Matthew 13;1-58
13 Ke Jesus ama ọkọkpọn̄ ufọk ke usen oro, enye aka eketie ke mbeninyan̄;
2 akwa otuowo ẹnyụn̄ ẹbụn̄ọ ẹtiene enye, tutu enye odụk ubom onyụn̄ osụhọde etetie,+ ndien ofụri otuowo ẹdada ke mbenesụk.
3 Ndien enye ada mme uwụtn̄kpọ etịn̄ ediwak n̄kpọ ọnọ mmọ, ete: “Sese! Asuan n̄kpasịp ọkọwọrọ aka ndisuan n̄kpasịp;+
4 ndien nte enye asuande, ndusụk n̄kpasịp ẹduọn̄ọ ke mbenusụn̄, mme inuen ẹnyụn̄ ẹdi ẹditan̄ mmọ ẹta.+
5 Ndusụk ẹduọn̄ọ ke isọn̄ itiat emi mmọ mînyeneke ediwak ntan, ndien mmọ ẹtịbe kpa idaha oro sia ntan mîtụn̄ọke.+
6 Edi ke ini utịn asiahade ọfọp mmọ, ndien sia mînyeneke orụn̄ mmọ ẹyemede.+
7 Ndusụk, n̄ko, ẹduọn̄ọ ke otu n̄kukịm, ndien n̄kukịm ẹkọri ẹbaba mmọ.+
8 Edi mmọ eken ẹduọn̄ọ ke eti isọn̄ ẹnyụn̄ ẹtọn̄ọ ndin̄wụm mfri,+ enye emi on̄wụm utịm ikikie, enye oko on̄wụm utịm ike-ata, enye eken on̄wụm utịm ikedịp ye duop.+
9 Yak owo eke enyenede utọn̄ okop.”+
10 Ntre mme mbet ẹsan̄a ẹkpere ẹnyụn̄ ẹbụp enye ẹte: “Ntak emi afo adade mme uwụtn̄kpọ etịn̄ ikọ ọnọ mmọ?”+
11 Enye ọbọrọ ete: “Ẹyak mbufo ẹfiọk ndisana ndịben̄kpọ+ obio ubọn̄ heaven, edi owo iyakke mbon oro ẹfiọk.+
12 Koro owo ekededi eke enyenede, ẹyenọ enye efen efen ẹkọrọ do ndien enye eyenyene ediwak;+ edi owo ekededi eke mînyeneke, ẹyebọ enye kpa se enye enyenede.+
13 Ntak edi oro ndade mme uwụtn̄kpọ ntịn̄ ikọ nnọ mmọ, koro ke edise, mmọ ẹse ke ikpîkpu, ndien ke edikop, mmọ ẹkop ke ikpîkpu, mmọ inyụn̄ ifiọkke se ọwọrọde;+
14 ndien ntịn̄nnịm ikọ Isaiah omosu mmọ ke idem, emi ọdọhọde ete, ‘Amaedi edikop, mbufo ẹyekop edi idifiọkke se ọwọrọde; ama onyụn̄ edi edise, mbufo ẹyese edi idikwe.+
15 Koro esịt mbon emi amakabade odobi, mmọ ẹnyụn̄ ẹda utọn̄ mmọ ẹkop edi iyereke, ẹnyụn̄ ẹbọp enyịn mmọ; mbak mmọ ẹdida enyịn mmọ ẹkụt n̄kpọ ẹnyụn̄ ẹda utọn̄ mmọ ẹkop ikọ ẹnyụn̄ ẹda esịt mmọ ẹfiọk se ọwọrọde ẹnyụn̄ ẹfiak edem, ndien ami n̄kọk mmọ.’+
16 “Nte ededi, mbufo ẹmekop inemesịt koro enyịn+ mbufo okụtde, utọn̄ mbufo onyụn̄ okopde.
17 Koro ke akpanikọ ke ndọhọ mbufo nte, Ama ọdọn̄ ediwak mme prọfet+ ye ndinen owo ndikụt mme n̄kpọ emi mbufo ẹkụtde mi edi mmọ ikekwe,+ ndinyụn̄ n̄kop mme n̄kpọ emi mbufo ẹkopde mi edi mmọ ikokopke.+
18 “Mbufo, ndien, ẹkpan̄ utọn̄ ẹkop uwụtn̄kpọ owo emi akasuande n̄kpasịp.+
19 Ke ebiet emi owo ekededi okopde ikọ obio ubọn̄ emi edi mîfiọkke se ọwọrọde, andidiọk+ edi editan̄ se ẹkesuande ke esịt esie; emi edi enye emi ẹsuande ke mbenusụn̄.
20 Amaedi enye emi ẹsuande ke isọn̄ itiat, emi edi owo emi okopde ikọ ndien inikiet inikiet ọbọ enye ye idatesịt.+
21 Edi enye inyeneke orụn̄ ke idemesie edi aka iso ke esisịt ini, ndien ke ini ukụt m̀mê ukọbọ etịbede ke ntak ikọ oro, kpa idaha oro enye atuak ukot ọduọ.+
22 Amaedi enye emi ẹsuande ke otu n̄kukịm, emi edi owo oro okopde ikọ, edi editịmede esịt editịm n̄kpọ+ emi ye abian̄a abian̄a odudu inyene ababa ikọ oro, ndien enye in̄wụmke mfri.+
23 Amaedi enye emi ẹsuande ke eti isọn̄, emi edi owo oro okopde ikọ oro onyụn̄ ọfiọkde se enye ọwọrọde, emi enen̄erede on̄wụm mfri, enye emi utịm ikikie, enye oko utịm ike-ata, enye eken utịm ikedịp ye duop.”+
24 Enye emen uwụtn̄kpọ efen enịm mmọ ke iso, ete: “Obio ubọn̄ heaven ebiet owo eke asuande eti n̄kpasịp ke in̄wan̄ esie.+
25 Ke adan̄aemi mme owo ẹdede idap, asua esie edi edisuan mbiet ọdọn̄ ke otu wheat, ndien ọnyọn̄.
26 Ke ini enye asiahade ikọn̄ onyụn̄ on̄wụmde mfri, mbiet oro ẹnyụn̄ ẹsiaha n̄ko.
27 Ndien ifịn enyeneufọk ẹto ẹdi ẹdibụp enye ẹte, ‘Ete, nte idịghe eti n̄kpasịp ke afo akasuan ke in̄wan̄ fo?+ Enye asan̄a didie, ndien, etịbe mbiet?’+
28 Enye ọbọrọ mmọ ete, ‘Owo, kpa asua, akanam emi.’+ Mmọ ẹbụp enye ẹte, ‘Ndi omoyom nnyịn ika ikosion̄o mmọ?’
29 Enye ete, ‘Baba; mbak, ke adan̄aemi ẹsion̄ode mbiet, mbufo ẹdidịbede wheat ẹkọrọ ye mmọ.
30 Ẹyak mmọ mbiba ẹkọri ọtọkiet tutu esịm ini ukpen̄e; ndien ke ini ukpen̄e nyọdọhọ mbon ukpen̄e nte, Ẹbem iso ẹsion̄o mbiet ẹnyụn̄ ẹbọp mmọ ke ebek ke ebek man ẹfọp mmọ,+ ndien ẹketan̄ wheat ẹdọn̄ ke ufọk ubonn̄kpọ mi.’”+
31 Enye emen uwụtn̄kpọ efen enịm mmọ ke iso,+ ete: “Obio ubọn̄ heaven ebiet n̄kpasịp mustard,+ emi owo ekemende ọkọtọ ke in̄wan̄ esie;
32 emi, ke akpanikọ, edide n̄kpri-n̄kan ke otu kpukpru n̄kpasịp, edi ke ini ama ọkọkọri enye edi n̄kponn̄kan ke otu kpukpru ikọn̄udia onyụn̄ akabade edi eto, tutu mme inuen enyọn̄+ ẹdi ẹdidụn̄ ke mme n̄kọk esie.”+
33 Enye ọnọ mmọ uwụtn̄kpọ efen ete: “Obio ubọn̄ heaven ebiet leaven,+ emi n̄wan emende ekedịp ke ikpọ udomo ndomuyo ita, tutu ofụri ebok oro ofụt.”
34 Ke kpukpru emi Jesus akada mme uwụtn̄kpọ etịn̄ ikọ ọnọ otuowo. Ke akpanikọ, enye itịn̄ke ikọ inọ mmọ ke mîdịghe ke uwụtn̄kpọ;+
35 man okposu se ẹkedade prọfet ẹtịn̄, ẹte: “Nyatat inua mi nnọ mme uwụtn̄kpọ, nyọkwọrọ mme n̄kpọ eke ẹdịbede toto ke editọn̄ọ.”+
36 Ndien ke ama akanam otuowo ẹnyọn̄ọ enye okodụk esịt ufọk. Mme mbet esie ẹdi ẹtiene enye ẹdidọhọ ẹte: “Nam uwụtn̄kpọ mbiet ke in̄wan̄ an̄wan̄a nnyịn.”
37 Enye ọbọrọ mmọ ete: “Asuan eti n̄kpasịp edi Eyen owo;
38 in̄wan̄ edi ererimbot;+ amaedi eti n̄kpasịp, mmọ emi ẹdi nditọ obio ubọn̄; edi mbiet ẹdi nditọ andidiọk,+
39 ndien asua emi akasuande mmọ edi Devil.+ Ini ukpen̄e+ edi akpatre ini editịm n̄kpọ emi,+ ndien mbon ukpen̄e ẹdi mme angel.
40 Ke ntre, kpa nte ẹtan̄de mbiet oro ẹfọp ke ikan̄, kpasụk ntre ke edidi ke akpatre ini editịm n̄kpọ emi.+
41 Eyen owo oyosio mme angel esie ọdọn̄, ndien mmọ ẹyetan̄ kpukpru n̄kpọ eke ẹsịnde owo ọduọ+ ye mmọ emi ẹbiatde ibet ẹfep ke obio ubọn̄ esie,
42 ndien mmọ ẹyetop mmọ ẹdọn̄ ke akwa ikan̄.+ Do ke mmọ ẹdituan̄a ẹnyụn̄ ẹta edet.+
43 Adan̄aoro ndinen owo ẹyeyama+ nte utịn+ ke obio ubọn̄ Ete mmọ. Yak owo eke enyenede utọn̄ okop.+
44 “Obio ubọn̄ heaven ebiet n̄kpọuto eke edịbede ke in̄wan̄, emi owo kiet okokụtde ndien emen edịp; ndien ke ntak idatesịt emi enye enyenede enye aka akanyam+ se ededi eke enye enyenede onyụn̄ aka ekedep in̄wan̄ oro.+
45 “N̄ko obio ubọn̄ heaven ebiet owo urua emi oyomde nti pearl.
46 Ke ini enye okụtde pearl kiet emi ekọmurua esie okponde,+ enye adaha ọkọsọp anyam kpukpru n̄kpọ emi enye enyenede onyụn̄ edep enye.+
47 “N̄ko-n̄ko obio ubọn̄ heaven ebiet iyịre eke ẹduọkde ke inyan̄, emi omụmde nsio nsio orụk iyak.+
48 Ke ini enye ọyọhọde, mmọ ẹdụri enye ẹwọrọ ẹdọk esụk, ndien ẹsụhọde ẹtetie, ẹtan̄ se ifọnde+ ẹdọn̄ ke n̄kpọ, edi mmọ ẹduọn̄ọ se mîfọnke.+
49 Ntre ke edidi ke akpatre ini editịm n̄kpọ emi: mme angel ẹyewọrọ ẹka ẹkebahade mme idiọkowo+ ẹsio ke otu nti owo+
50 ẹyenyụn̄ ẹduọn̄ọ mmọ ke akwa ikan̄. Do ke mmọ ẹdituan̄a ẹnyụn̄ ẹta edet.+
51 “Nte mbufo ẹma ẹfiọk se kpukpru n̄kpọ emi ẹwọrọde?” Mmọ ẹbọrọ enye ẹte: “Ih.”
52 Ekem enye ọdọhọ mmọ ete: “Sia edide ntre, owo ekededi emi edide anditeme mbio obio, ke ini ẹkpepde enye ẹban̄a obio ubọn̄ heaven,+ ebiet enyeneufọk, emi osion̄ode mbufa n̄kpọ ye n̄kani n̄kpọ ke ufọk ubon n̄kpọuto esie.”+
53 Ndien ke ini Jesus ọnọde mme uwụtn̄kpọ emi ama, enye ọkpọn̄ ebiet oro.
54 Ekem ke ama ekedisịm obio emana esie,+ enye ọtọn̄ọ ndikpep mmọ n̄kpọ ke synagogue+ mmọ, tutu idem akpa mmọ, mmọ ẹnyụn̄ ẹdọhọ ẹte: “Owo emi ada utọ ọniọn̄ ye mme utom odudu emi ke m̀mọ̀n̄?
55 Nte enye idịghe eyen anamusọ eto?+ Nte eka esie ikereke Mary, nditọeka esie iren inyụn̄ ikereke James ye Joseph ye Simon ye Judas?
56 Nte kpukpru nditọeka esie iban inyụn̄ idụhe ye nnyịn?+ Ke m̀mọ̀n̄, ndien, ke owo emi ada ofụri n̄kpọ emi?”+
57 Ntre mmọ ẹtuak ukot ẹduọn̄ọ ke ntak esie.+ Edi Jesus ọdọhọ mmọ ete: “Prọfet inanake ukpono ke mîbọhọke ke obio emana esie ye ke ufọk esie.”+
58 Enye ikonyụn̄ inamke ediwak utom odudu do ke ntak unana mbuọtidem mmọ.+
