Amose 3:1-15

  • Kwambujola cha upatwilo wa Zambi (1-8)

    • Zambi kakusolola yikuma yenyi yize yahengama (7)

  • Sango ja kulimika ni Samaria (9-15)

3  “Yenu A-Izalele, panjikenu maliji wano waze Yehova ahanjikile hakutwala kuli yenu, yenu eswe waze yami nachijile mu chifuchi cha Engitu:  2  ‘Hakachi ka atu eswe a hashi, yingunyingika wika yenu. Kashika mungunufwetesa mumu lia yuma yeswe yipi yize nwalingile.  3  Shina atu aali mahasa kulinga wenyi* chimuwika nyi kalitesele kuliwana?*  4  Shina ndumba kakuhuza mu yambu nyi kanda achikwata kashitu? Shina mwana-ndumba kakuteta ku chivwenge nyi kanda achikwata nichimwe?  5  Shina mutu mahasa kukwata kajila nyi kamutelele kambwila? Shina kambwila liakulisohokela nyi kashitu kaliachilemo?  6  Shina muze chitavwi chakwimba mu mbonge, atu keshi kuchikima? Nyi mu mbonge mwalingiwa luyinda, shina hi Yehova wamuneha ko?  7  Mumu Mwene Yehova kechi kalinga chuma nichimweShimbu kanda achisolola chuma chacho chahengama kuli tuvumbi twenyi, aprofeta.  8  Ndumba hahuza! Iya kechi kwiva woma? Mwene Yehova hahanjika! Iya kechi kuprofeteza?’  9  ‘Ambujolenu mu tuposhi a kukolesa a mu AshedodeNi mu tuposhi a kukolesa a mu chifuchi cha Engitu. Ambenu ngwenu:“Likungululenu hanga nulimike ni mulundu wa Samaria.Talenu chizungo-zungo ni mahuza yize yili mukachi kenyi. 10  Mumu ayo kanyingikine kulinga yuma yalita,” chocho anambe Yehova.“Ayo kakulinga yuma ya upupilo ni ya unongeso mu tuposhi two a kukolesa.”’ 11  Kashika, Mwene Yehova kanambe ngwenyi:‘Umwe mukwa-kole makajingilika chifuchi chino,Makakutambula ndundo je,Tuposhi je a kukolesa makaapupa.’ 12  Yehova kanambe ngwenyi:‘Ngwe chizechene kafunga akutambula molu aali a kashitu hanji chipinji cha twitwi ku kanwa lia ndumba,Chino che muchikalingiwa nawa kuli A-Izalele,Waze ha shimbu lino ali ku Samaria, anatwama ha mihela yo ni yitwamo* yo yipema.’ 13  ‘Panjikenu ni kutoweza akwa-zuwo lia Yakomba,’ chocho anambe Mwene Yehova, Zambi wa tujita. 14  ‘Mumu tangwa lize mungukafwetesa A-Izalele hamukunda wa yitanga yo ya uhulia,Mungukafwetesa nawa yilumbilo ya Mbetele.Mbinga ja ku chilumbilo makajiteta, mujikaholokela hashi. 15  Mungupuzula mazuwo a ha lwiza ni mazuwo a ha lushiho.’ ‘Mungupuzula nawa mazuwo a kutunga ni mazo a njamba,Songo lia mazuwo jo apema muliheta,’ chocho anambe Yehova.”

Footnotes

^ Hanji “kwenda chimuwika.”
^ Hanji “nyi kaliwanyine kulita ni chize alitesanga.”
^ Hanji “yitwamo ya ku Ndamaseku.”

Ulite wa akwa-kusoneka mukanda uno