Efesas 3:1-21
3 From samting ya, mi Pol, mi stap long kalabus from we mi mi man blong Kraes Jisas, mo from we mi mi stap givhan long yufala, ol man blong ol narafala neson ....
2 God i kaen tumas. Ating yufala i harem we hem i givim wok long mi blong mi soemaot fasin ya blong hem long yufala, blong givhan long yufala.
3 God i givim wok ya long mi taem hem i soemaot tabu tokhaed blong hem long mi, olsem we mi tokbaot smol finis long leta ya.
4 Nao taem yufala i ridim leta ya, bambae yufala i luksave samting we mi mi kasem save long tabu tokhaed we i tokbaot Kraes.
5 Long taem blong ol man bifo, God i no soemaot tokhaed ya long ol man, be naoia hem i yusum spirit blong hem blong soemaot long ol tabu aposol blong hem mo ol profet blong hem.
6 Tokhaed ya i olsem: Gud nius i mekem se ol man blong ol narafala neson we oli joen long Kraes Jisas, bambae oli kasem samting we Kraes i kasem, mo oli joen, oli kam wan bodi nomo. Mo bambae oli kasem sem samting we God i promes long yumi.
7 God i kaen tumas long mi, nao hem i putumap mi blong mi givhan long yufala,* blong yufala i kasem save long tabu tokhaed ya. Hem i givim fri presen ya taem hem i givim paoa blong hem long mi.
8 Long olgeta tabu man, mi mi daon moa long olgeta evriwan, be God i kaen tumas long mi, nao i givim wok ya long mi blong mi talemaot gud nius long ol narafala neson. Gud nius ya i tokbaot ol gudgudfala samting blong kraes we i no gat man i save kaontem.
9 Mo mi gat wok tu blong mekem ol man oli save plan we God i folem blong soemaot tabu tokhaed ya. God ya i mekem olgeta samting, mo hem i haedem tabu tokhaed ya longtaem finis.
10 Be naoia hem i yusum kongregesen blong soemaot bigfala waes blong hem long ol gavman mo ol haeman long heven. Waes ya blong hem, hem i soemaot long plante defren rod.
11 Hemia i stret nomo long bigfala tingting we hem i gat longtaem finis i kam. Bigfala tingting ya i joen wetem Kraes, hemia Jisas Masta blong yumi,
12 we hem nao i mekem se yumi no fraet blong toktok, mo from we yumi bilif long hem, yumi save kam klosap long God we yumi no seksek, tingting blong yumi i strong.
13 Taswe mi mi askem se yufala i no mas letem tingting blong yufala i foldaon from ol trabol ya we mi kasem from yufala, from we olgeta samting ya oli blong leftemap yufala.
14 From samting ya, mi mi nildaon blong prea long Papa,
15 we hem nomo i stamba blong olgeta famle long heven mo long wol.
16 Hem i Hae God, mo mi mi prea blong hem i save yusum paoa we spirit blong hem i givim, blong mekem hat mo tingting blong yufala i kam strong.
17 Mi prea blong Kraes i stap long hat blong yufala, mo blong lav we yufala i gat long ol narafala man tu, i stap long hat blong yufala, from we yufala i bilif. Mo mi askem blong yufala i stanap strong olsem we rus blong tri i holemtaet graon, mo olsem we haos i fas strong long fandesen blong hem,
18 blong mekem se yufala mo olgeta tabu man, yufala i naf blong kasem save fulwan se trutok i bigwan olsem wanem, i longfala olsem wanem, i hae olsem wanem, mo i dip olsem wanem,
19 mo blong yufala i save lav ya we Kraes i soemaot long yumi we i bigwan tumas i bitim save blong yumi. Nao laef blong yufala bambae i fulap gud long ol gudfala fasin we God i givim.
20 From paoa we i stap wok insaed long yumi, God i save mekem plante moa samting i bitim olgeta samting we yumi askem no yumi tingbaot.
21 Taswe tru long kongregesen mo tru long Kraes Jisas, i gud yumi leftemap nem blong hem oltaem gogo i no save finis. Amen.
Ol futnot
^ PT: “putumap mi, mi kam wan minista.”
