 Samuel 2:18; Luke 12:37; John 13:4, 5) Ntre mme angel ẹmi ẹbọbọ mbọbọ ndikaiso ke utom. Adianade do, mme mbọbọ mmọ ẹdi gold. Ke ataya eset, ẹkebat gold nte se idade iban̄a n̄kpọ Abasi ke heaven. (Mme Hebrew 9:4, 11, 12) Oro ọwọrọ ete ke mme angel ẹmi ẹnyene ọsọn̄urua utom oro Abasi ọdọn̄de mmọ ẹnam. Mbon efen n̄ko ẹbuana ke akwa utom emi. Kiet ke otu n̄kpọ uwem inan̄ ẹmi ayak mme eso oro ọnọ mmọ. Nte eyịghe mîdụhe, emi ekedi akpa n̄kpọ uwem oro, emi ekebietde lion, edide idiọn̄ọ uko ye odudu emi owo mîkemeke ndikan, oro ẹyomde man ẹtan̄a mme ubiereikpe Jehovah.—Ediyarade 4:7.

Jehovah ke Temple Esie

17. Nso ke John etịn̄ ọnọ nnyịn aban̄a temple, ndien didie ke oro eti nnyịn aban̄a temple oro ke Israel eset?

¹⁷ Ke akpatre, ke okụrede ubak n̄kukụt emi, John asian nnyịn ete: “Ndien temple ọyọhọ ye nsụn̄ikan̄ eke otode ke ubọn̄ Abasi ye odudu Abasi; baba owo kiet inyụn̄ ikemeke ndidụk ke esịt temple, tutu ufen itiaba ẹmi angel itiaba oro ẹkamade ẹkụre.” (Ediyarade 15:8) Mme ini ẹma ẹdu ke mbụk Israel emi obubịt enyọn̄ okofụkde ata temple,  ndien uyarade ubọn̄ Jehovah emi ama akpan mme oku ndidụk do. (1 Ndidem 8:10, 11; 2 Chronicles 5:13, 14; men Isaiah 6:4, 5 domo.) Ẹmi ẹkedi mme ini emi Jehovah akabuanade ọkpọsọn̄ ọkpọsọn̄ ke mme n̄kpọntịbe ke isọn̄.

18. Ini ewe ke angel itiaba oro ẹdifiak ẹkenọ Jehovah ibatutom?

¹⁸ Jehovah n̄ko enyene udọn̄ ntotụn̄ọ ntotụn̄ọ ke mme n̄kpọ oro ẹtịbede ke isọn̄ idahaemi. Enye oyom angel itiaba oro ẹkụre utom mmọ. Ata akpatre ini ubiereikpe edi emi, nte ẹtịn̄de ẹban̄a ke Psalm 11:4-6 ete: “Jehovah odu ke edisana temple esie, ebekpo Jehovah odu ke enyọn̄: enyịn esie ese, n̄kpọk enyịn esie ẹdomo nditọ owo. Jehovah odomo edinen owo: ndien amaedi idiọkowo, ye owo eke amade afai, ukpọn̄ esie asua mmọ. Enye eyenam afia edep anam mme idiọkowo; ikan̄, ye brimstone, ye edifiop ofụm ẹdi udeme cup mmọ.” Angel itiaba ẹmi idifiakke ke n̄kokon̄ ebiet oro Jehovah odude, ibọhọke ke ẹma ẹken̄wan̄a ufen itiaba ẹmi ẹduọk mme idiọkowo ke idem.

19. (a) Nso ewụhọ ke ẹnọ, ndien anie ọnọ? (b) Edin̄wan̄a mme ndamban̄a eso oro nduọk anaedi ọkọtọn̄ọ ini ewe?

¹⁹ Enyene-ndịk ewụhọ oro ọwọrọ ete: “Ekem n̄kop ọkpọsọn̄ uyo emi otode ke temple ọdọhọ angel itiaba oro ete, Mbufo ẹka ẹken̄wan̄a eso iyatesịt Abasi itiaba oro ẹduọk ke isọn̄.” (Ediyarade 16:1) Anie ọnọ ewụhọ emi? Anaedi Jehovah ke idemesie, sia uyama ubọn̄ ye odudu esie ẹkekpande owo en̄wen ekededi ndidụk temple oro. Jehovah ama edi temple esie eke spirit ndinọ ubiereikpe ke 1918. (Malachi 3:1-5) Ndien, anaedi ekedi ibio ibio ini ke usenọfiọn̄ oro ebede ke enye ọkọnọ ewụhọ edin̄wan̄a mme eso iyatesịt Abasi oro nduọk. Ke akpanikọ, ẹma ẹtọn̄ọ nditan̄a mme ubiereikpe ẹdọn̄ọde ke mme ndamban̄a eso oro ke udomo okponde ke 1922. Ndien editan̄a oro mmọ ẹtan̄ade ke ọsọn̄ uyo akan mfịn.

Mme Eso ye Mme Uyo Ukotowo

20. Nso ke mme eso iyatesịt Jehovah ẹyarade ẹnyụn̄ ẹtọt ẹban̄a, ndien didie ke ẹn̄wan̄a mmọ ẹduọk?

²⁰ Mme eso iyatesịt Jehovah ẹyarade mme ikpehe n̄kpọntịbe ke ererimbot nte Jehovah esede mmọ, ẹnyụn̄ ẹtọt ẹban̄a mme ubiereikpe oro Jehovah edinọde. Mme angel ẹmi ẹn̄wan̄a mme eso oro ẹduọk ebe ke n̄kpọutom eke esop mme Christian oro ẹyetde aran ke isọn̄, kpa mmọemi ẹkwọde ikwọ Moses ye ikwọ Eyenerọn̄. Ke adan̄aemi atan̄ade Obio Ubọn̄ nte eti mbụk, otu John amayarade se idọn̄ọde ke mme eso iyatesịt ẹmi uko uko. (Matthew 24:14; Ediyarade 14:6, 7) Ntem, adiana-iba etop mmọ edi emem emem ke nditan̄a uwọrọufụn nnọ ubonowo edi enye ebiet ekọn̄ ke nditan̄a “usen usiene Abasi nnyịn.”—Isaiah 61:1, 2.

21. Didie ke mme ebiet oro ẹn̄wan̄ade akpa eso inan̄ eke iyatesịt Abasi ẹduọk ẹsan̄a ẹkekem ye eke uyo ukotowo inan̄ oro, ndien m̀mọ̀n̄ ke mmọ ẹkpụhọde?

²¹ Mme ebiet oro ẹn̄wan̄ade akpa eso inan̄ eke iyatesịt Abasi ẹduọk ẹsan̄a ẹkekem ye eke akpa uyo ukotowo inan̄ oro, oro edi, isọn̄, inyan̄, akpa ye idịm-mmọn̄, ye se inọde un̄wana ke enyọn̄. (Ediyarade 8:1-12) Edi uyo ukotowo oro ẹketan̄a ufen ẹdori “ubak . . . kiet ke itie ita,” ke adan̄aemi edin̄wan̄a mme eso iyatesịt Abasi nduọk ọnọmọde ofụri itie. Ntem, ke adan̄aemi Christendom, nte “ubak . . . kiet ke itie ita,” ọbọde akpa ntịn̄enyịn ke usen Ọbọn̄, owo isioho ubak editịm n̄kpọ Satan ndomokiet ifep ndibọhọ mme etop ubiereikpe iyatesịt Jehovah ye mfụhọ oro mmọ ẹdade ẹdi.

22. Didie ke akpatre uyo ukotowo ita oro ẹkpụhọde, ndien didie ke mmọ ẹnyene ebuana ye akpatre eso ita eke iyatesịt Jehovah oro?

²² Akpatre uyo ukotowo ita oro ẹma ẹkpụhọde, koro ẹkekot mmọ n̄kpọnnam. (Ediyarade 8:13; 9:12) Akpa iba ke otu ẹmi ekesịne mme n̄kukun̄kpọyọriyọ akpan akpan ye udịmekọn̄ enan̄-mbakara, ke adan̄aemi ọyọhọ ita akadade emana Obio Ubọn̄ Jehovah edi. (Ediyarade 9:1-21; 11:15-19) Nte nnyịn idikụtde, akpatre eso iyatesịt ita esie n̄ko ẹsịne ndusụk n̄kpọ ẹmi, edi mmọ ke ndusụk udomo ẹkpụhọde ye n̄kpọnnam ita ẹmi. Ẹyak nnyịn idahaemi inọ ọyọhọ ntịn̄enyịn ke edinam emi ẹyararede mi, oro otode edin̄wan̄a mme eso iyatesịt Jehovah nduọk.

[Ikọ idakisọn̄]

[Mme Mbụme Ukpepn̄kpọ]