Amose 4:1-13
4 “Panjikenu liji lino, yenu ngombe a ku Mbashane,Waze nuli ku mulundu wa Samaria.Yenu mapwo nwakupinjisa* akwa-kuhona ni kufwenya yiswale,Nwakwamba kuli malunga* jenu ngwenu: ‘Tunehenenu yimwe tunwe!’
2 Mwene Yehova hanalishingi ni usandu wenyi ngwenyi:‘“Talenu! Mukukeza matangwa waze makanuzundula ni yikungo ya akwa-kuhangula tushitu.Waze makasala, makaazundula ni tuzambu.
3 Yenu munukatuhukila mu yituwa ya yipanga, mutu ni mutu mu chituwa chize chili ku lutwe lienyi.Makanuhuma nukaye ku Harmone,” chocho anambe Yehova.’
4 ‘Tweyenu ku Mbetele nuvulumune.Tweyenu ku Ngilingali nuvulumune chinji kuhiana!
Nehenu yitapo yenu chimene,Ni yihanda yenu ya kumi ha tangwa liamuchitatu.
5 Ochenu mbolo yize yili ni futunwiso ngwe milambu ya usakwililo.Hanjikenu ni liji mwilu hakutwala ku milambu yize yenu ene nwakuhana!
Mumu yino ye yenu A-Izalele nwakuzanga kulinga’ chocho anambe Mwene Yehova.
6 ‘Alioze, yami natomesene mazo jenu mumu te kunushi ni kulia mu mambonge jenu eswe,Nahonesene mbolo mu mazuwo jenu eswe.Chipwe chocho yenu kunwahilukile kuli yami,’ chocho anambe Yehova.
7 ‘Nakwikile nawa vula ha tukweji atatu shimbu kucha te kanda chiheta.Te nakunokesa vula mu mbonge yimwe, alioze mu mbonge yikwo ka.
Mu munda umwe te mwakunoka vula,Alioze mu munda muze kumwanokene vula te wakuma.
8 Atu aali hanji atatu, te kakuya ni kutatangila ku mbonge yikwo hanga anwe meya,Chipwe chocho, meya te keshi kwakuma.Alioze, yenu kunwahilukile kuli yami,’ chocho anambe Yehova.
9 ‘Yami nomishine mbuto yenu ni chivukuminya chinji ni mbundu.
Yenu te nwakwokesa minda yenu ni minda ya mitondo ya uva,Alioze, mapasu te kakulia mikuyu yenu ni mitondo ya olevwe.Chipwe chocho yenu kunwahilukile kuli yami,’ chocho anambe Yehova.
10 ‘Yingutuma yilungo kuli yenu ngwe yize natumine mu Engitu.
Yingushiha akweze ni mukwale ni kutambula tuvwalu.
Vumba lipi lia mu chilombo chenu yingulikandwisa ndo ku mazulu jenu.Chipwe chocho yenu kunwahilukile kuli yami,’ chocho anambe Yehova.
11 ‘Yingununongesa,Ngwe chize nanongesene Sondome ni Ngomora, unongeso uze wakatukile kuli Zambi.
Yenu nwapwile ngwe chipinji cha lukunyi chize achiza ha jiko.Chipwe chocho yenu kunwahilukile kuli yami,’ chocho anambe Yehova.
12 Kashika, chino che mungulinga kuli yenu A-Izalele.
Amu mungulinga chino,Yenu A-Izalele, liluliekenu hanga nuliwane ni Zambi yenu.
13 Talenu! Iye mwe watangile milundu ni fuji.Iye kakulweza atu manyonga JenyiKakwalumuna pangu lipwe milimaKakuliata ha yihela yanangama ya hashi.Jina lienyi Yehova, Zambi wa tujita.”
