Matthew 2;1-23
2 Ke Jesus ama akamana ke Bethlehem+ Judea ke eyo Edidem Herod,+ sese! mme asiak ntantaọfiọn̄+ ẹto mme ikpehe edem usiahautịn ẹdi Jerusalem,
2 ẹdibụp ẹte: “Enye emi amanade nte edidem+ mme Jew odu m̀mọ̀n̄? Koro nnyịn ikokụtde ntantaọfiọn̄+ esie ke ini ikodude ke edem usiahautịn, ndien nnyịn imedi ndinụhọ nnọ enye.”
3 Ke ini Edidem Herod okopde emi esịt etịmede enye, ọkọrọ ye kpukpru mbio Jerusalem;
4 ndien enye okot kpukpru mbọn̄ oku ye mme scribe* ke obio obon ọtọkiet onyụn̄ obụp mmọ aban̄a ebiet emi akanade Christ amana.
5 Mmọ ẹdọhọ enye ẹte: “Ke Bethlehem+ Judea; koro ntem ke ẹkeda mme prọfet ẹwet ẹte,
6 ‘Ndien afo, O Bethlehem+ isọn̄ Judah, afo udịghe n̄kpri-n̄kan obio ke usụn̄ ekededi ke otu mme andikara Judah; koro andikara+ oyoto fi ke esịt ọwọrọ, emi edikpemede+ ikọt mi, Israel.’”
7 Ndien Herod okot mme asiak ntantaọfiọn̄ oro ke ndịbe onyụn̄ etịm obụp mmọ ọfiọk ini emi ntantaọfiọn̄ oro ọkọwọrọde;
8 ndien, ke ini ọdọn̄de mmọ ẹka Bethlehem, enye ọdọhọ ete: “Ẹka ẹketịm ẹyom ekpri eyen oro, ndien ẹma ẹkụt enye ẹfiak ẹditịn̄ ẹnọ mi, man ami n̄ko n̄kpaka n̄konụhọ nnọ enye.”+
9 Ke mmọ ẹma ẹkekop ikọ edidem emi, mmọ ẹdaha ẹnyọn̄ọ ekemmọ; ndien, sese! ntantaọfiọn̄ oro mmọ ẹkekụtde ini oro mmọ ẹkedude ke edem usiahautịn+ ebem mmọ iso, tutu edituak ada ke enyọn̄ ebiet emi ekpri eyen oro okodude.
10 Ke ini mmọ ẹkụtde ntantaọfiọn̄ oro, mmọ ẹdara etieti.
11 Ndien ke ini mmọ ẹdụkde esịtufọk mmọ ẹkụt ekpri eyen oro ye Mary eka esie, ndien mmọ ẹduọn̄ọ ke isọn̄ ẹnyụn̄ ẹnụhọ ẹnọ enye. N̄ko, mmọ ẹkụbọde n̄kpọ udọn̄ n̄kpọuto mmọ ẹnyụn̄ ẹnọ enye mme enọ, gold ye frankincense ye myrrh.
12 Nte ededi, sia mmọ ẹma ẹkebọ ntọt ẹto Abasi+ ke ndap ete mmọ ẹkûfiak ẹka ẹbịne Herod, mmọ ẹsan̄a usụn̄ efen ẹnyọn̄ọ idụt mmọ.
13 Ke mmọ ẹma ẹkenyọn̄ọ, sese! angel Jehovah+ ọbiọn̄ọde Joseph ke iso ke ndap onyụn̄ ọdọhọ ete: “Daha ke enyọn̄, da ekpri eyen emi ye eka esie fehe ka Egypt, nyụn̄ du do tutu nnọ fi uyo; koro Herod ọmọn̄ oyom ekpri eyen emi ndiwot.”
14 Ntre enye adaha ke enyọn̄ onyụn̄ ada ekpri eyen emi ye eka esie ke okoneyo oro ọnyọn̄ Egypt,
15 enye onyụn̄ odu do tutu Herod akpa, man okposu+ se Jehovah akadade prọfet esie etịn̄, ete: “N̄kot eyen mi nsio ke Egypt.”+
16 Ndien ke ini Herod okụtde ete ke mme asiak ntantaọfiọn̄ emi ẹbian̄a imọ, enye ofụt esịt etieti, onyụn̄ ọdọn̄ ete ẹkewot kpukpru nditọiren ke Bethlehem ye ke kpukpru n̄kann̄kụk oro, ọtọn̄ọde ke eyeneren isua iba sụhọde, nte ekemde ye ini emi enye eketịmde obụp mme asiak ntantaọfiọn̄ oro.+
17 Ndien ama osu nte ẹkedade prọfet Jeremiah ẹtịn̄, ẹte:
18 “Ẹma ẹkop uyom ke Ramah,+ ntuan̄a ye ọkpọsọn̄ eseme; Rachel+ akatua aban̄a nditọ esie, inyụn̄ inyịmeke ndibọ ndọn̄esịt, koro mmọ mîdụhe aba.”
19 Ke Herod ama akakpa, sese! angel Jehovah ọbiọn̄ọde Joseph ke iso ke ndap+ ke Egypt
20 onyụn̄ ọdọhọ ete: “Daha ke enyọn̄, da ekpri eyen emi ye eka esie nyọn̄ isọn̄ Israel, koro mbon emi ẹkeyomde ukpọn̄ ekpri eyen emi ẹmekpan̄a.”
21 Ntre enye adaha ke enyọn̄ onyụn̄ ada ekpri eyen oro ye eka esie odụk isọn̄ Israel.
22 Edi ke ini enye okopde ete ke Archelaus akara nte edidem ke Judea ke itie Herod ete esie, ndịk anam enye ndidaha n̄ka do. Akan oro, ke ama ọkọbọ ntọt oto Abasi ke ndap,+ enye ọnyọn̄ aka ikpehe n̄kan̄ Galilee,+
23 onyụn̄ okodụn̄ ke obio oro ẹkotde Nazareth,+ man okposu se ẹkedade mme prọfet ẹtịn̄, ẹte: “Ẹdikot enye eyen Nazareth.”+
Mme Ikọ Idakisọn̄
^ Ke akpa, emi akaban̄a mme andision̄o N̄wed Abasi n̄wet, edi ke eyo Jesus, emi akaban̄a mbon oro ẹfiọkde Ibet ẹnyụn̄ ẹdide mme andikpep Ibet.
