Ang International Bible Students, nga nailhan sa ulahi ingong mga Saksi ni Jehova, unang nag-organisar ug pagsangyaw ngadto sa maabiabihong mga tawo sa Mexico niadtong 1917. Gatosan ka sinserong mga tawo ang midangop sa matuod nga pagsimba sa misunod nga mga dekada. Pero panahon sa Gubat Kalibotan II, naay mitunghang isyu gikan sa gobyerno sa Mexico bahin sa mga lokasyon ug bilding diin ta nagsangyaw ug nagtigom.

 Niadtong panahona, ang balaod sa Mexico nag-ingon nga ang tanang buhat sa publikong pagsimba kinahanglang himoon sa mga bilding nga iya sa gobyerno. Nahimo ning problema kay ang atong mga kombensiyon ginahimo sa publikong mga pasilidad, ang atong senemanang mga tigom sagad ginahimo sa mga balay sa mga Saksi ni Jehova, ug nagsangyaw ta diha sa kadalanan ug sa balay ug balay.

 Aron masunod ang balaod, niadtong 1943 nagparehistro ta ingong nonprofit nga sibil ug kultural nga asosasyon nga nagtabang sa pag-edukar sa mga tawo aron mouswag ang ilang kinabuhi. Nagpasabot ni nga naa tay mga katungod ingong kultural nga organisasyon, dili ingong relihiyon. Ingong resulta, ang atong panagkatigom ug pagsangyaw dili lang diha himoon sa mga bilding nga iya sa gobyerno.

 Ang atong mga kalihokan naay mga programa nga kultural ug makatudlo sa mga tawo. Busa, gisunod namo ang tanan nga gipatuman o gipangayo sa gobyerno nga himoon sa sibil ug kultural nga mga organisasyon. (Roma 13:1) Siyempre, tumong gihapon namo nga tabangan ang mga tawo pinaagi sa pagtudlo kanila sa kamatuoran sa Bibliya. (Isaias 48:17, 18) Nakita dayon namo nga gipanalanginan ni Jehova ang bag-ong kahikayan. Tungod niini, mas daghan pang tawo ang nakakat-on sa kamatuoran, sumala sa nahinumdoman sa daghang na-Saksi niadtong panahona.

 Ang among pangunang buluhaton sa Mexico mao gyod ang pagsangyaw sa maayong balita sa Gingharian sa Diyos. Pero sama kang apostol Pablo, gi-adjust namo ang among paagi sa pagministeryo sumala sa kahimtang. (1 Corinto 9:20-23) Pananglitan, dihang nakig-estorya si Pablo ngadto sa mga taga-Atenas didto sa Areopago, wala niya direktang gihisgotan ang Kasulatan. (Buhat 17:22-31) Sa susama, dihang magsangyaw ang mga igsoon sa Mexico, dili sila magdalag Bibliya o maghisgot niini dihang makig-estorya sa mga tawo.

 “Ipailaila namo ang among kaugalingong ingong mga representante sa organisasyon nga kultural ug nagatudlo sa mga tawo,” nahinumdom si Isabel. “Sagad magpokus ko sa mga artikulo sa Pagmata! nga wala direktang maghisgot sa mga topiko sa Bibliya.” Komosta kon ang tagbalay gustong makakat-on ug dugang bahin sa Diyos? Amo na siyang sultihan bahin sa kamatuoran sa Bibliya. “Kay dili man mi magdalag Bibliya,” miingon si Aurora, “kinahanglan ming mag-memorize ug daghang teksto.” Ganahan pod ang mga tagbalay kon gamiton namo ang ilang kaugalingong Bibliya.

 Andam mi kon unsaon pagtubag niadtong mokuwestiyon kon legal ba ang among ginabuhat. (Filipos 1:7) Dako kaayog tabang ang identification card nga aprobado sa gobyerno. a “Pirme namong dalhon ang identification card nga gipirmahan sa Secretary of Foreign Affairs,” ingon si María. “Dihang pahunongon mi sa mga awtoridad ug pangutan-on mi kon unsay among ginabuhat,” miingon si Samuel, “ipakita namo ang among card ngadto kanila.”

 Ang among identification card nakatabang namo dihang naay mosupak sa among buluhaton. Pananglitan, si Jesús, nga nag-alagad sa Jalisco State, miingon: “Niadtong 1974, ako ug ang usa ka Saksing magtiayon gidala sa usa ka grupo sa mga tawo nga gipangunahan ug pari ngadto sa lokal nga mga awtoridad aron pahunongon mi sa among buluhaton. Gipakita namo ang among identification card ngadto sa mga awtoridad, ug tungod niana mikalma ang tanan. Human makadawat ug legal nga tabang, gipadayon namo ang pagtabang sa mga interesado. Karon, ubay-ubay na ang kongregasyon niining siyudara.”

 Ingong sibil nga asosasyon nga nagtudlo sa mga tawo, nagtanyag mi sa publiko ug libreng mga kurso sa pagbasa ug pagsulat. b “Kini nga kahikayan haom gyod niadtong panahona,” miingon si Ariel. “Niadtong mga tuiga, daghan ang wala makaeskuwela, pero gusto gyod kaayo nilang mobasa ug Bibliya. Tudloan namo sila sa pagbasa ug pagsulat, ug di madugay, daghan ang magtuon sa Bibliya uban namo.”

 “Dihang nakakat-on silag spelling,” nahinumdom si Ruth, “wala na gyoy makapugong nila. Ang pagkat-on sa pagbasa ug pagsulat nagpabati nila nga naa silay importanteng nahimo ug nakapalipay ni nila. Nakita namo ang ilang pag-uswag sa espirituwal human adto.”

 Ang mga Saksi ni Jehova narehistro ingong sibil ug kultural nga asosasyon gikan sa 1943 hangtod 1993. Niadtong panahona, nakatabang tag kapin sa 127,000 ka tawo nga makakat-on sa pagbasa ug pagsulat, ug kapig 37,000 nga uban pa nga mouswag niana. Ang mga opisyales sa gobyerno nakadayeg sa atong nahimo niining bahina. (Roma 13:3) Pananglitan niadtong 2010, gihatagan ta nilag award para sa atong “talagsaong paningkamot nga makatabang sa mga tawo sa daghang dekada aron makakat-on sila sa pagbasa ug pagsulat. Ug nakatabang ni sa linibo ka Mexican sa state sa Mexico ug sa tibuok nasod nga mouswag ang ilang kinabuhi.”

 Tungod sa atong legal nga pagkarehistro, ang atong mga tigomanan gi-set up nga morag classroom ug gitawag kinig Halls for Cultural Studies. Dinhi ginahimo ang atong mga tigom ug ang mga klase para sa pagkat-on sa pagbasa ug pagsulat.

 “Kini nga mga hall maoy sagad balay sa mga igsoon,” miingon si Ángel, “ug daghan niini nga mga pamilya ang dili dato. Maong nakadayeg gyod ko nila. Okey ra nila nga magtapok sa usa ka bahin sa ilang balay aron magamit sa mga tigom ang usa pa ka bahin.”

 Gikinahanglan gyod ang maong mga sakripisyo. Bahin sa mga tigom sa kongregasyon, si Ángel nahinumdom: “Usahay, tungod sa kadaghan sa nanambong, ang uban nanindog na lang sa gawas. Ug kon gusto ming mokomento, molili lang mi sa bentana. Pero mag-enjoy gyod mi pirme sa tigom.”

 Aron makalikay sa mga problema, dili mi mag-ampo ug kusog o manganta panahon sa mga tigom. Si Edmundo nahinumdom: “Panahon sa Cultural Talk, nga karon gitawag ug pakigpulong publiko, ipasiugda sa mga mamumulong kon unsa ka praktikal ang mga tambag sa Bibliya aron tabangan ang mga naminaw nga mouswag ang ilang kultura ug ang ilang kinabuhi.” Miabot pa gani ang panahon nga wala na nila gamita ang mga ngalan sa mga basahon sa Bibliya. Unsaon nila paghisgot ang mga teksto? Si Manuel miingon: “Imbes moingon mig Pinadayag kapitulo 21, bersikulo 3 ug 4, moingon mig, ‘Basahon 66, sa 21, 3 ug 4.’” Ang laing Saksi nga si Moises midugang: “Kinahanglan gyod namong ma-memorize kon unsay numero sa mga basahon sa Bibliya aron makita namo ang teksto.”

 Sa katibuk-an, ang gihimo sa atong organisasyon sa Mexico parehas ra sa ginahimo niini sa ubang mga lugar sa kalibotan. Bisag naay mga restriksiyon ang atong pagsimba, klaro nga gipanalanginan kini ni Jehova. Dihang nagparehistro ta ingong sibil nga asosasyon niadtong 1943, 1,565 ang mga magmamantala sa Mexico. Narehistro ta didto ingong relihiyon niadtong 1993. Nianang tuiga, ang average nga gidaghanon sa mga magmamantala miabot nag 366,177. Tungod sa paningkamot niini nga mga magmamantala, mas miuswag pa ang ilang gidaghanon. Pagka-2021, ang average nga gidaghanon sa mga magmamantala sa Mexico miabot nag 864,633. Unsay atong makat-onan niini nga kasaysayan sa Mexico?

 Pag-adjust dihang naay mga problema. Kay ato ning gihimo, legal tang narehistro sa Mexico sulod sa 50 ka tuig. Si Mario miingon: “Usahay, maghunahuna ko kon nganong lahi ang among mga kahikayan sa pag-alagad kang Jehova kon itandi sa ubang nasod. Pero wala gyod koy nadunggan nga naay mikuwestiyon sa giya sa organisasyon. Nagtuo gyod mi nga gigiyahan ni Jehova ang iyang katawhan. Maong misunod gyod mi.”

 Pagpokus sa buluhaton ni Jehova. “Nagpabilin ming busy sa paghimog mga tinun-an maong wala kaayo mi panahon nga mabalaka sa ubang butang,” miingon si Guadalupe. “Malipayon kaayo mi sa pag-alagad kang Jehova. Para namo, mao ni ang pinakaimportante.”

 Pabiling suod sa imong mga isigka-Kristohanon. “Ang dili namo mahimo sa Hall for Cultural Studies, sama sa pagkantag mga Kingdom song, himoon namo sa among mga balay,” miingon si Anita. “Nagpabilin ming nahiusa ug pirme ming mogahin ug panahon sa usag usa. Sa among tapoktapok, ganahan ming maghisgot ug espirituwal nga mga butang.”

 Bahin sa mga nahitabo sa maong mga tuig, si Florentino miingon: “Dihang hinumdoman nako ang mga nahitabo, makaingon ko nga nakahatag to namog kaayohan kay naa mi importanteng nakat-onan. Klaro kaayo nako nga sa tanang nahitabo, bisag naay misupak sa among buluhaton, gigiyahan gyod mi ni Jehova.”