An Saindo daw na mga Plano Kaoyon kan Katuyohan nin Dios?

AN GAMGAM na inaapod na Clark’s nutcracker garo musika an huni asin kolor abohon na may puti. Maheheling iyan na naglalayog na minaagi sa mga kadlagan sa solnopan kan Amerika del Norte. Nagtitipon asin nagtatalbong iyan nin sagkod sa 33,000 na pisog taon-taon, na sinasaray an mga iyan sa mga 2,500 na laen-laen na lugar bilang pag-andam sa malipoton na mga bulan nin tiglipot. Tunay nanggad, an gamgam na ini “natural na madonong” sa paagi nin pagtagama kaiyan nin kakanon para sa ngapit.​—Talinhaga 30:24.

An mga tawo igwa nin orog pa nganing pambihirang abilidad. Sa gabos na linalang ni Jehova digdi sa daga, an mga tawo an may dai mapapantayan na kakayahan na makanood sa nakaaging mga eksperyensia asin togotan an mga leksion na ini na makaimpluwensia sa saindang mga plano para sa ngapit. “Kadakol kan plano sa puso nin tawo,” an sabi kan madonong na si Hadeng Salomon.​—Talinhaga 19:21.

Dawa siring, an kadaklan na tawo daing gayong maginibo kundi ibasar an saindang mga plano sa mga paghona ninda manongod sa ngapit. Halimbawa, pinaplano nindo an mga aktibidad para sa aga huling hinohona nindo na masirang an saldang asin na kamo buhay pa. An enot na paghona may masarig na basehan; an ikaduwa bakong gayong segurado. Sa realistikong paagi, an kagsurat sa Biblia na si Santiago nagsabi: “Dai nindo aram kun ano an magigin buhay nindo sa aga.”​—Santiago 4:13, 14.

Si Jehova Dios mayo nin siring na mga limitasyon. Aram nia an “mangyayari sa huri poon pa sa kapinonan.” An ipinahayag niang katuyohan maootob, ano man an mangyari. “An sakuyang desisyon magdadanay,” an sabi nia, “asin an gabos na sakong ikinakaogmang marhay sakong gigibohon.” (Isaias 46:10) Pero, ano an mangyayari kun an mga plano nin mga tawo bakong kaoyon kan katuyohan nin Dios?

Kun an mga Plano nin Tawo Binabaliwala an Katuyohan nin Dios

Mga 4,000 na taon na an nakaagi, plinano kan mga paratogdok kan Torre nin Babel na pugolan an paglakop kan rasa nin tawo. “Madia kamo!” an sabi ninda. “Magtogdok kita nin sarong siudad asin siring man nin torre na an alitoktok kaiyan sukdo sa kalangitan, asin gumibo kita nin bantog na ngaran para sa sato man sana, ta tibaad kita magkawararak sa ibabaw kan bilog na daga.”​—Genesis 11:4.

Minsan siring, laen na marhay an katuyohan nin  Dios para sa daga. Pinagbotan nia si Noe asin an saiyang mga aking lalaki: “Pangagbunga asin pangagdakol kamo asin panoon nindo an daga.” (Genesis 9:1) Ano an ginibo nin Dios sa mga kamawotan kan rebeldeng mga taga Babel? Rinibaraw nia an saindang lenguahe tanganing dai sinda makapakikomunikar sa lambang saro. An resulta? “Huli kaiyan na iwinarak sinda ni Jehova hale duman pasiring sa ibabaw kan bilog na daga.” (Genesis 11:5-8) An mga paratogdok kan Babel napiritan na manodan an sarong mahalagang leksion. Kun magkalaen an mga plano nin tawo asin an katuyohan nin Dios, “an desisyon ni Jehova iyo an magdadanay.” (Talinhaga 19:21) Tinotogotan daw nindo an siring na mga leksion kan nakaagi na makaimpluwensia sa saindong buhay?

An Kabalisngagan nin Sarong Tawong Mayaman

Tibaad dai man kamo nagpaplanong magtogdok nin sarong torre, alagad dakol ngonyan an nagpaplanong magkaigwa nin dakulang deposito sa bangko asin magtipon nin materyal na mga rogaring tanganing magin maginhawa an buhay ninda pagretiro ninda. Natural sanang mawoton nin sarong tawo na manamitan an mga bunga kan saiyang pinagpagalan. “An lambang tawo kumakan asin uminom nanggad patin makaheling nin karahayan para sa gabos niang kahigosan,” an isinurat ni Salomon. “Iyan an balaog nin Dios.”​—Eclesiastes 3:13.

Maninimbag kita ki Jehova kun paano niato ginagamit an balaog na ini. Haros mga 2,000 na taon na an nakaagi, idinoon ni Jesus an bagay na ini sa saiyang mga disipulo paagi sa sarong ilustrasyon. Sia nagsabi: “An daga nin sarong tawong mayaman marahay an produkto. Bilang resulta nagpoon siang mangatanosan sa saiya man sana, na sinasabi, ‘Ano daw an gigibohon ko, ngonyan na mayo na ako nin matitiponan kan sakong mga inani?’ Kaya sia nagsabi, ‘Ini an gigibohon ko: Gagabaon ko an sakong mga tambobong asin magtotogdok ako nin orog pa kadarakula, asin dian titiponon ko an gabos kong tipasi asin an gabos kong marahay na bagay; asin masabi ako sa sakong kalag: “Kalag, dakol ka nang marahay na bagay na natipon para sa dakol na taon; magpaginhawa ka na sana, magkakan ka, mag-inom ka, magpasiramsiram ka.”’” (Lucas 12:16-19) Garo baga rasonable man an kamawotan kan tawong mayaman, bako daw? Arog kan gamgam na Clark’s nutcracker na nasambitan sa enotan, an tawo sa ilustrasyon garo baga nag-aandam para sa saiyang mga pangangaipo sa ngapit.

Pero, may sala sa kaisipan kan tawong iyan. Ipinagpadagos ni Jesus: “Alagad an Dios nagsabi sa saiya, ‘Ika na bakong makatanosan, ngonyan na banggi hahagadon ninda sa saimo an saimong kalag. Kun siring, siisay an magkakamit kan mga bagay na saimong tinipon?’” (Lucas 12:20) Kinokontra daw ni Jesus an sinabi ni Salomon na an paghigos asin an marahay na mga bagay na ibinubunga kaiyan balaog hale sa Dios? Dai. Ano daw an boot sabihon ni Jesus? “Siring an nangyayari,” an sabi ni Jesus, “sa tawo na nagririmpos nin kayamanan para sa saiya man sana  alagad bakong mayaman sa pagheling nin Dios.”​—Lucas 12:21.

Tinotokdoan ni Jesus an mga nagdadangog sa saiya na gusto ni Jehova na isipon niato Sia mantang naggigibo kita kan satong mga plano. An tawong mayaman puede kutanang nagin mayaman sa pagheling nin Dios paagi sa paghanap nin mga paagi na umoswag an saiyang diosnon na debosyon, kadonongan, asin pagkamoot. An mga tataramon kan tawong iyan nagpapaheling na mayo siang interes sa siring na mga bagay, ni na magtada kan saiyang mga anihon tanganing may maarahit an mga dukha, ni na magtao nin dolot na mga regalo ki Jehova. An siring na espirituwal na mga gibohon asin daing kaimotan na mga gibo bakong kabtang kan buhay kan tawong mayaman. An saiyang mga plano nakasentro sana sa sadiri niang mga kamawotan asin kaginhawahan.

Naobserbaran daw nindo na an dakol na tawo ngonyan may mga prioridad sa buhay na kapareho kan sa tawong mayaman na ilinadawan ni Jesus? Baga man kita may kaya o dukha, madalion nanggad na magkaigwa nin materyalistikong kaisipan, na tinotogotan an mga pangangaipo asin kamawotan sa pangaroaldaw na buhay na ipagilid an espirituwal na mga pangangaipo. Ano an saindong magigibo tanganing malikayan an siod na iyan?

Pagplano nin “Normal” na Buhay

Bakong arog kan tawong mayaman sa ilustrasyon ni Jesus, tibaad nasasakitan kamo sa pinansial. Minsan siring, kun kamo may agom, daing duwa-duwa na nagpaplano kamo na itao sa saindong pamilya an mga pangangaipo sa buhay asin, kun posible, sarong marahay na pundamental na edukasyon para sa saindong mga aki. Kun kamo daing agom, posibleng marhay na kaiba sa saindong plano an paghanap nin trabaho o pagdadanay sa trabaho nindo, tangani na dai kamo magin pagabat sa iba. An mga ini kapakipakinabang na mga kamawotan.​—2 Tesalonica 3:10-12; 1 Timoteo 5:8.

Dawa siring, posible na an pagtrabaho, pagkakan, pag-inom​—na ibinibilang na normal na buhay—​puedeng magin dahelan na an saro mamuhay na bakong kaoyon kan kabotan nin Dios. Taano man? Si Jesus nagsabi: “Kun paano kan mga aldaw ni Noe, siring man an presensia kan Aki nin tawo. Huli ta kun paano sinda kan mga aldaw na idto bago kan baha, nagkakarakan asin nag-iirinom, an mga lalaki nag-aaragom asin an mga babae nagpapaaragom, sagkod kan aldaw na si Noe naglaog sa dahong; asin dai sinda nagmangno sagkod na dumatong an baha asin iinanod sinda gabos, magigin siring man kaiyan an presensia kan Aki nin tawo.”​—Mateo 24:37-39.

Bago an baha, an kadaklan na tawo igwa nin tibaad ibinibilang nindang normal na buhay. Minsan siring, an saindang problema iyo na ‘dai ninda minangno’ an katuyohan nin Dios na pohoon an maraot na kinaban na idto paagi sa sarong delubyo na lakop sa globo. Daing duwa-duwa na inisip ninda na bakong normal an estilo nin pamumuhay ni Noe. Pero, kan umabot an Baha, an estilo nin pamumuhay ni Noe asin kan saiyang pamilya an napatunayan na totoong madonong.

Ngonyan, an gabos na makukuang ebidensia nagpapatunay na nabubuhay na kita sa panahon kan katapusan. (Mateo 24:3-12; 2 Timoteo 3:1-5) Dai na mahahaloy, ‘roronoton asin tataposon’ kan Kahadean nin Dios an presenteng sistema nin mga bagay. (Daniel 2:44) Sa pagsakop kan Kahadean na iyan, an daga gigibohon na paraiso. Hahaleon kan Kahadean an helang asin kagadanan. (Isaias 33:24; Kapahayagan 21:3-5) An gabos na linalang digdi sa daga mamumuhay na may pagkaoroyon asin dai na magugutom pa.​—Salmo 72:16; Isaias 11:6-9.

Pero, bago sia humiro, katuyohan ni Jehova na an maogmang bareta kan saiyang Kahadean ‘ihulit sa bilog na ineerokan na daga para sa pagpatotoo sa gabos na nasyon.’ (Mateo 24:14) Kaoyon kan katuyohan nin Dios, mga siete milyones na Saksi ni Jehova an naghuhulit kan maogmang baretang ini sa 236 na nasyon asin sa labing kuatro sientos na lenguahe.

Para sa kinaban, an estilo nin pamumuhay kan mga Saksi ni Jehova garo bakong normal sa nagkapirang paagi​—makangingisi pa ngani. (2 Pedro 3:3, 4) Kapareho kaidtong mga nabuhay bago kan Baha, an kadaklan na tawo ngonyan sibot-sibot sa rutina nin pangaroaldaw na buhay. Tibaad minamansay ninda na bakong timbang an siisay man na habong umarog sa estilo nin pamumuhay na ibinibilang kan sosyedad na normal. Alagad sa pagmansay kan mga may pagtubod sa mga panuga nin Dios, tunay nanggad na timbang an buhay na nakasentro sa paglilingkod sa Dios.

Kun siring, baga man ika mayaman o dukha o nasa tahaw kaiyan, madonong na sa panapanahon repasohon mo an saimong mga plano para sa haraning ngapit. Mantang ginigibo mo iyan, hapota an saimong sadiri, ‘An sako daw na mga plano kaoyon kan katuyohan nin Dios?’

[Ritrato sa pahina 11]

Kun bakong magkaoyon an mga plano nin mga tawo asin an katuyohan nin Dios, an desisyon ni Jehova an magdadanay

[Ritrato sa pahina 12]

Sa paggibo kan saiyang mga plano, an tawong mayaman sa parabola ni Jesus dai nakakonsentrar sa katuyohan nin Dios