Proverbio 12:1-28
12 Ang nahigugma sa disiplina nahigugma sa kahibalo,+ apan ang nagadumot sa pagbadlong walay kabuot.+
2 Ang usa ka tawo nga maayo makabaton ug pag-uyon gikan ni Jehova,+ apan ang tawong daotag mga hunahuna iyang ipahayag nga daotan.+
3 Ang usa ka tawo dili malig-on pinaagi sa pagkadaotan;+ apan mahitungod sa gamot sa mga matarong, kini dili matarog.+
4 Ang usa ka asawa nga may katakos maoy purongpurong sa iyang tag-iya,+ apan siya nga nagabuhat nga makauulaw maingon sa pagkadunot sa iyang mga bukog.+
5 Ang mga hunahuna sa mga matarong maoy hustisya;+ ang pagtultol sa mga daotan maoy panglimbong.+
6 Ang mga pulong sa mga daotan maoy pagbanhig alang sa dugo,+ apan ang baba sa mga matul-id maoy magaluwas kanila.+
7 Ginapukan ang mga daotan ug wala na sila,+ apan ang balay sa mga matarong magapabilin.+
8 Tungod sa iyang maalamon nga baba ang usa ka tawo pagadayegon,+ apan ang usa nga hiwi sa kasingkasing pagatamayon.+
9 Mas maayo pa ang usa nga dili kaayo tinamod apan adunay sulugoon kay sa usa nga nagahimaya sa iyang kaugalingon apan nakulangan sa tinapay.+
10 Ang matarong nagaatiman sa kalag sa iyang binuhing hayop,+ apan ang mga kaluoy sa mga daotan mabangis.+
11 Ang nagatikad sa iyang yuta matagbaw unya sa tinapay,+ apan ang nagapangagpas sa mga butang nga walay-bili maoy usa kansang kasingkasing nakulangan.+
12 Ang daotan nagtinguha sa nakuha sa pukot sa mga tawong daotan;+ apan ang gamot sa mga matarong, kini nagapamunga.+
13 Pinaagi sa kalapasan sa mga ngabil ang tawong daotan malit-agan,+ apan ang matarong mahigawas sa kasakitan.+
14 Gikan sa mga bunga sa baba sa usa ka tawo siya matagbaw sa maayo,+ ug ang mga buhat sa mga kamot sa usa ka tawo mobalik kaniya.+
15 Ang dalan sa buangbuang matarong sa iyang kaugalingong mga mata,+ apan ang nagapamati sa tambag maoy maalamon.+
16 Buangbuang ang tawo nga magpahibalo sa iyang kasuko sa mao ra nga adlaw,+ apan ang maalamon nagatabon sa kaulawan.+
17 Siya nga nagasabwag sa pagkamatinumanon magasulti sa matarong,+ apan ang bakakon nga saksi, panglimbong.+
18 Adunay nagapamulong nga walay paghunahuna sama sa mga dunggab sa espada,+ apan ang dila sa mga maalamon makaayo.+
19 Ang ngabil sa kamatuoran+ pagalig-onon hangtod sa kahangtoran,+ apan ang dila sa kabakakan mahisama sa daklit lamang.+
20 Ang pagpanglimbong anaa sa kasingkasing niadtong nagamugnag daotan,+ apan kadtong nagatambag sa pakigdait nagamaya.+
21 Walay makadaot nga modangat sa tawong matarong,+ apan ang mga daotan mapuno gayod sa katalagman.+
22 Ang bakakong mga ngabil maoy dulumtanan kang Jehova,+ apan kadtong nagmatinumanon makapahimuot kaniya.+
23 Ang usa ka tawong maalamon nagatago sa kahibalo,+ apan ang kasingkasing sa mga hungog nagasibya sa kabuangan.+
24 Ang kamot sa mga kugihan mao ang magamando,+ apan ang taspokan nga kamot mahiagom sa pinugos nga trabaho.+
25 Ang pagkamabalak-on diha sa kasingkasing sa usa ka tawo maoy magpatikuko niini,+ apan ang maayong pulong mao ang makapalipay niini.+
26 Ang matarong nagausisa pag-ayo sa iyang sibsibanan, apan ang dalan sa mga daotan nagpasalaag kanila.+
27 Ang pagkataspokan dili makadakop sa iyang mga hayop nga ayamon,+ apan ang kugihan maoy bililhong bahandi sa usa ka tawo.
28 Diha sa dalan sa pagkamatarong adunay kinabuhi,+ ug ang pagpanaw diha sa agianan niini walay kamatayon.+
