Amose 6:1-14
6 “Lamba kuli atu a mu Zaione waze akulijikijila ene,Waze akuliva mu ufunge upema ku mulundu wa Samaria,Malunga a lufuma, a ku vungu lilemu kuhiana mavungu eswe,Atu waze kuze akwa-zuwo lia Izalele akuchinyina!
2 Yeenu ku Kalenehe numone,
Kukatuka koko, nuye ku Hamate yineneMba munupalumuka ku Ngata ya A-Filistea.
Shina ayo kanahiana mawanangana wano?Nyi shina chifuchi cho chili chinene kuhiana chifuchi chenu?
3 Shina hinwavulama tangwa lia lambaHinwaputuka kulinga yuma ya upupilo?
4 Ayo kakupomba ha mihela ya mazo a njamba, ni kutandala mu yitwamo,Kakulia kuji a mapanga ni ana-ngombe a maji.
5 Kakulumba miaso ya kwimba ni tulialia*Kakulumba yisaji ya kwimba nayo miaso ngwe Ndawichi.
6 Ayo kakunwina vinyu mu misenge yinene-yineneKakulikwita maji apema chinji.
Alioze keshi kupala lamba lia Yosefwe!
7 Kashika, makapwa atangu kuya mu ufunge,Yiwanyino ya chimbangwinya ya waze akutandala mu yitwamo muyikahwa.
8 ‘Mwene Yehova kalishinga mu jina lienyi,’ chocho anambe Yehova, Zambi wa tujita:‘“Nakwivila lwaji kulizata cha Yakomba,Chishi kuzanga yipanga yenyi ya kukolesaMungukunjika mbonge ni yuma yeswe yize yilimo.
9 “‘“Nyi ku limwe zuwo mukusala atu kumi, no makafwa.
10 Usoko wo umwe makeza ni kwambata ni kwatwala haze ni kwocha umuwika-umuwika. Iye makatuhwisa yifwaha yo mu zuwo, mba makahula mweswawo makapwa mu chipatulo cha zuwo ngwenyi: ‘Neya uli?’ Iye makakumbulula ngwenyi: ‘Nguli ukawami!’ Kashika iye makamba ngwenyi: ‘Hola! Mumu wano hi mashimbu ko a kutongola jina lia Yehova.’”
11 Mumu Yehova kanahana shimbi ngwenyi,Iye makapuzula zuwo lino linene ni kulihichika milumba yamokomoko,Makapuzula nawa zuwo likehe ni kulihichika milumba yamokomoko.
12 Shina tuvwalu kakuzomboka ha liwe linene?Shina kuli umwe yoze wakulimaho ni ngombe?
Mumu yenu hinwalumuna ululi, hiwapwa chiputa chize chikwete ulembe,Hinwalumuna ululi upwe usasu.
13 Yenu nwakuwahilila ni yuma yamokomokoNwakwamba ngwenu: “Ngwami hitwapwa akwa-ndundo ku tachi jetu?”
14 Kashika, yenu akwa-zuwo lia Izalele, mungukaneha vungu limwe likalimike ni yenu,’ chocho anambe Yehova, Zambi wa tujita,‘Ayo makanumwesa lamba chize ku Lebo-Hamate ndo ku mungulunga* wa Arapa.’”
