Exodus 6;1-30
6 Ntre Jehovah ọdọhọ Moses ete: “Ke emi afo oyokụt se ndinamde Pharaoh,+ koro ọkpọsọn̄ ubọk ayanam enye ayak mmọ ẹnyọn̄ọ, ọkpọsọn̄ ubọk oyonyụn̄ anam enye ebịn mmọ osion̄o ke isọn̄ esie.”+
2 Ndien Abasi ọdọhọ Moses ete: “Ami ndi Jehovah.+
3 Mma nsiwụt Abraham+ ye Isaac+ ye Jacob+ idem, nte Ata Ọkpọsọn̄ Abasi,+ edi amaedi enyịn̄ mi oro Jehovah,+ ami n̄kanamke mmọ ẹdiọn̄ọ.+
4 Mma nnyụn̄ nnam ediomi ye mmọ ndinọ mmọ isọn̄ Canaan, kpa isọn̄ emi mmọ ẹkedụn̄de nte isenowo.+
5 Ami mmonyụn̄ n̄kop mmụm nditọ Israel,+ emi nditọ Egypt ẹsịnde ke ufụn, mmonyụn̄ nti ediomi mi.+
6 “Ntre dọhọ nditọ Israel ete, ‘Ami ndi Jehovah, nyonyụn̄ nda mbufo n̄wọrọ ke idak ufịk nditọ Egypt nnyụn̄ nnyan̄a mbufo nsio ke ufụn+ mmọ nnyụn̄ mfak mbufo ke edinyanade ubọk ye ke ikpọ ubiereikpe.+
7 Nyonyụn̄ nda mbufo nte ikọt mi,+ nnyụn̄ ndi Abasi mbufo;+ ndien mbufo ẹyefiọk ẹte ke ami ndi Jehovah Abasi mbufo emi osiode mbufo ke idak ufịk Egypt.+
8 Ndien nyada mbufo ndụk ke isọn̄ oro n̄kemenerede ubọk n̄n̄wọn̄ọ+ nte ke nyada enye nnọ Abraham ye Isaac ye Jacob; nyonyụn̄ nda enye nnọ mbufo nte ẹda ẹnyene.+ Ami ndi Jehovah.’”+
9 Ekem Moses emen ikọ emi etịn̄ ọnọ nditọ Israel, edi mmemidem ye ọkpọsọn̄ ufụn iyakke mmọ ẹkpan̄ utọn̄ ẹnọ Moses.+
10 Ndien Jehovah ọdọhọ Moses ete:
11 “Dụk ka, kọdọhọ Pharaoh, edidem Egypt,+ ete enye ayak nditọ Israel ẹwọn̄ọ ke isọn̄ esie ẹnyọn̄ọ.”+
12 Edi Moses ọdọhọ Jehovah ete: “Sese! Nditọ Israel ikpan̄ke utọn̄ inọ mi;+ ndien Pharaoh edinam didie akpan̄ utọn̄ ọnọ mi,+ koro ndobide edeme?”*+
13 Edi Jehovah ọdọhọ Moses ye Aaron onyụn̄ ọnọ mmọ ewụhọ ete ẹda ẹketịn̄ ẹnọ nditọ Israel ye Pharaoh, edidem Egypt, man ẹsion̄o nditọ Israel ke isọn̄ Egypt.+
14 Mmọ emi ẹdi mme etubom ufọk mme ete mmọ: Nditọiren Reuben, akpan Israel,+ ẹkedi Hanoch ye Pallu, Hezron ye Carmi.+ Mmọ emi ẹdi mme ubon Reuben.+
15 Ndien nditọiren Simeon ẹkedi Jemuel ye Jamin ye Ohad ye Jachin ye Zohar ye Shaul, eyeneren emi n̄wan oro otode Canaan akamande.+ Mmọ emi ẹdi mme ubon Simeon.+
16 Mmọ emi ẹdi enyịn̄ nditọiren Levi,+ nte ubon mmọ ẹdide:+ Gershon ye Kohath ye Merari.+ Ndien isua uwem Levi ekedi isua ikie ye edịp ye efịteba.
17 Nditọiren Gershon ẹkedi Libni ye Shimei,+ nte ubon mmọ ẹdide.+
18 Ndien nditọiren Kohath ẹkedi Amram ye Izhar ye Hebron ye Uzziel.+ Ndien isua uwem Kohath ekedi isua ikie ye edịp ye duopeta.
19 Ndien nditọiren Merari ẹkedi Mahli ye Mushi.+
Mmọ emi ẹkedi mme ubon nditọ Levi, nte ubon mmọ ẹdide.+
20 Edikem Amram ada Jochebed eyeneka ete esie ọdọ.+ Ekem enye aman Aaron ye Moses ọnọ enye.+ Ndien isua uwem Amram ekedi isua ikie ye edịp ye efịteba.
21 Ndien nditọiren Izhar ẹkedi Korah+ ye Nepheg ye Zichri.
22 Ndien nditọiren Uzziel ẹkedi Mishael ye Elzaphan ye Sithri.+
23 Ekem Aaron ọdọ Elisheba, eyen Amminadab, eyeneka Nahshon.+ Ekem enye aman Nadab ye Abihu, Eleazar ye Ithamar.+
24 Ndien nditọiren Korah ẹkedi Assir ye Elkanah ye Abiasaph.+ Mmọ emi ẹkedi mme ubon nditọ Korah.+
25 Ndien Eleazar, eyen Aaron,+ ọdọ kiet ke otu nditọiban Putiel. Ekem enye aman Phinehas ọnọ enye.+
Mmọ emi ẹdi mme etubom mme ete nditọ Levi, nte mme ubon mmọ ẹdide.+
26 Emi edi Aaron ye Moses emi Jehovah ọkọdọhọde ete:+ “Mbufo ẹda nditọ Israel ẹwọn̄ọ ke isọn̄ Egypt ke udịm ke udịm.”+
27 Edi mmọ ẹkedọhọ Pharaoh, edidem Egypt, ẹte ayak mmimọ ida nditọ Israel iwọn̄ọ ke Egypt.+ Moses ye Aaron oro edi emi.
28 Ekem ke usen emi Jehovah etịn̄de ikọ ye Moses ke Egypt,+
29 Jehovah ọdọhọ Moses ete: “Ami ndi Jehovah.+ Men kpukpru se ndọhọde fi tịn̄ nọ Pharaoh, edidem Egypt.”
30 Ndien Moses ọdọhọ ke iso Jehovah ete: “Sese! Ami ndi owo emi odobide edeme,* ntre Pharaoh edinam didie akpan̄ utọn̄ ọnọ mi?”+
