Amose 1:1-15
1 Maliji hakutwala kuli A-Izalele, waze Amose* wa ku Tekoa umwe wa kuli akwa-kufunga mapanga atambwile mu usolwelo ha matangwa ja Uzia mwanangana wa Yunda, ni ha matangwa ja Jeroboame mwana wa Njoashe mwanangana wa Izalele ha miaka yaali kunyima shimbu munyiko te kanda uchilingiwa.
2 Iye yamba ngwenyi:
“Yehova makakulunguza mu Zaione,Makakololoka ni liji linene mu Yerusaleme.
Yihela yize tufunga akulishila yimuna yo muyikalila,Ni helu lia mulundu wa Karmela muhakoma.”
3 “Yehova kanambe ngwenyi:“‘Mumu lia yuma yitatu ya uhulia yize Ndamaseku alingile ni mumu lia yuma yiwana, chichi kufuna kunyima,Mumu ayo hafwenyonya Ngiliate ni chikungo cha utale cha kuzungula nacho.
4 Kashika mungutuma kahia ku zuwo lia Hazaele,Kahia kacho mukocha tuposhi a kukolesa a ku Mbene-Hadade.
5 Mungumakuna yikungo ya kwajila nayo yajilo ya ku Ndamaseku,Mungukanongesa akwa-AveneNi yoze wakuyula* mu Mbete-Endene,Atu a mu Seria makaatwala mu ufunge ku Kiri,” chocho anambe Yehova.’
6 Yehova kanambe ngwenyi:‘“Mumu lia yuma yitatu ya uhulia yize Ngaza alingile ni mumu lia yuma yiwana, chichi kufuna kunyima,Mumu ayo kambachile chizavu cha muundu cha funge hanga achikunjike kuli Endome.
7 Kashika, mungutuma kahia ku yipanga ya Ngaza,Kahia kacho mukocha tuposhi twenyi a kukolesa.
8 Mungukanongesa akwa-AshedodeNi yoze wakuyula Asekalone,Kwoko liami mulikalimika ni Ekrone,A-Filistea waze makasalaho makafwa,” chocho anambe Mwene Yehova.’
9 Yehova kanambe ngwenyi:“Mumu lia yuma yitatu ya uhulia yize Teru alingile ni mumu lia yuma yiwana, chichi kufuna kunyima,Mumu ayo kakunjikile chizavu cha muundu cha funge kuli A-Endome,Chikwo nawa, mumu kavulamine usendo wa undumbu.
10 Kashika, mungutuma kahia ku yipanga ya Teru,Kahia kacho mukocha tuposhi twenyi a kukolesa.’
11 Yehova kanambe ngwenyi:‘Mumu lia yuma yitatu ya uhulia yize Endome alingile ni mumu lia yuma yiwana, chichi kufuna kunyima,Mumu iye kakawile mwana-kwo ni mukwale,Yalituna kumusolwela keke,Mu ufwatulo wenyi, machinunga ni kwashiha ni keke yakuhiIye machinunga ni kwevila uli ku miaka yeswe.
12 Kashika, mungutuma kahia ku Temane,Kahia kacho mukocha tuposhi a kukolesa a ku Mbozera.’
13 Yehova kanambe ngwenyi:‘“Mumu lia yuma yitatu ya uhulia yize A-Amone alingile ni mumu lia yuma yiwana, chichi kufuna kunyima,Mumu ayo kapulile majimo ja mapwo tufumba a ku Ngiliate hanga atohwese chifuchi cho.
14 Kashika, mungwocha yipanga ya Raba,Kahia kacho mukocha tuposhi twenyi a kukolesa,Ni muteto wa jita ha tangwa lia jita,Hamwe ni kangonga ha tangwa lia chijimbi.
15 Mwanangana wo makamutwala mu undungo hamuwika ni yilolo jenyi,” chocho anambe Yehova.’
