Amose 2:1-16
2 “Yehova kanambe ngwenyi:‘“Mumu lia yuma yitatu ya uhulia yize Moape alingile ni mumu lia yuma yiwana, chichi kufuna kunyima,Mumu iye kochele yifwaha ya mwanangana wa Endome hanga alinge nayo pemba.
2 Kashika mungutuma kahia hali Moape,Kahia kacho mukocha tuposhi a kukolesa a ku Keriote,Moape makafwa mukachi ka chizungo-zungo,Ni muteto wa jita ni kwimba cha chitavwi.
3 Mungukachiza mukwa-kuyula mukachi ko,Mungukamushiha hamuwika ni yilolo jenyi,” chocho anambe Yehova.’
4 Yehova kanambe ngwenyi:‘Mumu lia yuma yitatu ya uhulia yize Yunda alingile ni mumu lia yuma yiwana, chichi kufuna kunyima,Mumu ayo kehuka shimbi ya Yehova,Kafungile yiyulo yenyi,Mumu ayo kaapiangwile ni mahuza aze ene tulamba two akawile.
5 Kashika, mungutuma kahia mu Yunda,Kahia kacho mukocha tuposhi a kukolesa a mu Yerusaleme.’
6 Yehova kanambe ngwenyi:‘Mumu lia yuma yitatu ya uhulia yize A-Izalele alingile ni mumu lia yuma yiwana, chichi kufuna kunyima,Mumu ayo kakulanjisa mukwa-ululi ni prata,Kakulanjisa chiswale ni haku.
7 Ayo kakuliata-liata mu fufuta mitwe ya akwa-kulikehesaKakuyika jila ya yimbovu.
Mwana ni tato kakulimona ni mwana-pwo umuwika,Chocho malelesa jina liami lisandu.
8 Ayo kakuzala mahina hakamwihi ni yilumbilo yeswe, mahina waze atambwile ngwe chijikilo cha kongo,Mbongo jize akulanda najo vinyu yize akunwina mu zuwo lia tuzambi two kakujitambula kuli atu.’
9 ‘Alioze yami mwe nanongesene A-Amore kumeso jo,Waze apwile asuku-asuku ngwe mutondo wa sedru, apwile yitakame ngwe mutondo wa karvaliu,Yami nanongesene mihuko yo kwilu ni miji kwishi.
10 Yami mwe nanuchijile mu chifuchi cha EngituYingunwendesa mu puya ha miaka 40,Hanga nuzuke chifuchi cha A-Amore.
11 Yingusakula amwe a kuli ana jenu hanga apwe aprofetaNi amwe a kuli akweze jenu hanga apwe Anazireu.
Hi chocho ko, yenu A-Izalele?’ chocho anambe Yehova.
12 ‘Alioze yenu yinuhana vinyu kuli AnazireuNi kukanjisa aprofeta ngwenu: “Kanda nuprofeteza.”
13 Kashika, yami mungukanufwenyonya kuze nuli,Ngwe chize temba lize linambate yichita ya mbuto liakufwenyonya chuma cheswacho chize muliliata.
14 Yoze wakuzomboka chinji kechi kamona kuze makachinyina,Chitakame kechi kapwa nawa ni tachi,Niumwe kajita makalilamwina wakuhi.
15 Mukwa-kwasa mivwi kechi kamana ha chihela chenyi,Yoze ukwete tambu kechi kahasa kuchina,Ni mukwa-kwendesa kavwalu kechi kahasa kulilamwina.
16 Chipwe lume kajita yoze ukwete hamu linji,Makachina uselesele ha tangwa liacho,’ chocho anambe Yehova.”
