1 Peter 1;1-25
1 Ami Peter, apostle+ Jesus Christ, n̄wet n̄wed emi nnọ ẹsọk isenowo+ emi ẹsuanade+ ẹdụn̄ọ ke Pontus, Galatia, Cappadocia,+ Asia, ye Bithynia, kpa mbon oro ẹmekde+
2 nte ekemde ye mbemiso ifiọk Abasi kpa Ete,+ emi spirit anamde mmọ ẹsana,*+ man mmọ ẹkop item ẹnyụn̄ ẹda iyịp Jesus Christ+ ẹsịme+ mmọ:
Mfọnido oro owo mîdotke ye emem ẹkpekam ẹdọdiọn̄ ẹwak ẹnọ mbufo.+
3 Itoro enyene Abasi ye Ete Ọbọn̄ nnyịn Jesus Christ,+ koro nte ekemde ye akwa mbọm esie enye okobon nnyịn obufa+ ete inyene odu-uwem idotenyịn+ ebe ke ediset+ Jesus Christ ke n̄kpa,
4 ete inyene udeme eke mîkemeke ndibiara mînyụn̄ isabakede mînyụn̄ ikemeke ndibe mfep.+ Ẹnịm enye ke heaven ẹnọ mbufo,+
5 emi ẹdade odudu Abasi ẹkpeme oto ke mbuọtidem+ kaban̄a edinyan̄a+ eke ẹdiyararede+ ke akpatre ini.+
6 Mbufo ẹmedara etieti ẹban̄a emi, okposụkedi ke esisịt ini ke emi, anade nsio nsio idomo ẹnam mbufo ẹfụhọ,+
7 man orụk mbuọtidem mbufo emi ẹma ẹkedomo ẹse,+ emi ọsọn̄de urua akan gold eke abiarade kpa ye oro ẹma ẹkeda ikan̄ ẹdomo enye ẹwụt,+ ekpedi n̄kpọ itoro ye ubọn̄ ye ukpono ke ediyarade+ Jesus Christ.
8 Okposụkedi akanam mbufo mîkwe enye, mbufo ẹmema enye.+ Okposụkedi mbufo mîkwe enye idahaemi, mbufo ẹmebuọt idem ye enye ẹnyụn̄ ẹdara etieti ye ubọn̄ ubọn̄ idatesịt oro inua mîkemeke nditịn̄,
9 nte mbufo ẹbọde utịp mbuọtidem mbufo, kpa edinyan̄a ukpọn̄ mbufo.+
10 Kaban̄a edinyan̄a emi, mme prọfet emi ẹketịn̄de ntịn̄nnịm ikọ+ ẹban̄a mfọnido oro owo mîdotke emi ẹkenịmde ẹnọ mbufo,+ ẹma ẹtịm ẹbụp ẹnyụn̄ ẹtịm ẹdụn̄ọde.+
11 Mmọ ẹma ẹdụn̄ọde ẹyom ndifiọk akpan ini+ m̀mê orụk ini oro spirit+ emi odude mmọ ke idem okowụtde aban̄a Christ+ ke ini enye ekebemde iso etie ntiense aban̄a ndutụhọ Christ+ onyụn̄ etiede aban̄a ubọn̄+ oro editienede mmọ emi.
12 Ẹma ẹyarade ẹnọ mmọ ẹte, ke idịghe kaban̄a mmọ,+ edi edi kaban̄a mbufo, ke mmọ ẹkesan̄a utom ẹban̄a mme n̄kpọ emi ẹtọtde+ ke emi ẹnọ mbufo ebe ke mbon emi ẹkedade edisana spirit+ emi ẹnọde oto heaven ẹtan̄a eti mbụk ẹnọ mbufo. Ọdọn̄ mme angel ndinyụn̄ọ mme n̄kpọ emi.+
13 Ntem ẹfak ọfọn̄ esịt mbufo,*+ ẹnen̄ede ẹkpeme ukeme ukere n̄kpọ mbufo;+ ẹdori enyịn ke mfọnido oro owo mîdotke+ emi ẹdidade ẹsọk mbufo ke ini ediyarade+ Jesus Christ.
14 Nte nditọ n̄kopitem, ẹtre ndinam n̄kpọ ekekem+ ye mme udọn̄ oro mbufo ẹkenyenede ke unana ifiọk ke eyo oko,
15 edi, kpa nte Enye emi okokotde mbufo edide Edisana, mbufo n̄ko ẹkabade ẹsana ke ofụri edu uwem mbufo,+
16 koro ẹwet ẹte: “Mbufo ẹnyene ndidi edisana koro ami ndide edisana.”+
17 N̄ko-n̄ko, edieke mbufo ẹsemede ẹkot Ete emi ekpede ikpe nte utom owo kiet kiet edide mînyụn̄ iten̄eke owo enyịn,+ ẹdu uwem ke ndịk+ ke ini emi mbufo ẹdide odudụn̄.+
18 Koro mbufo ẹmefiọk ẹte ke idịghe mme n̄kpọ emi ẹkemede ndibiara,+ nte silver m̀mê gold, ke ẹkeda ẹnyan̄a+ mbufo ẹsio ke ikpîkpu usụn̄ uwem emi mbufo ẹkekpepde ẹto ido edinam mme ete ete mbufo.
19 Edi ẹkeda ọsọn̄urua iyịp,+ nte eke eyenerọn̄ emi ananade ndo onyụn̄ ananade ntọi,+ kpa eke Christ.+
20 Ke akpanikọ, ẹma ẹbem iso ẹfiọk enye mbemiso editọn̄ọ+ ererimbot, edi ẹkeyarade enye ke utịt ini ke ntak mbufo+
21 emi otode ke enye mbufo ẹdi mme andinịm Abasi ke akpanikọ,+ kpa enye emi akanamde enye eset ke n̄kpa+ onyụn̄ ọnọde enye ubọn̄;+ man mbuọtidem ye idotenyịn mbufo ẹdi ke Abasi.+
22 Ke emi mbufo ẹma ẹkenam ukpọn̄ mbufo asana+ ke ndisụk ibuot nnọ akpanikọ, nte utịp, ẹnyene ima nditọete emi mîsan̄ake ye mbubịk+ ẹnyụn̄ ẹnyene ufiop ufiop ima ke ofụri esịt ẹnọ kiet eken.+
23 Koro ẹmebon mbufo obufa,+ ibonke ito mfri emi ekemede ndibiara,+ edi ẹbon ẹto mfri+ ubon oro mîkemeke ndibiara,+ oto ke ikọ+ odu-uwem ye nsinsi+ Abasi.
24 Koro “kpukpru obụkidem ẹtie nte mbiet, ndien kpukpru ubọn̄ esie ẹtie nte nsehe mbiet;+ mbiet eyemede, flawa onyụn̄ ekịbe,+
25 edi ikọ Jehovah odu ke nsinsi.”+ Ih, “ikọ”+ oro edi emi, kpa enye oro ẹketan̄ade+ nte eti mbụk ẹnọ mbufo.
Mme Ikọ Idakisọn̄
^ M̀mê, “ẹdian̄arede ẹnịm ẹnọ Abasi.”
^ At. Ed., “ẹtịm ekikere mbufo ndinam utom.”
