Amose 9:1-15
9 Namwene Yehova ha chilumbilo, yamba ngwenyi: “Pupa masongo ja manguji, mashina machikima. Teta mitwe ya manguji, waze masalaho yami mungwashiha ni mukwale. Niumwe mahasa kuchina hanji kulilamwina wakuhi.
2 Nyi mafula Fuka hanga aswamemo,Yami mungwachizamo ni kwoko liami.Nyi mazezuka mwilu,Yami mungwasunwisamo.
3 Nyi ayo maswama ku mulundu wa Karmela,Yami mungwafupa ndo muze mungwawana, mungwakwata.
Nyi maswama kwishi lia kalunga-lwiji hanga nguchine kwamona,Mungutumako tupela hanga aatote.
4 Nyi maatwala mu undungo kuli akwa-kole jo,Yami mungukatumako mukwale hanga washihe.Mungukahulikila meso jami hali ayo hanga ngwalinge upi, hi upeme ko.
5 Mumu Mwene Yehova wa tujita Iye mwe wakukwata chifuchi,Kashika, chifuchi chakusangunuka, eswe waze atwamamo makalila.Cheswe muchikazala ngwe lwiji Nilo,Muchikahuwa ngwe Nilo wa mu Engitu.
6 ‘Yoze wakutunga ndalo yenyi mwilu,Ni kutunga zuwo lienyi helu lia mavu.Yoze wakukunga meya a mu kalunga-lwijiHanga aamwangine hashi.—Jina lienyi Yehova.’
7 Yehova kanambe ngwenyi: ‘Yenu A-Izalele, shina kuli yami yenu kunushi ngwe ana ja A-Kushe?’
‘Shina hi yami ko nachijile A-Izalele mu chifuchi cha Engitu?Yinguchiza A-Filistea mu chifuchi cha Kreta, ni A-Seria mu chifuchi cha Kiri?’
8 ‘Talenu! Meso ja Mwene Yehova kanatale ha wanangana wa uvulumunyi,Iye makaunongesa hashi lia mavu.
Alioze, akwa-zuwo lia Yakomba chichi kaanongesa eswe,’ chocho anambe Yehova.
9 ‘Talenu! Munguhana shimbi,Mungukukumuna akwa-zuwo lia Izalele hakachi ka mavungu eswe,Ngwe chize akukukumuna kanyingo,Nilimwe liwe liakuholokela hashi liakuhi.
10 Yivulumunyi eswe atwama mukachi ka atu jami, makaashiha ni mukwale.Waze akwamba ngwo: “Lamba kulichi katukundama chipwe kutuwana.”’
11 ‘Ha tangwa lize, mungukatungulula mbalaka ya Ndawichi yize hiyinalimbuka.Mungukashila yituwaNi kutungulula yikulu.Mungukayitungulula, muyikapwa ngwe chize yapwile,
12 Hanga ayo azuke yize muyisala mu Endome,Ni ya ku mavungu eswe waze akwavuluka ha jina liami,’ chocho anambe Yehova yoze unalingi yuma yino.
13 Yehova kanambe ngwenyi: ‘Talenu! Mukukeza matangwa,’‘Muze mukwa-kulima makaheta mukwa-kucha,Ni mukwa-kuliata-liata uva makaheta mukwa-kukuwa mbuto.Vinyu yaha muyikasotwoka ku milunduNi ku mindundena yeswe neko mukukahita vinyu yaha.
14 Mungukahilwisa atu jami A-Izalele waze ayile mu undungo,Ayo makatungulula mambonge waze asalile yikulu,* makatwamamo.Makatumba minda ya uva ni kunwa vinyu yako,Makalima minda ni kulia mihuko yamo.’
15 ‘Yami mungukaatumba mu chifuchi cho,Kechi keza kaatukula nawaMu chifuchi chize naahele,’ chocho anambe Yehova, Zambi yo.”
Footnotes
^ Hanji “ngundu.”
