Nganong Daghan ang Naglibog Kon Unsa ang Balaang Espiritu?

UNSA ang balaang espiritu? Simple lang kini nga pangutana, apan daw lisod ang pagpangitag simpleng tubag niini. Si Papa Benedict XVI miingon diha sa iyang pakigpulong sa Australia: “Daw imposible nga masabtan kon unsa gayod ang Espiritu.”

Dayag, ang mga tawo lainlaig opinyon ug dili segurado sa tubag sa pangutana nga, Unsa ang balaang espiritu? Ang mosunod maoy sagad nga tubag sa mga tawo:

• Usa ka persona nga anaa sa sulod sa lawas sa mga disipulo ni Kristo.

• Presensiya sa Diyos sa kalibotan.

• Ang ikatulong persona sa Trinidad.

Nganong managlahi ang opinyon sa mga tawo? Sukad pa niadtong ikaupat nga siglo C.E. ang mga tawo nalibog na niini tungod kay ang ubang mga teologo nagtudlo nga ang balaang espiritu maoy usa ka persona nga katupong sa Diyos. Apan kanang ideyaha wala itudlo sa Kasulatan o sa unang mga sumusunod ni Kristo. Ang The New Catholic Encyclopedia nag-ingon: “Ang Daang Tugon wala maghubit sa espiritu sa Diyos ingong persona . . . Ang espiritu sa Diyos mao ang gahom sa Diyos.” Ang maong basahon nag-ingon usab: ‘Daghang teksto diha sa Bag-ong Tugon nagpakita nga ang espiritu sa Diyos dili usa ka persona; kini gihubit nga susama sa gahom sa Diyos.’

Siyempre, ang mga tawo dili gayod maghunahuna nga ang gahom maoy usa ka persona. Gani, gipadayag sa bag-ong surbi sa Amerika nga daghang tawo ang dili motuo sa ideya nga ang balaang espiritu maoy usa ka persona. Husto ba sila? O tuohan ba nato ang gitudlo sa mga teologo nga ang “Espiritu Santo maoy usa ka Persona nga lahi sa Amahan ug sa Anak”?

Alang sa hustong tubag, angay nga atong tun-an ang Pulong sa Diyos nga mao ang Bibliya, nga nagsaysay kon unsa gayod ang balaang espiritu. Si apostol Pablo misulat: “Ang tibuok Kasulatan inspirado sa Diyos ug mapuslanon sa pagtudlo sa kamatuoran, ug sa pagtul-id sa mga sayop.”—2 Timoteo 3:16, Today’s English Version.

Nganong angay nimong sayron ang kamatuoran bahin sa balaang espiritu? Ang pagkahibalo niana mohatag kanimog kahigayonan nga madawat ang tabang sa Diyos. Diha bay mga higayon nga nagkinahanglan kag tabang tungod kay daw dili ka na makalahutay? Si Jesus nagsaad sa iyang mga disipulo: “Padayon sa pagpangayo, ug kini igahatag kaninyo . . . Kon kamo . . . mahibalong mohatag ug maayong mga gasa ngadto sa inyong mga anak, unsa ka labaw pa gayod nga ang inyong Amahan sa langit mohatag ug balaang espiritu niadtong nagapangayo kaniya!”—Lucas 11:9, 13.

Isaysay sa mosunod nga mga artikulo kon unsay giingon sa Bibliya bahin sa balaang espiritu. Ug atong tan-awon kon sa unsang paagi kini makatabang sa atong kinabuhi.

[Blurb sa panid 3]

Ang Kasulatan nagpadayag kanato kon unsa ang balaang espiritu