Nte Enyịn̄ Fo Odu ke N̄wed Uwem?
Ibuot 11
Nte Enyịn̄ Fo Odu ke N̄wed Uwem?
SARDIS
1. Nso idi idaha n̄kan̄ spirit eke esop oro ke Sardis, ndien didie ke Jesus ọtọn̄ọ etop esie?
N̄KPỌ nte itiat 30 ke edem usụk Akhisar eyomfịn (Thyatira) ke esop efen odu ndibọ etop otode Jesus oro ẹnọde ubọn̄: Sardis. Ke ọyọhọ isua ikie itiokiet mbemiso Eyo Nnyịn, obio emi ekedi eseri-iseri ibuot ukara obio ubọn̄ Lydia eke eset ye ifụm ukara Edidem Croesus, akwa owo inyene oro. Etisịm eyo John, nsọn̄ọn̄kpọ ama osịm enye, ndien akpa ubọn̄ oro enye ekenyenede ke idak ukara Croesus eyedi ikpîkpu mbụk. Kpasụk ntre, esop Christian okodude do ama akabade edi ubuene ke n̄kan̄ eke spirit. Emi edi akpa ini Jesus mîtọn̄ọke etop esie ye ikọ itoro. Utu ke oro, enye ọdọhọ ete: “Nyụn̄ nọ n̄wed ẹsọk angel ufọk Abasi emi odude ke Sardis, ete: Ntem ke Enye emi enyenede mme spirit Abasi itiaba, ye ntantaọfiọn̄ itiaba, ọdọhọ ete; Mmọfiọk mme utom fo, nte emenyene enyịn̄, ẹte ke odu uwem, ndien ama akpa.”—Ediyarade 3:1.
2. (a) Ọwọrọ nso ọnọ mme Christian oro ke Sardis nte ke Jesus enyene “spirit . . . itiaba”? (b) Nso enyịn̄ ke esop Sardis ekenyene, edi nso ikedi akpanikọ?
2 Ntak emi Jesus ayararede idemesie nte “enye emi enyenede mme spirit . . . itiaba”? Ntak edi koro spirit ẹmi ẹdade ẹban̄a edisana spirit Jehovah oro ọwọrọde ke ofụri udomo esie. Ke ukperedem, John etịn̄ aban̄a mmọ n̄ko nte “enyịn itiaba,” owụtde usọp usọp enyịn ukụtn̄kpọ oro edisana spirit Abasi ọnọde Jesus. (Ediyarade 5:6) Ntem, enye ekeme ndiyarade nnyụn̄ nse mban̄a idaha ekededi oro okpodude. (Matthew 10:26; 1 Corinth 4:5) Esop oro odude ke Sardis ọwọrọ etop nte enyeemi odude uwem, ọsọn̄de idem. Edi Jesus ekeme ndikụt nte ke enye akpa ke n̄kan̄ eke spirit. Nte an̄wan̄ade, ekese mme andibuana ke enye ẹmeduọn̄ọ ẹdụk idaha unana ekikere oro ebietde enyeemi mmọ ẹkedude mbemiso mmọ ẹkekabarede ẹdi Christian.—Men Ephesus 2:1-3; Mme Hebrew 5:11-14 domo.
3. (a) Ntak akpanade “angel ufọk Abasi emi odude ke Sardis” ọnọ akpan ntịn̄enyịn nte ke Jesus enyene “ntantaọfiọn̄ itiaba”? (b) Nso ọkpọsọn̄ item ke Jesus ọnọ esop oro ke Sardis?
3 Jesus n̄ko eti “angel ufọk Abasi emi odude ke Sardis” ete ke Imọ idi enyeemi enyenede “ntantaọfiọn̄ itiaba.” Enye akama mbiowo esop oro ke ubọk nnasia esie, enyenede odudu ndida mmọ usụn̄ ke utom ubọkerọn̄ mmọ. Mmọ ẹkpenyene ndiwụk esịt mmọ ke ‘ndidiọn̄ nse n̄kpri ufene iso.’ (Mme N̄ke 27:23) Ntre, akana mmọ ẹkpan̄ utọn̄ mfọn mfọn ẹnọ ikọ Jesus efen: “Kabade kpeme ndien, nyụn̄ nam se isụhọde, eke ẹyomde ndikpa, ẹsọn̄ọ ẹda: koro akanam n̄kwe baba utom fo kiet ọwọrọde usụn̄ ke iso Abasi Mi. Ti ndien usụn̄ nte akasan̄ade ọbọ enyene, ye adan̄a nte okokopde, nyụn̄ kpeme, nyụn̄ kabade esịt. Edieke mûdukpemeke, nyedi nte inọ, ndien udufiọkke ini eke ndibuatde fi.”—Ediyarade 3:2, 3.
4. Didie ke ikọ Peter ẹkpen̄wam esop oro ke Sardis ‘ndinam se isụhọde eke oyomde ndikpa, ẹsọn̄ọ ẹda’?
4 Oyom mbiowo ke Sardis ẹti idara oro mmọ ẹkenyenede akpa ke ini mmọ ẹkekpepde akpanikọ ye mme edidiọn̄ oro mmọ ẹkebọde inioro. Edi idahaemi mmọ ẹkpan̄a ke se iban̄ade utom eke spirit. Utuenikan̄ esop mmọ ke enịme ke ntak unana utom mbuọtidem. Ediwak isua ke mbemiso, apostle Peter ama ewet n̄wed ọnọ ẹsọk mme esop ke Asia (eyedi Sardis ama esịne) ete mmọ ẹkọri esịtekọm ẹnọ ubọn̄ ubọn̄ eti mbụk oro mme Christian ẹkebọde, oro ẹkenyụn̄ ẹkwọrọde “ke edisana spirit, emi ẹkedọn̄de oto ke heaven edi”—emi spirit itiaba ke n̄kukụt John ẹkadade ẹban̄a. Peter n̄ko ama eti mme Christian ke Asia oro ete ke mmọ ẹnyene ‘ubon eke ẹmekde, ẹdi mme oku edidem, ẹdi edisana obio, ẹdi ikọt eke Abasi onịmde ọnọ Idemesie, man mmọ ẹka ẹketan̄a mme utịbe edinam Esie, emi okokotde mmọ osio ke ekịm, esịn ke utịbe un̄wana Esie.’ (1 Peter 1:12, 25; 2:9) Nditie n̄kere mme utọ akpanikọ eke spirit oro eyen̄wam esop oro ke Sardis ndikabade esịt nnyụn̄ ‘nnam se isụhọde ẹsọn̄ọ ẹda.’—Men 2 Peter 3:9 domo.
5. (a) Nso iketịbe inọ esịtekọm oro mme Christian oro ke Sardis ẹkenyenede? (b) Nso iditịbe edieke mme Christian ke Sardis mînamke n̄kpọ iban̄a item Jesus?
5 Idahaemi, esịtekọm ye ima oro mmọ ẹnyenede ẹnọ akpanikọ ebiet ikan̄ oro ayakde esisịt ndinịme. Mbubek-ikan̄ ifan̄ kpọt ẹkaiso ndisak. Jesus esịn udọn̄ ọnọ mmọ ndifụm ikan̄ oro, ndibara ikan̄ oro, ndikabade esịt n̄kpọn̄ idiọkn̄kpọ oro unana ntịn̄enyịn mmọ adade mmọ ekesịn, nnyụn̄ ntọn̄ọ ntak ndi odu-uwem esop ke n̄kan̄ eke spirit. (Men 2 Timothy 1:6, 7 domo.) Mîdịghe ntre, ke ini Jesus edide ke unana idotenyịn—“nte inọ”—ndinọ ubiereikpe, esop oro ke Sardis ididụhe ke mben̄eidem.—Matthew 24:43, 44.
Ndidi “Nte Inọ”
6. Didie ke Jesus ekedi “nte inọ” ke 1918, ndien nso idaha ke enye okokụt ke otu mbon ẹmi ẹkedọhọde ke idi mme anditiene enye?
6 Ntọt oro Jesus ọkọnọde ete ke imọ iyedi “nte inọ” osụhọde osịm eyomfịn. Enye ama enyene akpan edisu ọnọ mme Christian oro ẹdude uwem ke usen Ọbọn̄. Ibịghike ke 1914 ebede, prọfesi Malachi ama osu: “Ọbọn̄ emi mbufo ẹyomde, kpa angel ediomi [“isụn̄utom ediomi,” NW] emi enemde mbufo esịt, eyebuat mbufo ke temple esie ke idaha kiet. Sese, enye ke edi: Jehovah mme udịm ọdọhọ.” (Malachi 3:1; Ediyarade 1:10) Nte “isụn̄utom ediomi,” Jesus ama edi ndinam ndụn̄ọde nnyụn̄ mbiere ikpe nnọ mbon oro ẹkedọhọde ke idi mme anditiene enye. (1 Peter 4:17) Ke inioro, ke 1918, Christendom ama esịn idem ke uduọkiyịp ke Ekọn̄ Ererimbot I ndien ke nditịn̄ ke n̄kan̄ eke spirit, enye ama akpa ofụri ofụri. Idem mme Christian akpanikọ, oro mbemiso ekọn̄ emi, ẹkesikwọrọde ikọ ata ifịk ifịk, ẹma ẹdụk ini idap eke spirit. Ẹma ẹsịn ndusụk ọwọrọiso mbiowo mmọ ke ufọk-n̄kpọkọbi, ndien utom ukwọrọikọ ama ayak esisịt nditre. Ke ini spirit Jehovah ekedemerede mme Christian ẹmi ke isua oro eketienede, idịghe kpukpru mmọ ẹkeben̄e idem. Ndusụk mmọ, ukem nte ndisịme nditọiban oro ke n̄ke Jesus, iketịmke idem ke n̄kan̄ spirit inọ ifet edinam n̄kpọ Jehovah. Okposụkedi, nte enemde, ama odu ediwak owo oro, ukem nte enyene-ọniọn̄ nditọiban oro, ẹkenamde ntọt Jesus oro: “Ẹkpeme ndien, koro mbufo mîfiọkke usen m̀mê hour.”—Matthew 25:1-13.
7. Ntak oyomde mme Christian mfịn ẹdu ke edidemede?
7 Udọn̄ kaban̄a Christian ndidu ke edidemede iketreke ke ntọn̄ọ ntọn̄ọ usen Ọbọn̄. Ke akwa prọfesi esie oro aban̄ade “idiọn̄ọ ke ini mme n̄kpọ ẹmi kpukpru ẹyomde ndisu,” Jesus ama ọnọ ọkpọsọn̄ ntọt ete: “Baba owo kiet ifiọkke iban̄a usen oro m̀mê hour oro . . . Mbufo ẹtịn̄ enyịn ẹse, ẹkpeme, ẹnyụn̄ ẹbọn̄ akam; koro mbufo mîfiọkke edikem ini. Se ndọhọde mbufo, mmonyụn̄ ndọhọ kpukpru owo nte, Ẹkpeme.” (Mark 13:4, 32, 33, 37) Ih, tutu osịm ata idahaemi, oyom nnyịn owo kiet kiet, edide idi eke otu oro ẹyetde aran m̀mê eke akwa otuowo, idu ke edidemede inyụn̄ in̄wana mbak idifiọrọ idụk idap eke spirit. Ke ini usen Jehovah edide “nte inọ ke okoneyo,” ẹkpekam ẹkụt nnyịn inen̄erede idu ke edidemede man ikpọbọ utebeikpe.—1 Thessalonica 5:2, 3; Luke 21:34-36; Ediyarade 7:9.
8. Didie ke otu John mfịn esịn udọn̄ ọnọ ikọt Abasi ndikaiso ndu uwem ke n̄kan̄ eke spirit?
8 Otu John eyomfịn ke idemesie odu ke edidemede aban̄a ufọn edisịn udọn̄ nnọ ikọt Abasi ndikaiso ndu uwem ke n̄kan̄ eke spirit. Nte utịp, ẹsidiomi mme akpan mbono ke ofụri ererimbot ediwak ini ke isua. Ke isua kiet ke ndondo emi, ofụri ibat owo 10,953,744 ẹkedụk mbono district 2,981, ndien ẹma ẹnịm mbufa mme andinịm ke akpanikọ owo 122,701 baptism. Ke se iwakde ikan isua ikie, otu John amakama magazine Enyọn̄-Ukpeme ke nditan̄a enyịn̄ ye uduak Jehovah. Ke ndinam n̄kpọ mban̄a ibak ibak ukọbọ ke ini ekọn̄ ererimbot iba oro, Enyọn̄-Ukpeme (Ikọmbakara) ama edemede Mme Ntiense Jehovah ndinyene obufa ifịk ke ndimịn̄ mme ibuotikọ, utọ nte, “Ọfọfọn Ọnọ Mbon Uko” (1919), “Ikot Ndinam Utom” (1925), ye “Edikan oro Ẹkande Ukọbọ” (1942).
9. (a) Nso ke kpukpru Christian ẹkpenyene ndibụp idemmọ? (b) Nso nsịnudọn̄ ke Enyọn̄-Ukpeme ọnọ?
9 Nte ekedide ke Sardis, kpasụk ntre ke mme esop mfịn, n̄kaiso ndụn̄ọde idemowo edi akpan n̄kpọ ọnọ kpukpru Christian. Kpukpru nnyịn ikpenyene ndikaiso mbụp idem nnyịn: Nte imanam ‘utom nnyịn ọwọrọ usụn̄’ ke iso Abasi nnyịn? Utu ke ndikpe ikpe nnọ mmọ efen, nte nnyịn owo kiet kiet imọkọri spirit n̄waidem inyụn̄ in̄wana ndinam utom ofụri ukpọn̄ nnọ Abasi? Ke se iban̄ade emi, magazine Enyọn̄-Ukpeme ọmọnọ nsịnudọn̄ ke ndineme mme utọ ibuotikọ nte, “Ẹka Iso Ẹwụt Se Mbufo ke Idem Mbufo Ẹdide” ye “Idụhe Uwem Aba Inọ Idem Nnyịn.” a Sia inyenede utọ un̄wam N̄wed Abasi oro, ẹyak nnyịn iwụt se nnyịn idide ke esịt esịt nte nnyịn in̄wanade ndisan̄a ke nsụhọdeidem ye ke akam mmụm nsọn̄ọnda n̄kama ke iso Jehovah.—Psalm 26:1-3; 139:23, 24.
“Enyịn̄ Ifan̄”
10. Nso n̄kpọ nsịnudọn̄ ke Jesus okokụt ke esop oro ke Sardis, ndien didie ke emi okpotụk nnyịn?
10 Ikọ efen ẹmi Jesus etịn̄de ọnọ esop oro ke Sardis ẹdi n̄kpọ akwa nsịnudọn̄. Enye ọdọhọ ete: “Edi emenyene enyịn̄ ifan̄ do ke Sardis emi mîkasabakede edisịnen̄kpọ mmọ; mmọ oro ẹyesịne afia ọfọn̄idem ẹsan̄a ye Ami, koro mmọ ẹdotde. Owo eke akande, ẹyesịne enye afia ọfọn̄idem ntem; ndien ndisioho enyịn̄ esie mfep ke n̄wed uwem, ndien nyenyịme enyịn̄ esie ke iso Ete Mi ye ke iso mme angel Esie.” (Ediyarade 3:4, 5) Nte ikọ ẹmi idemekede nnyịn inyụn̄ isọn̄ọ ubiere nnyịn ndinam akpanikọ? Ke ntak unana ntịn̄enyịn ke n̄kan̄ otu mbiowo, esop ke ofụri ofụri ekeme ndiduọ ndụk ọkpọsọn̄ idap eke n̄kan̄ spirit. Kpa ye oro, ndusụk owo do ẹkeme ndin̄wana uko uko ndikaiso nnam idiọn̄ọ Christian mmọ edi edisana onyụn̄ anana ntọi ndien ke ntre ẹkade iso ndinyene eti enyịn̄ ye Jehovah.—Mme N̄ke 22:1.
11, 12. (a) Idem ke ini akwa nsọn̄ibuot oro, didie ke anaedi ndusụk owo ẹma ẹbiet “enyịn̄ ifan̄” oro ẹkenamde akpanikọ ke Sardis? (b) Nso ubọhọ ikosịm mme Christian ẹmi ẹbietde ibokpot ke usen Ọbọn̄?
11 Ih, mme “ọfọn̄idem” oro ẹda ẹban̄a edinen n̄kpọ oro ẹdade ẹdiọn̄ọ owo nte Christian. (Men Ediyarade 16:15; 19:8 domo.) Anaedi ekedi inem inem n̄kpọ ọnọ Jesus ndikụt nte, kpa ye unana ekikere eke uwak ibat owo, “enyịn̄ ifan̄,” Christian ifan̄ oro ẹyetde aran ke Sardis, ẹkesụk ẹn̄wan̄wana ndimụm idiọn̄ọ emi n̄kama. Kpasụk ntre, ke ini ẹkedade mbon oro ẹkedọhọde ke idi Christian ẹsịn ke Akwa Babylon, kpa ukara ererimbot eke nsunsu ido ukpono, ke ediwak isua ikie eke akwa nsọn̄ibuot oro, anaedi owo ifan̄ ẹma ẹsidu kpukpru ini, oro ẹken̄wanade ye akwa n̄kpọ ubiọn̄ọ, ndinam uduak Jehovah. Mmọemi ẹkedi ndinen nte ibokpot oro odịbede ke otu ediwak isio n̄ka idiọk n̄kpasịp.—Ediyarade 17:3-6; Matthew 13:24-29.
12 Jesus ama ọn̄wọn̄ọ ete ke imọ iyedu ye mme Christian ẹbietde ibokpot mi “kpukpru ini, tutu osịm utịt ererimbot.” Enye ọfiọk orụk owo oro mmọ ẹdide ye orụk nti enyịn̄ oro mmọ ẹnamde ẹnọ idemmọ. (Matthew 28:20; Ecclesiastes 7:1) Kere ban̄a idara eke mme anam-akpanikọ owo “ifan̄” ẹmi, ẹmi ẹkesụk ẹdude uwem ke ini usen Ọbọn̄ ọkọtọn̄ọde! Ke akpatre, ẹma ẹbahade mmọ ẹkpọn̄ Christendom oro ama akakpa ke n̄kan̄ eke spirit ẹnyụn̄ ẹtan̄ mmọ ẹbok nte edinen esop, ebietde esop oro ke Smyrna.—Matthew 13:40-43.
13. Mme edidiọn̄ ewe ẹna ẹbet mme Christian oro ẹyetde aran ẹmi “mîkasabakede edisịnen̄kpọ mmọ”?
13 Mbon oro ẹdude ke Sardis ẹmi ẹnamde akpanikọ tutu osịm utịt, mînyụn̄ isabakede se ẹdade ẹdiọn̄ọ mmọ nte Christian ẹkụt edisu eke utịbe idotenyịn oro. Ke ẹma ẹkewụk Obio Ubọn̄ Messiah Jesus ke 1914, ẹnam mmọ ẹset ẹdinyene uwem eke spirit ndien nte mme andikan, ẹsịne mmọ mfia ọfọn̄idem ke idiọn̄ọ edinen ido mmọ oro ananade ndo ye ntọi. Sia ẹma ẹkesan̄a ke mfafaha usụn̄ oro adade osịm uwem, mmọ ẹyenyene nsinsi utịp.—Matthew 7:14; se n̄ko Ediyarade 6:9-11.
Ke Nsinsi ke N̄wed Uwem!
14. Nso idi “n̄wed uwem,” ndien enyịn̄ mmanie ke ẹwet ẹsịn do?
14 Nso idi “n̄wed uwem” oro, ndien enyịn̄ mmanie ke ẹdiyak ẹkaiso ẹsịne do? N̄wed uwem oro aban̄a mbụk ikọt Jehovah oro ẹdidude ke udịm ndibọ enọ nsinsi uwem. (Malachi 3:16) Mi ke Ediyarade, ẹtịn̄ san̄asan̄a ẹban̄a enyịn̄ mme Christian oro ẹyetde aran. Edi ẹwet enyịn̄ mbon oro ẹdude ke udịm ndibọ nsinsi uwem ke isọn̄ ẹsịn do n̄ko. Adianade do, mme enyịn̄ ẹkeme ndidi se ‘ẹsọhide ẹfep’ ke n̄wed oro. (Exodus 32:32, 33) Nte ededi, mbon oro ẹdude ke otu John ẹmi enyịn̄ mmọ akade iso ndidu ke n̄wed uwem oro tutu n̄kpa mmọ, ẹnyene uwem unana n̄kpa ke heaven. (Ediyarade 2:10) Mmọemi ẹdi mme enyịn̄ oro Jesus onyịmede akpan akpan ke iso Ete esie ye ke iso mme angel Esie. Utịp oro okpon didie ntem!
15. Mme andibuana ke akwa otuowo ẹdisan̄a didie ẹnam ẹwet enyịn̄ mmọ ẹsịn ke n̄wed uwem ke usụn̄ oro mîkemeke ndisọhi mfep?
15 Akwa otuowo, oro ẹwetde enyịn̄ mmọ ẹsịn ke n̄wed uwem, ẹyebọhọ akwa ukụt ye uwem. Ke ndiwụt mbuọtidem ke ofụri Tọsịn Isua Ukara Jesus oro ye ke ini akpatre udomo oro editienede, ẹyenọ mmọemi nsinsi uwem ke Paradise ke isọn̄. (Daniel 12:1; Ediyarade 7:9, 14; 20:15; 21:4) Adan̄aoro ẹyewet enyịn̄ mmọ ke usụn̄ oro mîkemeke ndisọhi mfep ke n̄wed uwem. Ke ọfiọkde se ẹwetde mi ebe ke edisana spirit, nte afo unamke n̄kpọ ye ọkpọsọn̄ udọn̄ uban̄a item oro Jesus etịn̄de afiak etịn̄ mi ete: “Yak owo eke enyenede utọn̄ okop se spirit ọdọhọde mme ufọk Abasi”?—Ediyarade 3:6.
[Mme Ikọ idakisọn̄]
a Se Enyọn̄-Ukpeme, July 15, 2005, ye March 15, 2005.
[Mme Mbụme Ukpepn̄kpọ]
[Ndise ke page 57]
Enyịn̄ fo akpakam odu ke n̄wed uwem
