Taetas 3:1-15

  • Prapa fasin blong stap aninit long narafala (1-3)

  • Rere blong mekem gudfala wok (4-8)

  • Sakemaot krangke rao mo giaman tijing (9-11)

  • Advaes i go stret long Taetas mo lastok (12-15)

3  Yu mas gohed blong talem bakegen long olgeta, se oli mas putum olgeta oli stap aninit long ol gavman mo ol haeman, mo oli mas obei long olgeta, mo oli mas rere oltaem blong mekem ol gudfala wok.  Mo oli no mas tok nogud long ol narafala, oli no mas man blong rao, be oli mas rere blong lego prapa tingting blong olgeta, mo taem oli stap wetem ol narafala oli mas gat fasin we i kwaet,  from we yumi tu bifo yumi krangke, yumi no stap obei, ol narafala oli lidim yumi i go krangke, mo yumi slef blong ol samting we yumi wantem tumas mo we yumi stap harem gud long olgeta. Mo tu, yumi stap mekem ol rabis fasin, mo yumi stap jalus oltaem, fasin blong yumi i nogud we i nogud, mo yumi no laeklaekem yumi nating.  Be God ya we i Sevia blong yumi i soemaot se hem i kaen mo i lavem ol man,  (hem i mekem olsem from we hem i sore long yumi, be i no from ol stret wok we yumi mekem). Hem i sevem yumi taem hem i wasem yumi long wota ya we i mekem yumi laef, mo taem hem i yusum tabu spirit blong mekem yumi kam niuwan.  Hem i yusum Jisas Kraes we i Sevia blong yumi, blong kafsaedem spirit ya i kam bigwan long yumi,  blong yumi save kasem ol samting ya we God i promes blong givim we i joen wetem hop ya blong laef we i no save finis. Bambae hem i mekem olsem afta we hem i talemaot se yumi stret man from we hem i kaen tumas long yumi.  Yumi save trastem ol tok ya, mo mi wantem se yu mas gohed blong tokbaotgud ol samting ya, blong bambae olgeta we oli bilif long God oli save mekem ol gudfala wok, mo oli save putum tingting blong olgeta i stap nomo long samting ya. Ol samting ya oli gud mo oli save givhan long ol man.  Be yu mas stap longwe long ol krangke rao, mo long fasin ya blong traem faenemaot laen blong ol olfala bifo, mo bambae yu no go joen long ol rao mo ol faet we oli stap mekem from mining blong Loa, from we ol samting ya oli blong nating nomo mo oli no save givhan long ol man. 10  Sipos wan man i stat blong tijim wan giaman tijing, yu mas givim woning long hem. Be sipos yu givim woning tu taem finis long hem be hem i no lesin, yu sakemaot hem, 11  from we yu save se man olsem i gowe finis long stret rod, mo hem i stap mekem sin, mo sin ya blong hem i soemaot se hem i rong. 12  Taem bambae mi sanem wan long tufala ya, Atemas no Tikikas i kam luk yu, yu traem bes blong yu blong kam luk mi long Nikopolis, from we mi plan finis se long koltaem, bambae mi stap long ples ya. 13  Mo yu mas traehad blong givhan long Sinas ya we i save gud Loa mo long Apolos, blong mekem se tufala i gat evri samting we tufala i nidim long trip blong tufala. 14  Mo i gud we olgeta man blong yumi oli mas lan blong mekem ol gudfala wok, blong oli save givhan long ol narafala, nao oli no stap nating nomo we oli no gat wok.* 15  Olgeta we oli stap wetem mi, oli talem halo long yu. Yu pasem halo blong mi long olgeta ya we oli lavem yumi mo we oli bilif. Prea blong mi se God bambae i gohed blong kaen long yufala evriwan.

Ol futnot

PT: “we oli no gat wan samting.”