Kon Unsay Sulod sa Basahon

Ang usa ka tawong mosulod sa usa ka librarya sa unang higayon tingali malibog sa kahan-ayan sa mga basahon. Apan uban sa diyutayng katin-awan kon giunsa paghapnig ang mga basahon, sa taudtaod iyang mahibal-an kon unsaon pagkaplag ang mga libro. Sa susama, mas sayon nga makadukiduki sa Bibliya kon imong masabtan kon giunsa paghikay ang mga sulod niini.

ANG pulong “Bibliya” kinuha gikan sa Gregong pulong nga bi·bli’a, nga nagpasabot “mga linukot nga papiro” o “mga basahon.”¹ Ang Bibliya sa tinuoray maoy usa ka koleksiyon​—usa ka librarya​—sa 66 ka indibiduwal nga mga libro, nga gidangtag mga 1,600 ka tuig ang pagsulat niana, gikan sa 1513 W.K.P. ngadto sa mga 98 K.P.

Ang unang 39 ka basahon, mga tulo ka bahin sa upat sa mga unod sa Bibliya, nailhan nga Hebreohanong Kasulatan, sanglit kasagarang gisulat kana sa maong pinulongan. Kining mga basahona kasagarang mabahin sa tulo ka hugpong: (1) Makasaysayanhon, Genesis ngadto Ester, 17 ka basahon; (2) Balaknon, Job ngadto sa Ang Awit ni Solomon, 5 ka basahon; ug (3) Matagnaon, Isaias ngadto sa Malaquias, 17 ka basahon. Ang Hebreohanong Kasulatan naghisgot sa sayong kasaysayan sa yuta ug sa katawhan ingon man sa kasaysayan sa karaang nasod sa Israel sukad sa sinugdanan niini hangtod sa ikalimang siglo W.K.P.

Ang nahibiling 27 ka basahon nailhan nga Kristohanon Gregong Kasulatan, kay gisulat kana sa Grego, ang internasyonal nga pinulongan niadtong panahona. Sila gihan-ay ilabina sumala sa ulohan nga gihisgotan: (1) ang 5 ka basahon sa kasaysayan​—ang mga Ebanghelyo ug mga Buhat, (2) ang 21 ka sulat, ug (3) ang Pinadayag. Ang Kristohanon Gregong Kasulatan bug-os nga naghisgot sa mga pagtulon-an ug mga kalihokan ni Jesu-Kristo ug sa iyang mga tinun-an sa unang siglo K.P.