‘Kontinyen Veye’​—ler Zizman in arive!

Sa lenformasyon dan sa lartik letid i baze lo sa brosir Kontinyen Veye! ki ti sorti dan lasanble distrik ki ti ganny fer dan lemonn antye pandan lannen 2004/05.

‘Kontinyen veye . . . akoz zot pa konnen ki zour zot Senyer pou arive.’—MATYE 24:42.

1, 2. Avek ki Zezi ti konpar son larive?

METON ou ti konnen ki en voler pe pas dan ou vwazinaz e pe antre dan lakaz dimoun, ki ou ti pou fer? Pour protez ou fanmiy ek ou bann byen, ou pou reste vizilan, ou pou veye. Apre tou, en voler pa anvoy en let pour anonse kan i pe vini. Okontrer, i vin trankilman e san ekspekte.

² Ennde fwa Zezi ti servi fason ki en voler i travay konman en legzanp. (Lik 10:30; Zan 10:10) Konsernan bann levennman ki pou arive pandan letan lafen e avan Zezi i arive pour egzekit zizman, Zezi ti donn sa lavertisman: ‘Kontinyen veye alor, akoz zot pa konnen ki zour zot Senyer pou arive. Konpran byen sa: si met lakaz ti konnen ki ler voler pou vini, i pa ti pou dormi e i pa ti pou les voler antre dan son lakaz.’ (Matye 24:42, 43) Alor Zezi ti endike ki i pou ariv san ekspekte zis parey en voler.

3, 4. (a) Ki i enplike dan obeir lavertisman Zezi konsernan son larive? (b) Ki kestyon sa i fer leve?

³ Sa legzanp ti apropriye akoz personn pa ti pou konn dat presi larive Zezi. Pli boner dan sa menm profesi, Zezi ti dir: “Konsernan sa zour e sa ler personn pa konnen kan i pou arive, pa menm bann lanz dan lesyel, ni menm Garson Bondye, me Papa tousel ki konnen.” (Matye 24:36) Alor Zezi ti ankouraz bann dimoun ki ti ekout li: “Met zot pare.” (Matye 24:44) Bann ki obeir lavertisman Zezi ti pou pare, zot ti pou konport zot dan sa bon fason, nenport ler Zezi i vini pour egzekit zizman Zeova.

⁴ Sa i fer lev serten kestyon enportan: Eski lavertisman Zezi i zis pour dimoun dan lemonn, oubyen eski bann vre Kretyen osi i bezwen kontinyen “veye”? Akoz i irzan pour kontinyen veye, e ki sa i enplike?

En Lavertisman pour ki sennla?

5. Ki mannyer nou konnen ki sa lavertisman pour ‘kontinyen veye’ i aplik pour bann vre Kretyen?

⁵ Definitivman larive Senyer pou parey en voler pour dimoun dan lemonn ki inyor lavertisman konsernan sa maler ki pe al arive. (2 Pyer 3:3-7) Me pour bann vre Kretyen? Zapot Pol ti ekrir son bann konpanyon Kretyen: ‘Zot konnen zotmenm ki zour Zeova pou vin konman en voler dan lannwit.’ (1 Tesalonisyen 5:2) I kler dan nou lespri ki ‘zour Zeova pe vini.’ Me eski sa i diminyen nesesite pour nou kontinyen veye? Remarke ki Zezi ti dir sa parol avek son bann disip: “Fis-de-Lonm pou vini ler ki zot pa pe ekspekte li.” (Matye 24:44, nou ki’n met an italik.) Pli boner, ler i ti pe ankouraz son bann disip pour kontinyen rod Rwayonm, Zezi ti averti: “Touzour pare parski Fis-de-Lonm pou vin nenport en ler ki zot pa pe espere.” (Lik 12:31, 40, nou ki’n met an italik.) Pa i kler ki Zezi ti pe mazin son bann  disip ler i ti donn sa lavertisman: ‘Kontinyen veye’?

6. Akoz nou bezwen ‘kontinyen veye’?

⁶ Akoz nou bezwen ‘kontinyen veye’ e “touzour pare”? Zezi ti eksplike: “Pandan sa letan, lo de zonm ki pe travay dan plantasyon, enn pou ganny anmennen, lot kite. Lo de madanm ki pe travay ansanm lo moulen, enn pou ganny anmennen e lot kite.” (Matye 24:40, 41) Sa bann ki montre zot pare pou ganny “anmennen” oubyen sove ler sa lemonn mesan i ganny detri. Lezot pou ganny “kite” pour destriksyon akoz zot in rod zot lentere egois. Sa i kapab enkli serten dimoun ki’n konn laverite me zot pa’n kontinyen veye.

7. Vi ki nou pa konnen kan lafen pou arive, ki sa i permet nou fer?

⁷ Vi ki nou pa konn dat egzakt lafen sa sistenm, sa i donn nou sa loportinite pour montre ki nou servi Bondye pour en bon rezon. Akoz nou dir sa? Petet lafen i paret pran en ta letan pour arive. I tris pour dir ki serten Kretyen ki santi koumsa in les zot devouman pour servis Zeova diminyen. Me par nou dedikasyon, nou’n prezant nou lekor antyerman avek Zeova pour servi li. Bann ki konn Zeova i realize ki en devouman lo dernyen minit pa pou enpresyonn li. I vwar sa ki dan leker.—1 Samyel 16:7.

8. Konman lanmour pour Zeova i pous nou pour kontinyen veye?

⁸ Akoz nou vreman kontan Zeova, nou pran bokou plezir pour fer son lavolonte. (Psonm 40:8; Matye 26:39) Deplis, nou osi anvi servi Zeova pour touzour. Sa lespwar i kontinyen reste presye pour nou, menm si nou bezwen esper en pe pli lontan ki nou ti ekspekte. Pli enportan ankor, nou kontinyen veye akoz nou vreman anvi vwar ki zour Zeova pou vedir dan lakonplisman son plan. Nou dezir senser pour fer plezir Bondye i pous nou pour aplik bann konsey dan son Parol e met son Rwayonm premye plas dan nou lavi. (Matye 6:33; 1 Zan 5:3) Annou aprezan vwar ki mannyer ler nou kontinyen veye i devret enfliyans desizyon ki nou fer e fason nou viv nou lavi sak zour.

Ki Direksyon ou Lavi pe ale?

9. Akoz i irzan pour dimoun dan lemonn ozordi realiz sinifikasyon sa bann keksoz ki pe arive dan nou letan?

⁹ Bokou dimoun ozordi i rekonnet ki bann problenm grav ek levennman sokan pe vin en keksoz ki nou vwar toulezour, e petet zot pa kontan sa direksyon ki zot lavi pe ale. Me eski zot konn vre sinifikasyon kondisyon lemonn? Eski zot realize ki nou pe viv dan “lafen” sa sistenm? (Matye 24:3) Eski zot rekonnet ki sa latitid egois, vyolan, e pa enterese avek Bondye ki popiler ozordi i mark sa letan konman “bann dernyen zour”? (2 Timote 3:1-5) Zot bezwen san tarde realiz sinifikasyon sa bann keksoz e reflesir lo direksyon ki zot lavi pe ale.

10. Ki nou bezwen fer pour fer sir ki nou kontinyen veye?

¹⁰ Ki nou pou dir lo nou menm? Toulezour nou bezwen fer bann desizyon ki enplik nou travay, nou lasante, nou fanmiy ek nou ladorasyon. Nou konnen sa ki Labib i dir, e nou esey fer zefor pour aplik li. Alor, nou devret demann nou lekor: ‘Eski mon’n les traka lavi anvair mon bann lobzektif spirityel? Eski mon pe les bann filozofi lemonn, son fason panse, enfliyans bann swa ki mon fer?’ (Lik 21:34-36; Kolosyen 2:8) Nou bezwen kontinyen montre ki nou met konfyans dan Zeova avek tou nou leker e nou pa apiy lo nou prop konprenezon. (Proverb 3:5) Dan sa fason, nou pou kontinyen sezi “vre lavi,” savedir lavi eternel dan nouvo lemonn Bondye.—1 Timote 6:12, 19.

11-13. Ki nou kapab aprann atraver legzanp sa ki ti arive (a) dan letan Noe? (b) dan letan Lot?

¹¹ Dan Labib i annan bokou legzanp lavertisman ki kapab ed nou kontinyen veye. Annou  egzamin sa ki ti arive dan letan Noe. Bondye ti fer sir ki lavertisman i ganny donnen byen davans. Me apard Noe ek son fanmiy, larestan dimoun pa ti pran kont nanryen. (2 Pyer 2:5) Konsernan sa levennman, Zezi ti dir: “Larive Fis-de-Lonm pou parey sa ki ti arive dan letan Noe. Dan sa bann zour avan deliz bann dimoun ti pe manze e bwar, dimoun ti pe marye e zot ti pe fer marye zot fiy, ziska zour Noe ti antre dan lars. Zot pa ti pran kont nanryen ziska deliz ti vini e balye zot tou. Sa zour ki Fis-de-Lonm pou aparet pou parey.” (Matye 24:37-39) Ki nou kapab aprann atraver sa? Si nou pe les bann traka lavi, menm bann aktivite toulezour, afekte bann aktivite spirityel ki Bondye i ankouraz nou pour kit dan premye plas, dan sa ka nou bezwen mazin seryezman lo nou sitiasyon.—Romen 14:17.

¹² Mazin osi dan letan Lot. Lavil Sodonm, kot Lot ek son fanmiy ti reste, ti en lavil ris me moralite ti vreman ba. Zeova ti anvoy son bann lanz pour detri sa landrwa. Zot ti ankouraz Lot ek son fanmiy pour kit Sodonm e pa get deryer. Zot ti ekout sa ki bann lanz ti ankouraz zot pour fer e zot ti kit lavil. Me i paret ki madanm Lot ti ankor pe mazin son lakaz Sodonm. Alor i ti dezobei lenstriksyon e i ti get deryer e sa ti kout li son lavi. (Zenez 19:15-26) Zezi ti averti nou konsernan nou lavenir e i ti dir: “Rapel byen ki ti ariv Madanm Lot!” Eski nou pe pran aker sa lavertisman?—Lik 17:32.

¹³ Bann ki ti ekout lavertisman Bondye ti ganny sove. Sa ti leka avek Noe ek son fanmiy e osi Lot ek son de fiy. (2 Pyer 2:9) Ler nou reflesir lo lavertisman ki trouve dan sa bann legzanp, nou osi ganny ankouraze par son mesaz delivrans pour bann ki kontan ladrwatir. Sa i fer nou asire ki promes Bondye konsernan “en nouvo lesyel ek en nouvo later kot pou annan lazistis” pou ganny akonpli.—2 Pyer 3:13.

“Ler son Zizman in arive”!

14, 15. (a) Ki sa “ler” zizman i enkli? (b) Ki en dimoun i bezwen fer pour montre i ‘annan lakrent pour Bondye e rann li laglwar’?

¹⁴ Ki nou ekspekte anmezir ki nou kontinyen veye? Liv Revelasyon i dir ki mannyer plan Bondye pou ganny akonpli ptit-a-pti. Si nou anvi montre ki nou pare, i enportan ki nou azir an armoni avek sa ki liv Revelasyon i dir. Sa profesi i dekrir byen kler bann levennman ki pou arive dan “Zour Senyer,” ki ti konmanse ler Kris ti vin Lerwa dan lesyel an 1914. (Revelasyon 1:10) Revelasyon i atir nou latansyon lo en lanz ki’n ganny ‘en levanzil eternel pour anonse.’ I anons avek en lavwa for: ‘Annan lakrent pour Bondye e rann li glwar, parski ler son zizman in arive.’ (Revelasyon 14:6, 7) Sa “ler” zizman i en pti gin letan. I enkli deklarasyon sa zizman e osi byen egzekisyon sa zizman. Ozordi nou pe viv dan sa letan.

¹⁵ Konmela menm, avan ki sa ler zizman i fini, nou ganny ankouraze: ‘Annan lakrent pour Bondye e rann li glwar.’ Ki sa i enplike? Ler nou annan lakrent pour Bondye, sa i devret pous nou pour elwanny nou avek sa ki mal. (Proverb 8:13) Si nou onor Bondye, nou pou ekout li avek bokou respe. Nou pa pou zanmen les okenn lezot aktivite anpes nou lir son Parol, Labib, regilyerman. Nou pa pou vwar son konsey pour asiste renyon konman pa enportan. (Ebre 10:24, 25) Nou pou seri sa privilez pour anons sa bon nouvel lo Rwayonm Bondye e nou pou fer li avek devouman. Nou pou toultan met nou konfyans dan Zeova e nou pou fer li avek tou nou leker. (Psonm 62:8) Vi ki nou rekonnet ki Zeova i Sef Siprenm dan liniver, nou onor li par volonterman soumet avek son dominasyon dan tou laspe nou lavi. Eski ou vreman annan lakrent pour Bondye e donn li laglwar dan tou sa bann fason?

16. Akoz nou kapab dir ki sa zizman kont Gran Babilonn ki Revelasyon 14:8 i mansyonnen in deza fini akonpli?

 ¹⁶ Revelasyon sapit 14 i kontinyen dekrir lezot levennman ki pou arive dan sa ler zizman. Gran Babilonn, ki bann fo larelizyon dan lemonn, i ganny mansyonnen premye: “En lot lanz, en dezyenm, ti swiv sa premye an dizan: ‘I’n tonbe, [Gran Babilonn in] tonbe!’ ” (Revelasyon 14:8) Wi, pour Bondye, Gran Babilonn in deza fini tonbe. An 1919, bann serviter swazir Zeova ti ganny libere avek pratik ek lansennyman Babilonn, ki’n domin dimoun ek bann nasyon pour en pake lannen. (Revelasyon 17:1, 15) Apartir sa letan zot ti kapab donn tou sa ki zot annan pour fer avanse vre ladorasyon. Depi sa letan, sa bon nouvel Rwayonm pe ganny prese dan lemonn antye.—Matye 24:14.

17. Ki nou bezwen fer pour sorti dan Gran Babilonn?

¹⁷ Zizman Bondye kont Gran Babilonn pa fini la. Byento i pou ganny son destriksyon final. (Revelasyon 18:21) Pour sa rezon, Labib i ankouraz dimoun partou: “Sorti dan [Gran Babilonn] . . . pour ou pa partisip dan son bann pese.” (Revelasyon 18:4, 5) Ki mannyer nou sorti dan Gran Babilonn? Fodre nou fer plis ki zis aret asosye avek fo larelizyon. Ozordi lenfliyans Babilonn i egziste dan bokou lafet ek koutim popiler. Nou osi vwar sa lenfliyans dan sa latitid lese fer ki sa lemonn i annan anver limoralite seksyel, dan bann divertisman ki enplik grigri ki pe ogmante, ek bokou lezot. Pour nou kontinyen veye, i enportan ki par nou aksyon e par dezir nou leker nou montre ki nou vreman separe avek Gran Babilonn dan tou son laspe.

18. An rapor avek sa ki Revelasyon 14:9, 10 i dir, ki bann Kretyen vizilan i fer atansyon?

¹⁸ Dan Revelasyon 14:9, 10, nou aprann en lot keksoz konsernan ‘ler zizman.’ En lot lanz i dir: “Si en dimoun i ador sa bebet ek son zimaz e resevwar en mark lo son fron ou lo son lanmen, li osi, i pou bwar diven lakoler Bondye.” Akoz? “Sa bebet ek son zimaz” i reprezant bann dirizan imen, ki pa rekonnet lotorite Zeova. Bann Kretyen ki vizilan i fer byen atansyon pour pa les zot ganny enfliyanse oubyen resevwar en mark, ki swa dan zot latitid oubyen aksyon, ki montre zot pe servi sa bann ki refize rekonnet drwa sa vre Bondye pour dirize. Bann Kretyen i konnen ki Rwayonm Bondye in deza fini etablir dan lesyel, ki i pou met en lafen avek tou dominasyon imen, e ki i pou reste pour touzour.—Danyel 2:44.

Reste vizilan!

19, 20. (a) Anmezir ki nou apros pli pre avek lafen, ki nou kapab asire Satan pou esey fer? (b) Ki nou devret determinen pour fer?

¹⁹ Anmezir ki nou apros pli pre avek lafen, presyon ek tantasyon pou vin pli for. Osi lontan ki nou pe viv dan sa sistenm e ki nou ganny tourmante par nou prop lenperfeksyon, bann keksoz parey move lasante, lavyeyes, lanmor en dimoun pros, dezapwentman ler dimoun pa montre lentere anver nou zefor  pour pres Parol Bondye, e bokou lezot keksoz pou afekte nou. Pa zanmen oubliye ki Satan i byen anvi profit bann presyon ki nou gannyen pour fer nou abandonnen. I oule fer nou aret pres sa bon nouvel oubyen aret viv an armoni avek bann standar Bondye. (Efezyen 6:11-13) La pa en ler pour nou oubliye ki nou pe viv dan en letan irzan!

²⁰ Zezi ti konnen ki nou ti pou anba bokou presyon pour nou abandonnen, alor i ti donn nou sa konsey: ‘Kontinyen veye akoz zot pa konnen ki zour zot Senyer pou arive.’ (Matye 24:42) Alor, annou kontinyen reste vizilan konsernan sa letan ki nou pe viv ladan. Annou vey bann riz Satan ki kapab fer nou ralanti oubyen arete. Annou determinen pour pres sa bon nouvel Rwayonm avek plis devouman ek determinasyon. Wi, annou reste vizilan pandan ki nou obeir lavertisman Zezi: ‘Kontinyen veye.’ Dan sa fason, nou pou anmenn loner pour Zeova e nou pou parmi sa bann ki annan lespwar ganny son benediksyon eternel.

Ki ou pou reponn?

• Ki mannyer nou konnen ki lavertisman Zezi pour ‘kontinyen veye’ i aplik pour bann vre Kretyen?

• Ki legzanp lavertisman dan Labib ki kapab ed nou pour ‘kontinyen veye’?

• Kisisa ler zizman, e ki nou ganny ankouraze pour fer avan i fini?

[Kestyon]

[Portre lo paz 26]

Destriksyon Gran Babilonn i pros