Amose 5:1-27
5 “Yenu akwa-zuwo lia Izalele, panjikenu maliji wano akulimika ni yenu ngunanulweze mu lungungu:
2 ‘Izalele mwana-pwo yoze kanda achilimona ni lunga halimbuka.Iye kechi kuhasa kukatuka nawa.
Hamumba nyima mu chifuchi chenyi.Keshi ni yoze mamukatwisa.’
3 “Mumu Mwene Yehova kanambe ngwenyi:
‘Mbonge yize yakuya ku jita ni atu kanunu, muyikasala ni atu lukama.*Mbonge yize yakuya ni atu lukama, muyikasala ni atu kumi. Yino ye muyikalingiwa kuli A-Izalele.’
4 “Yehova kanambe kuli akwa-zuwo lia Izalele ngwenyi:
‘Ngufupenu, nununge ni mwono.
5 Kanda nufupa Mbetele,Kanda nuya ku Ngilingali chipwe ku Mbia-shipa.Mumu pundu lume, Ngilingali muyikaya mu ufunge,Mbetele makayinongesa.
6 Fupenu Yehova nununge ni mwono,Hanga kanda anunongesa yenu munyachi wa Yosefwe ngwe chize kahia kakunongesaNi kwocha Mbetele chakuhona mutu niumwe yoze mahasa kujima kahia.
7 Yenu nwakwalumuna ululi hanga upwe usasuNwakumbila ululi hashi.
8 Yoze watangile chizavu cha tutongonoshi Kima ni Keshile,Yoze wakwalumuna milima pwi yipwe chimene,Yoze wakwalumuna tangwa lilae pwi ngwe ufuku,Yoze wakukunga meya a mu kalunga-lwijiHanga aamwangine hashi.— Jina lienyi Yehova.
9 Iye makaneha unongeso susumuku hali yitakame,Makanongesa yihela ya kukolesa.
10 Ayo kakwivila kole waze akukumika akwo ku chikolo cha mbonge,Keshi kuzanga waze akuhanjika umwenemwene.
11 Amu nwakushinjila yiswale afwetele mindaNi kwatambula mbuto ngwe lijimu,Kunuchi kununga ni kutwama mu mazuwo a mawe akusonga waze nwatungileChipwe kunwa vinyu ya mu minda yipema ya uva yize nwalimine.
12 Mumu yami ngunanyingika yitanga yenu yeswe ya uhuliaNi uvulumunyi wenu weswe.Yenu nwakumwesa lamba mukwa-ululi,Nwakutayiza mbongo hanga nuhise yoze keshi ni mulonga,Kunushi kupatwila yiswale ni ululi ku chikolo cha mbonge.
13 Kashika, ha shimbu liacho akwa-mana* makahola kuluu,Mumu makapwa mashimbu a lamba.
14 Lingenu yuma yipema, kanda nulinga yuma yipi,Hanga nununge ni mwono.
Mba Yehova, Zambi wa tujita makapwa hamwe ni yenu,Ngwe chize nwakwamba ngwenu kali hamwe ni yenu.
15 Vilenu lwaji yuma yipi, zangenu yuma yipema,Echenu hanga ululi woke ku chikolo cha mbonge.
Hanji Yehova, Zambi wa tujita,Mevila keke masalila ja Yosefwe.’
16 “Kashika, Yehova, Zambi wa tujita Yehova, kanambe ngwenyi:
‘Ha yitanda yeswe muhakapwa kulinyenga,Atu makateta mu matapalo eswe ngwo: “Mama yami! Mama yami!”
Makasanyika njimi hanga alileMakasanyika waze anyingika kulinyenga hanga alinyenge.’
17 ‘Mu minda yeswe ya uva mumukapwa mbimbi.Mumu yami mungukapalika mukachi kenu,’ chocho anambe Yehova.
18 ‘Lamba kuli waze akushimbwila tangwa lia Yehova!
Kuchi tangwa lia Yehova mulikapwa kuli yenu?
Mulikapwa tangwa lia milima hi lia pangu ko.
19 Mulikapwa ngwe muze umwe mutu anachina ndumba, alioze malitakana ni ursu,Mba muze manjila mu zuwo, mashachila kwoko ku chikalakala, kapela mamutota.
20 Tangwa lia Yehova mulikapwa tangwa lia milima hi lia pangu koMulikapwa tangwa lia milima pwi hi lia pangu ko.
21 Yami chishi kuzanga yiwanyino yenu,Nakuyivila lwaji, chishi kuwahilila ni vumba lia kukunguluka chenu chinene.
22 Chipwe ngwe yenu munungwaha milambu ya kulumba ni yawana,Nihindu yami chichi kuwahilila nayo.Chichi kutayiza milambu yenu ya sambukila ya yimuna a maji.
23 Chizenu kuli yami zungo lia miaso yenu.Chazangile kwiva miaso ya yisaji yenu ya kusa.
24 Ululi upukumuke ngwe meya,Ululi upwe ngwe lwiji yoze keshi kuma.
25 Yenu akwa-zuwo lia Izalele, muze nwapwile mu puya ha miaka 40,Shina te nwakungunehena milambu ni yawana?
26 Haliapwila munumbata mwanangana wenu Sakute ni Kaiwana,Tuponya waze nwalilingilile a katongonoshi wa zambi yenu,
27 Yami mungukanutuma mu undungo kusuku ni Ndamaseku,’ chocho anambe yoze ukwete jina lia Yehova, Zambi wa tujita.”
