Hapot Hale sa mga Parabasa

Puede daw na matiwalag sa kongregasyon an sarong Kristiano na nagpaparaheling nin pornograpiya?

▪ Puede. Idinodoon kaiyan kun taano ta mahalagang marhay na isikwal nanggad an gabos na klase nin pornograpiya​—⁠mga babasahon man o retrato​—⁠sa mga magasin, pelikula, video, saka sa Internet.

An pornograpiya lakop sa kinaban. Huli sa Internet, mas madali na ining naheheling o nababasa asin nagdadakol an apektado kaini siring sa grabeng epidemya. May nagkapira, hoben man o gurang, na dai tinutuyong nakapagbukas nin pornograpikong mga Web site. An iba tuyong nagbubukas kaiyan, na dai nang gayo nag-aalangan huling puede nindang sekretong basahon o helingon iyan​—⁠sa harong o opisina. Taano ta dapat ining seryosong pag-isipan nin mga Kristiano?

Maheheling niato sa patanid ni Jesus an sarong pangenot na dahelan: “An gabos na magheling sa sarong babae dahel sa pagkaara [“horot,” NW] saiya, nagkasala na saiya nin pagsambay sa saiyang puso.” (Mat. 5:28) Siempre, para sa mag-agom, angay sana asin sarong gikanan nin kaogmahan an normal na seksuwal na relasyon. (Tal. 5:​18, 19; 1 Cor. 7:​2-5) Alagad, bako iyan an katuyohan nin pornograpiya. Imbes, itinatampok kaiyan an bawal na pagdodorog na nakakapukaw nin imoral na kaisipan, na dapit dian nagpatanid si Jesus. Malinaw nanggad na an pagbasa o pagheling nin pornograpiya direktang kontra sa pagboot nin Dios: ‘Kaya gadanon nindo an saindong mga kabtang na nasa ibabaw nin daga: an pagsambay,  an karompotan, an horot, an maraot na mawot, asin an kaaraan, na iyo an pagsamba sa ladawan.’​—⁠Col. 3:⁠5.

Paano kun sa saro o duwang pagkakataon nagheling man nanggad nin pornograpiya an sarong Kristiano? Sa sarong paagi, an kamugtakan nia puedeng iagid sa peligrosong situwasyon na dian napaatubang mismo an salmistang si Asaph: ‘Alagad ako, baga nagkadaralinas an sakong mga bitis; kadikit na sanang mapadalinas an sakong mga lakad.’ Paano an sarong Kristiano magkakaigwa nin malinig na konsensia asin matoninong na relasyon sa Dios kun sia nagheheling nin pornograpikong mga retrato nin mga lalaki o babaeng huba o nin duwang tawo na naggigibo nin pakikisaro? Mayo man nin katoninongan si Asaph: ‘Haros ta pinaghampak ako sa bilog na aldaw, asin nagpopoon si paghampak sa sakuya sa lambang pagkaaga.’​—⁠Sal. 73:​2, 14.

An sarong Kristiano na nakagibo nin siring na karigsokan dapat mag-isip-isip asin admitiron na kaipuhan nia nin espirituwal na tabang. Makukua sa kongregasyon an tabang na iyan: ‘Minsan kun an saro mahulog sa ano man na paglapas, kamo na mga espirituwal, bangonon nindo an siring sa espiritu nin kahoyoan; na magmaan ka sa saimo man sana tibaad kun ika man masugotan.’ (Gal. 6:⁠1) Ikakatao nin saro o duwang Kristianong elder an tabang na kaipuhan nia, kaiba na an ‘mga pamibi nin pagtubod na makakaligtas sa naghehelang, asin an kasalan nia ipapatawad saiya.’ (Sant. 5:​13-15) Arog ni Asaph, napatunayan kan mga naghagad nin tabang tanganing mahale an digta nin pornograpiya na marahay para sa sainda an pagrani sa Dios.​—⁠Sal. 73:⁠28.

Minsan siring, sinabi ni apostol Pablo na an nagkapirang nagkasala dai nagsolsol “sa saindang pagkamaati asin sa pakikisaro patin malaswang paggawe.” * (2 Cor. 12:​21, NW) Mapadapit sa Griegong termino dian na trinadusir na “pagkamaati,” si Propesor Marvin R. Vincent nagsurat na iyan “nangangahulogan nin pagigin marigsok.” Makamomondo na an nagkapirang klase nin pornograpiya mas grabe pa kisa sa mga eksena na may mga nakahuba o nin lalaki asin babae na naggigibo nin pakikisaro. Igwa nin marigsok asin makababaldeng klase nin pornograpiya na kalabot an homoseksuwalidad (pagdodorog nin magkasekso), pagdodorog nin grupo, pakikidorog sa hayop, pornograpiya na nagpapasale nin mga aki, panglulupig nin sarong gang, pangriringis sa mga babae, pagdodorog mientras na nakagapos an saro, o sadistang pagpasakit. Kan panahon ni Pablo, an nagkapira na ‘nadidikloman an pag-isip,’ ‘dai na nakakamate asin tuminao sa sainda man sana sa karigsokan, sa paggibo kan gabos na karupitan sa kapasloan [“gabos na klaseng pagkamaati na may kahanaban,” NW].’​—⁠Efe. 4:​18, 19.

Sinambit man ni Pablo sa Galacia 5:19 an “pagkamaati.” (NW) An sarong Britanong teologo nagsabi na an terminong iyan sa “[tekstong ini] puedeng [nanonongod] nangorogna sa gabos na bakong natural na pagmawot sa sekso.” Siisay na Kristiano an dai maoyon na marigsok asin “bakong natural na pagmawot sa sekso” an nasambitan na mga klase nin pornograpiya, na makababalde asin nakakapababa sa pagmansay sa sekso? Nagkongklusyon si Pablo sa Galacia 5:​19-21 na ‘an mga naggigibo’ nin siring na pagkamaati “dai magmamana kan kahadean nin Dios.” Huli kaiyan, kun ugale na nin saro na magparaheling nin siring na klase nin pornograpiya, tibaad sa laog nin halawig nang panahon, asin sia habong magsolsol saka magbakle, dai sia puedeng magdanay sa Kristianong kongregasyon. Dapat siang itiwalag tanganing maingatan an kalinigan asin espiritu kan kongregasyon.​—⁠1 Cor. 5:​5, 11.

Nakakaogmang maaraman na an nagkapirang nagpaparaheling nin makababaldeng klase nin pornograpiya nagdolok sa mga elder asin nag-ako nin espirituwal na tabang na kaipuhan ninda tanganing makagibo nin dakulang pagbabago. Maboot na sinadol ni Jesus an mga Kristiano sa suanoy na Sardis: ‘Parigona an mga bagay na natatada, na kaidto magagadan na: girumdoma kun paano na ika nag-ako asin nagdangog; asin otoba iyan, asin magsolsol ka. Kaya kun ika dai magpuka, ika dai makakaaram kun anong oras ako madatong sa saimo.’ (Kap. 3:​2, 3) Posible para sa saro na magsolsol, na garo man sana sia inagaw sa kalayo.​—⁠Jud. 22, 23.

Pero, mas marahay nanggad na an lambang saro sa sato magin desididong marhay na dai na magrani sa peligrosong situwasyon na iyan. Iyo, maninigo na lubos kitang magin determinado na likayan an gabos na klase nin pornograpiya!

[Nota sa Ibaba]

[Blurb sa pahina 30]

An sarong Kristiano na nakagibo nin karigsokan dapat mag-isip-isip asin admitiron na kaipuhan nia nin espirituwal na tabang