2 Timoti 1:1-18

  • Talem halo (1, 2)

  • Pol i talem tangkiu long God from bilif blong Timoti (3-5)

  • Gohed blong mekem presen we yu kasem long God i kam bigwan moa olsem we faea i laet strong moa (6-11)

  • Gohed blong holem ol gudfala tok (12-14)

  • Ol enemi blong Pol mo ol fren blong hem (15-18)

1  Mi Pol, mi kam aposol blong Kraes Jisas olsem we God i wantem. Mi kam aposol blong mi talemaot promes blong laef we yumi save kasem tru long Kraes Jisas.  Mi raet i go long yu Timoti, we yu olsem pikinini blong mi mo mi lavem yu tumas: Mi mi prea se Papa blong yumi God, wetem Masta blong yumi Kraes Jisas, bambae tufala i kaen mo tufala i sore long yu, mo tufala i givim pis long yu.  Mi mi talem tangkiu long God ya we mi stap mekem tabu wok blong hem, stret olsem we ol olfala blong mi bifo oli mekem, we tingting blong mi i no stikim mi nating. Nao long dei mo long naet, taem mi stap krae i go long God, oltaem mi stap tingbaot yu.  Taem mi tingtingbak long taem ya we yu krae, mi wantem tumas blong luk yu, blong mi save harem gud.  Mo mi stap tingbaot fasin blong bilif blong yu, we i no blong giaman. Hemia sem fasin blong bilif we bubu woman blong yu Loes, mo mama blong yu Yunis, tufala i gat, mo mi savegud we yu tu yu gat sem fasin ya.  Nao from samting ya, mi wantem se yu tingbaot bakegen presen ya we yu kasem long God, taem mi putum han blong mi long yu. Presen ya we yu kasem, yu mas mekem i kam bigwan moa, olsem we man i mekem faea i laet strong moa.  Spirit we God i givim long yumi, hem i no blong mekem yumi fraet, be i blong mekem yumi gat paoa, yumi lavem ol man, mo yumi gat stret tingting.  Taswe yu no mas sem blong tokbaot Masta blong yumi, mo yu no mas sem blong tokbaot mi tu, we mi stap kalabus from hem. Yu mas dipen long paoa blong God, blong yu stap rere blong safa from gud nius.  God i sevem yumi finis, mo hem i singaot yumi blong yumi tabu. Hem i no mekem olsem long yumi from ol wok we yumi nomo yumi mekem, be hem i mekem from we hem nomo i wantem mekem, mo from we hem i kaen tumas. Bifo olgeta, hem i yusum Kraes Jisas blong kaen long yumi, 10  be naoia, yumi luk klia fasin ya blong hem taem Kraes Jisas ya we i Sevia blong yumi, i soemaot hem. Sevia ya i brekem paoa blong ded finis, mo i yusum gud nius ya blong mekem ol man oli kasem save long laef ya we bodi i no save kam roten samtaem. 11  God i putumap mi blong mi kam wan man blong prij, mo wan aposol, mo wan tija, blong mi talemaot gud nius ya. 12  Hemia nao from wanem mi tu mi stap kasem trabol from ol samting ya, be mi mi no sem, from we mi mi save gud Man ya we mi bilif long hem. Mo mi trastem hem se hem i naf blong lukaot gud long olgeta samting we mi mi putum long han blong hem, gogo kasem dei ya. 13  Yu mas gohed blong holem ol gudfala tok ya* we yu harem long mi. Ol tok ya oli stret gud mo oli blong soemaot rod* long yu blong yu save fasin blong bilif mo blong lavem ol man. Yumi stap folem ol fasin ya, from we yumi joen long Jisas Kraes. 14  Yu protektem gudfala samting ya we yu kasem wetem help blong tabu spirit we i stap insaed long yumi. 15  Yu save finis we olgeta man long provins ya Esia, wetem Fugelas mo Hemogenes, olgeta evriwan oli ronwe finis long mi. 16  Prea blong mi se Masta bambae i sore long olgeta we oli stap long haos blong Onesiforas, from we bifo, plante taem hem i stap mekem mi mi harem gud tumas. Mi mi stap long kalabus, be hem i no sem nating from samting ya. 17  Taem hem i stap long Rom, hem i lukaot mi long evri ples gogo i faenem mi. 18  Prea blong mi se long dei ya, Masta Jehova* bambae i sore long hem. Yu yu save gud olgeta wok we hem i mekem long Efesas.

Ol futnot

NT: “ol tijing we oli save givhan.”
NT: “plan.”
Yu luk Diksonari.