Usa ka Basahon Alang Kanimo?

“Sa pagbuhat ug daghang basahon walay pagkatapos,” mipahayag si Solomon mga 3,000 ka tuig kanhi. (Ecclesiastes 12:​12) Kanang komentoha nahiangay gayod gihapon karong adlawa. Gawas pa sa naandang klasikal nga mga basahon, libolibong bag-ong mga basahon gipatik kada tuig. Tungod sa labihan ka daghang basahon nga mapili, nganong angay nimong basahon ang Bibliya?

DAGHANG tawo mobasag mga libro aron malingaw o mahibalo, o tingali tungod sa duruha ka hinungdan. Ang sama ikasulti bahin sa pagbasa sa Bibliya. Kini mahimong makalipay, makalingaw pa nga basahon. Apan ang Bibliya labaw pa kay niana. Usa kini ka linaing tinubdan sa kahibalo.​—Ecclesiastes 12:​9, 10.

Ang Bibliya nagtubag sa mga pangutana nga dugay nang gipalandong sa mga tawo​—mga pangutana bahin sa atong kagahapon, atong panahon karon, ug atong umaabot. Daghan ang nahibulong: Diin ba kita gikan? Unsa ang katuyoan sa kinabuhi? Sa unsang paagi makakaplag kitag kalipay sa kinabuhi? Sa kanunay aduna bay kinabuhi ibabaw sa yuta? Unsa ang atong umaabot?

Ang natigom nga gahom sa tanang ebidensiyang gipahayag dinhi tin-awng nagpamatuod nga ang Bibliya maoy tukma ug matinud-anon. Ato nang nahisgotan kon sa unsang paagi ang praktikal nga tambag niini makatabang kanato sa pagkinabuhig makahuloganon ug malipayong mga kinabuhi karong adlawa. Sanglit ang mga tubag niini bahin sa panahon karon makapatagbaw, tinong ang mga tubag niini bahin sa kagahapon ug ang mga tagna niini bahin sa umaabot takos sa bug-os nga pagtagad.

Kon sa Unsang Paagi Makuha ang Labing Dakong Kaayohan

Daghang tawo ang nagsugod pagbasa sa Bibliya nga unya mihunong sa dihang sila nalisdan pagsabot sa mga bahin niini. Kon kanay imong kasinatian, adunay pipila ka butang nga makatabang.

Pagpilig usa ka kasaligang hubad diha sa modernong-adlaw nga pinulongan, sama sa New World Translation of the Holy Scriptures. a Ang ubang tawo mosugod pinaagi sa pagbasa sa mga asoy sa Ebanghelyo sa kinabuhi ni Jesus, kansang maalamong mga pagtulon-an, sama nianang hikaplagan sa Wali sa Bukid, nagpabanaag ug dulot nga kaamgohan sa tawhanong kinaiyahan ug naglaraw kon unsaon pagpauswag sa atong kahimtang sa kinabuhi.​—Tan-awa ang Mateo mga kapitulo 5 ngadto 7.

Dugang pa sa pagbasa sa tibuok Bibliya, ang sumala-sa-topiko nga metodo sa pagtuon mahimong matulon-anon kaayo. Nalangkit niini ang pag-analisar kon unsay gisulti sa Bibliya bahin sa usa ka linaing ulohan. Tingali matingala ka sa pagkahibalo kon unsay gisulti gayod sa Bibliya bahin sa mga topiko sama sa kalag, langit, yuta, kinabuhi, ug kamatayon, ingon man sa Gingharian sa Diyos​—kon unsa kini ug kon unsay himoon niini. b Ang mga Saksi ni Jehova adunay usa ka programa alang sa sumala-sa-topiko nga pagtuon sa Bibliya, nga gitaganang walay bayad. Makausisa ka bahin niini pinaagi sa pagsulat ngadto sa mga magpapatik, nga gamiton ang nahiangay nga adres nga nalista sa panid 2.

Human masusi ang ebidensiya, daghang tawo naghinapos nga ang Bibliya maoy gikan sa Diyos, kinsa gipaila sa Kasulatan nga mao “si Jehova.” (Salmo 83:18) Mahimong dili ka makombinsir nga ang Bibliya naggikan sa Diyos. Apan nganong dili susihon kini sa imong kaugalingon? Kami masaligon nga human sa proseso sa pagkat-on, pagpalandong, ug tingali pagkasinati sa praktikal nga bili sa way-kataposang kaalam niini sa imong kaugalingon, imong bation nga ang Bibliya tinuod nga usa ka basahon alang sa tanang tawo, ug labaw pa​—usa ka basahon alang kanimo.

[Mga footnote]