Mak 16:1-8
-
Jisas i laef bakegen (1-8)
16 Nao taem Sabat i finis, Meri we i woman Magdala mo Salome mo Meri we i mama blong Jemes, trifala i go pem sam lif we oli gat gudfala smel, blong rabem long bodi blong Jisas.
2 Nao long eli moning long fas dei blong wik, taem san i girap, oli go long beregraon.*
3 Nao oli stap taltalem long olgeta se: “?Hu bambae i givhan long yumi blong rolemaot ston we i blokem maot blong hol?”
4 Be taem oli lukluk i go antap, oli luk se wan man i rolemaot ston ya finis, nating we ston ya i bigwan tumas.
5 Taem oli go insaed, oli luk wan yang man i stap sidaon long raet saed blong hol ya, klos blong hem i waet mo i longfala, nao oli sapraes tumas.
6 Hem i talem long olgeta se: “Yufala i no sapraes. Mi mi save we yufala i stap lukaotem man Nasaret ya Jisas, we oli kilim hem i ded long pos. Hem i laef bakegen finis. Hem i no stap long ples ya. !Yufala i luk! Hemia nao ples we oli bin putum bodi blong hem long hem.
7 Be yufala i go, yufala i talem long ol disaepol blong hem mo long Pita se: ‘Hem i stap go fastaem long Galili. Bambae yufala i luk hem longwe, olsem we hem i bin talem long yufala.’”
8 Nao oli aot long hol ya, mo oli ronwe we oli stap seksek mo oli sapraes tumas. Mo oli no talemaot samting ya long wan man, from we oli fraet.*
Ol futnot
^ NT: “beregraon blong ol man we God i tingbaot olgeta.”
^ Folem ol fas olfala hanraet, Gospel blong Mak i finis long ol toktok we oli stap long vas 8.
