Malumo Apan Kusgang Shetland Pony

● Kon nakaadto ka nag zoo sa ubang dapit, tingali nakakita ka o kaha nakasakay nag Shetland pony. Ang ngalang Shetland pony naggikan sa Shetland Islands, sa amihanan-sidlakan sa Scotland. Gani, ang mga arkeologo didto nakakalot ug mga bukog sa gagmayng mga kabayo nga nabuhi kaliboan ka tuig kanhi.

Ang Shetland pony daling mailhan tungod sa ilang mugbong tiil, taas ug lambungay ug ikog, ug baga nga balhibo, nga nagsilbing proteksiyon sa bugnaw kaayong klima sa ilang orihinal nga pinuy-anan. Ang mga pony may gitas-ong tali sa 28 ug 42 pulgadas ug kasagaran itom o brawon ug kolor. Ang kinatas-an niini maoy 42 pulgadas, gawas lang sa American Shetland, nga dili mosobrag 46 pulgadas.

Bisag gamayon, kining mga kabayoa kusgan. Gani kon sa gidak-on, sila ang kinakusgan sa tanang liwat sa kabayo. Tungod niini, kini maoy gamiton kaniadto sa paghakot sa nangadugtang sagbot, pagdaro, ug diha sa minahan, diin gagmayng mananap lang ang masigo sa mga tunel. Sa pagkatinuod, sila magtrabaho sa tibuok nilang kinabuhi sa mga minahan, nga dili gyod makakitag kahayag sa adlaw.

Kon maayong pagkabansay, ang Shetland malumo ug anad, nga maayo para sa mga bata. Tungod niini, ang paggamit kanila diha sa mga programa sa terapiya maayog epekto sa mga baldado.

Tungod sa ilang maayong mga kinaiya ug sa ilang katakos sa pagpaangay sa lahi kaayong mga palibot, ang mga Shetland pony gieksportar ngadto sa tibuok kalibotan ug natukod ang daghang asosasyon sa mga nagbuhi niini ug mga rehistrohanan niini nga liwat. Apan ang ngalan niini nga Shetland nagpaila gihapon sa gigikanan niini nga isla, diin kini nga liwat sa pagkatalagsaon himsog ug wala masagolig laing liwat.

[Hulagway sa panid 24]

Kon sa gidak-on, ang Shetland pony mao ang kinakusgan sa tanang liwat sa kabayo

[Picture Credit Line sa panid 24]

© S Sailer/A Sailer/age fotostock