Amose 7:1-17
7 Mwene Yehova yangusolwela chikuma chino: Iye yakunga chizavu cha mapasu muze mbuto yaputukile kusoka. Mbuto yino yasokele muze te hateta mwambu uze akutwala kuli mwanangana.
2 Muze chizavu cha mapasu chahwishile kulia yambu yeswe ya hashi, yingwamba ngwami: “Mwene Yehova, lisesa, tukonekene! Kuchi Yakomba mahasa kununga ni mwono?* Iye kali mulelu!”
3 Chocho, Yehova yalumuna nyonga lienyi. Yehova yamba ngwenyi: “Chichi kulingiwa.”
4 Yino ye Mwene Yehova angusolwelele: Mwene Yehova yatuma kahia hanga aamwese lamba. Kahia yikomisa meya anji ni kwocha chihanda cha chifuchi.
5 Chocho yingwamba ngwami: “Mwene Yehova, kanda ulinga kama chuma chino! Nyi ka, Yakomba kechi kuhasa kununga ni mwono,* iye kali mulelu!”
6 Chocho, Yehova yalumuna nyonga lienyi. Mwene Yehova yamba ngwenyi: “Chino necho kuchichi kalingiwa.”
7 Yino ye iye angusolwelele: Namwene Yehova kanamana ha chipanga cha kutunga ni lwoji wa kweseka nenyi, te kanakwata lwoji wa kweseka nenyi.
8 Mba Yehova yanguhula ngwenyi: “Amose, yika unamono?” Yingukumbulula ngwami: “Ngunamono lwoji wa kweseka nenyi.” Chocho Yehova yamba ngwenyi: “Ngunase lwoji wa kweseka nenyi hakachi ka atu jami A-Izalele. Chichi kaakonekena nawa.
9 Manangamo asandu ja Izake makasala a hululu, ni yihela yisandu ya Izalele makayinongesa. Yami mungukeza ni kulimika ni akwa-zuwo lia Jeroboame ni mukwale.”
10 Amazia sasendote wa Mbetele yatuma lusango yono kuli Jeroboame, mwanangana wa Izalele ngwenyi: “Amose kanakutwama punga mukachi ka A-Izalele. Atu mahonga ha kwiva yuma yize iye anambe.
11 Mumu Amose kanambe ngwenyi: ‘Jeroboame mamushiha ni mukwale, pundu lume, A-Izalele makaachiza mu chifuchi cho ni kwatwala mu ufunge.’”
12 Amazia yamba kuli Amose ngwenyi: “Yena mukwa-kumona usolwelo, katuka kuno! Yako ku chifuchi cha Yunda, ukafupe kulia che kuze, ni kuprofetezela ko.
13 Alioze, kanda uprofeteza nawa muno mu Mbetele, mumu chili chihela chisandu cha mwanangana, tembele ya wanangana.”
14 Chocho, Amose yakumbulula Amazia ngwenyi: “Yami kwami te hi nguli profeta ko, chipwe mwana wa umwe profeta. Alioze, napwile mukwa-kufunga yimuna, chikwo nawa te nakufunga mitondo ya mikuyu.
15 Alioze, Yehova yanguchiza ku mulimo wa kufunga yimuna, Yehova yamba kuli yami ngwenyi: ‘Yako uprofetezele atu jami A-Izalele.’
16 Haliapwila, panjika liji lia Yehova: ‘Yena unambe ngwe: “Kanda uprofeteza mu kulimika ni A-Izalele, kanda wambujola mu kulimika ni akwa-zuwo lia Izake.”
17 Kashika, Yehova kanambe ngwenyi: “Pwo lie makapwa chikoi mu mbonge, ana je a malunga ni a mapwo makaashiha ni mukwale. Chifuchi che makachiteta ni lwoji wa kweseka nenyi. Yena mukafwila mu chifuchi cha luchisa. Pundu lume, A-Izalele makaachiza mu chifuchi cho ni kwatwala mu undungo.”’”
