An Simbag ni Jehova sa Sarong Odok sa Pusong Pamibi

“Tanganing an mga tawo makaaram na ika, na an ngaran Jehova, ika sana an Kaharohalangkawe sa bilog na daga.”​—SAL. 83:18.

1, 2. Ano an naeksperyensiahan nin dakol, asin ano an mga puedeng ihapot?

NAGKAPIRANG taon na an nakaagi, napupurisaw na gayo an sarong babae huli sa trahedyang nangyari sa saindang lugar. Huling namundag sa pamilyang Romano Katoliko, naghagad sia nin tabang sa padi duman, alagad habo ngani kaining makipag-olay sa saiya. Kaya namibi sia sa Dios: “Dai ko aram kun siisay ka . . . , alagad aram ko na yaon ka dian. Tabangan mo tabi ako na mamidbid ka!” Dai naghaloy, may mga Saksi ni Jehova na nagdalaw sa saiya asin nagtao sa saiya kan karangahan saka kaaraman na hinahanap nia. Kabilang sa dakol na iba pang bagay, itinokdo ninda sa saiya na an Dios may personal na ngaran, Jehova. Napahiro siang marhay kan maaraman nia iyan. “Hamak mo iyan,” an sabi nia, “ini an Dios na minawot kong mamidbid poon kan aki pa ako!”

² Dakol an may arog man kaiyan na eksperyensia. Sa parate, enot nindang naheling an ngaran ni Jehova kan mabasa ninda an Salmo 83:18 sa Biblia. Sa New World Translation, an bersikulong iyan nagsasabi: “Tanganing an mga tawo makaaram na ika, na an ngaran Jehova, ika sana an Kaharohalangkawe sa bilog na daga.” Pero, napag-isip-isip na daw nindo kun taano ta isinurat an Salmo 83? Anong mga pangyayari an mapahiro sa gabos na midbidon na si Jehova an solamenteng tunay na Dios? Ano an mensahe kan salmong ini para sa sato ngonyan? Pag-oolayan niato an mga hapot na iyan sa artikulong ini. *

Sarong Pakipagkasapakat Tumang sa Banwaan ni Jehova

3, 4. Siisay an kompositor kan Salmo 83, asin anong peligro an ilinaladawan nia?

³ Oyon sa superskripsion, an Salmo 83 “melodiya ni Asaf.” An kompositor kan salmong ini posibleng marhay na naggikan sa Levitang si Asaf, sarong pangenot na musikero durante kan pamamahala ni Hadeng David. Sa salmong ini, nakimaherak an salmista ki Jehova na logod humiro Sia tanganing suportaran an Saiyang soberaniya asin ibantog an Saiyang ngaran. Siertong ginibo an salmong ini sa sarong panahon pagkagadan ni Salomon. Taano? Huli ta durante kan paghade ni David asin ni Salomon, an hade nin Tiro makikatood pa sa Israel. Kan gibohon an Salmo 83, kinalaban kan mga nag-eerok sa Tiro an Israel asin kuminampi sinda sa mga kaiwal kaini.

⁴ Sinambit kan salmista an sampulong nasyon na nakipagkasapakat tanganing laglagon an banwaan nin Dios. An mga kaiwal na iyan yaon sa palibot kan Israel asin sinambit siring kan minasunod: “An mga tolda nin Edom asin kan mga Ismaelita, nin Moab asin kan mga Hagrita, nin Gebal asin Amon saka Amalec, nin Filistea kaiba kan mga nag-eerok sa Tiro. Siring man, an Asiria mismo uminiba sa sainda.” (Sal. 83:6-8) Anong pangyayari sa kasaysayan an pinanonongdan kan salmong ini?  Isinusuherir nin nagkapira na an pinanonongdan kan salmong ini iyo an pagsalakay sa Israel kan koalisyon nin Amon, Moab, asin nin mga nag-eerok sa Bukid nin Seir kan panahon ni Josafat. (2 Cron. 20:1-26) An iba naniniwala na iyan nagtataram manongod sa pangkagabsan na pagtumang na naeksperyensiahan kan Israel sa kataraed kaiyan na nasyon sa bilog na kasaysayan kaiyan.

5. Paano nakikinabang sa Salmo 83 an mga Kristiano ngonyan?

⁵ Ano man an kamugtakan, risang-risa na ipinasabong ni Jehova Dios an pagsurat kan mapagngayongayong awit na ini sa panahon na namemeligro an saiyang nasyon. An salmong iyan nagpaparigon man sa boot kan mga lingkod nin Dios ngonyan, na sa bilog nindang kasaysayan napaatubang sa sunod-sunod na pagsalakay nin mga kaiwal na determinadong laglagon sinda. Asin siertong papakosogon kita kaiyan sa harani nang ngapit kun organisaron na ni Gog nin Magog an saiyang mga hukbo sa sarong pangultimong pagmamaigot na laglagon an gabos na nagsasamba sa Dios sa espiritu asin katotoohan.​—Basahon an Ezequiel 38:2, 8, 9, 16.

An Pinakanangongorog na Bagay

6, 7. (a) Ano an ipinamibi kan salmista sa enot na mga tataramon kan Salmo 83? (b) Ano an pinakanangongorog na bagay para sa salmista?

⁶ Maghinanyog mantang ipinapahayag kan salmista an saiyang mga saboot paagi sa pamibi: “O Dios, dai ka logod mag-alo; dai ka magdanay na daing girong, asin dai ka magdanay na toninong, O Dios. Huli ta, uya! an saimo mismong mga kaiwal nag-uurungal; asin an mismong mga naoongis nin labi-labi sa saimo ipinag-itaas an saindang payo. May katusohan nindang ipinapadagos an saindang hilom na orolay tumang sa saimong banwaan . . . Huli ta sa puso may pagkasararo sindang nagpaharatolhatol; naggibo pa ngani sinda tumang sa saimo nin sarong tipan.”​—Sal. 83:1-3, 5.

⁷ Ano an pinakanangongorog na bagay para sa salmista? Siempre, siertong nahahadit siang gayo manongod sa kaligtasan nia mismo asin kan saiyang pamilya. Pero, an tema kan saiyang pamibi iyo an katuyawan na itinatao sa ngaran ni Jehova asin an mga huma sa nasyon na nagdadara kan ngaran na iyan. Logod na papagdanayon niato gabos an kaparehong timbang na punto de vista mantang kita nagtatagal sa depisil na ultimong mga aldaw kan daan na kinaban na ini.​—Basahon an Mateo 6:9, 10.

8. Ano an katuyohan kan mga nasyon sa pakipagkasapakat tumang sa Israel?

⁸ Kinotar kan salmista an mga kaiwal nin Israel na nagsasabi: “Madia asin paraon niato sinda bilang sarong nasyon, tanganing an ngaran nin Israel dai na magirumdoman.” (Sal. 83:4) Ikinakaongis nanggad kan mga nasyon na idto an piniling banwaan nin Dios! Alagad may saro pa sindang motibo sa saindang pakipagkasapakat. Minawot ninda na mapasainda an daga nin Israel asin naghambog sinda: “Sadirihon ta an ineerokan na mga lugar nin Dios.” (Sal. 83:12) May kapareho daw iyan sa satong panahon? Igwa!

An “Saimong Banal na Erokan”

9, 10. (a) Kan suanoy na mga panahon, ano an banal na erokan nin Dios? (b) Anong mga bendisyon an naeeksperyensiahan ngonyan kan linahidan na mga natatada asin kan “ibang mga karnero”?

⁹ Kan suanoy na mga panahon, an Dagang Panuga inaapod na banal na erokan nin Dios. Girumdomon an awit nin kapangganahan na inawit kan mga Israelita pakatapos na kaldahon sinda sa Egipto: “Sa saimong mamomoton na kabootan giniyahan mo an banwaan na saimong nabawi; sa saimong kosog gigiyahan mo nanggad sinda pasiring sa saimong banal na erokan.” (Ex. 15:13) Paghaloyhaloy, an “erokan” na iyan igwa nin templo na may grupo nin mga saserdote asin kabiserang siudad, an Jerusalem, na may linahe nin mga hade na naggikan ki David saka nagtukaw sa trono ni Jehova. (1 Cron. 29:23) Angay na inapod ni Jesus an Jerusalem na “siudad kan dakulang Hade.”​—Mat. 5:35.

¹⁰ Kumusta man sa satong panahon? Kan 33 C.E., namundag an sarong bagong nasyon, an “Israel nin Dios.” (Gal. 6:16) An nasyon na iyan, na kompuesto nin linahidan na mga tugang ni Jesu-Cristo, iyo an nag-otob kan gibohon na sa katapustapusi dai nagibo kan Israel sa laman​—an pagigin mga saksi sa ngaran nin Dios. (Isa. 43:10; 1 Ped. 2:9) Sa sainda, ipinanuga ni Jehova an iyo man sanang panuga na ginibo nia sa suanoy na Israel: “Ako magigin saindang Dios, asin sinda magigin sakong banwaan.” (2 Cor. 6:16; Lev. 26:12) Kan 1919, dinara ni Jehova sa sarong espesyal na  relasyon an mga natatada kan “Israel nin Dios,” asin kan panahon na iyan, sinadiri ninda an sarong “daga,” sarong espirituwal na rona nin aktibidad na dian naeeksperyensiahan ninda an espirituwal na paraiso. (Isa. 66:8) Poon kan dekada nin 1930, minilyon na “ibang mga karnero” an uminiba sa sainda. (Juan 10:16) An kaogmahan asin espirituwal na prosperidad kan mga Kristianong ini sa presenteng panahon mapuersang prueba kan pagigin may deretso kan soberaniya ni Jehova. (Basahon an Salmo 91:1, 2.) Nakakapaanggot nanggad iyan ki Satanas!

11. Ano an padagos na pangenot na pasohan kan mga kaiwal nin Dios?

¹¹ Sa bilog na panahon kan katapusan, ineengganyar ni Satanas an saiyang mga representante digdi sa daga na tumangon an linahidan na mga natatada asin an kairiba kaini na ibang mga karnero. Nangyari iyan sa Solnopan na Europa sa pamamahala kan mga Nazi asin sa Sirangan na Europa sa pamamahala kan Komunistang gobyerno nin Unyon Sobyet. Nangyari man iyan sa dakol na iba pang nasyon, asin mangyayari giraray iyan, nangorogna durante kan pangultimong pagsalakay ni Gog nin Magog. Sa pagsalakay na iyan, an mga rogaring kan banwaan ni Jehova tibaad mahanab na kompiskaron nin mga nagtutumang, siring kan ginibo nin mga kaiwal kan nakaagi. Minsan siring, an pirmeng pangenot na pasohan ni Satanas iyo na laglagon kita bilang sarong banwaan tanganing dai na magirumdoman an satong ngaran na itinao nin Dios. Ano an gigibohon ni Jehova sa siring na pag-angat sa saiyang soberaniya? Girumdomon an mga tataramon kan salmista.

Sarong Nakaaging Prueba na Magigin Mapanggana si Jehova

12-14. Anong duwang makasaysayan na kapangganahan harani sa siudad nin Megido an nagirumdoman kan salmista?

¹² Mangnohon an makosog na pagtubod kan salmista sa kakayahan ni Jehova na olangon an mga plano nin kaiwal na mga nasyon. Iiniba nia an duwang dai mapagdududahan na kapangganahan nin Israel sa mga kaiwal kaiyan harani sa suanoy na siudad nin Megido, na nangingibabaw na lugar sa kaplanodohan sa kababan na may iyo man sanang ngaran. Kun tig-init, an namarang Salog nin Cison maheheling na minasikosiko sa kaplanodohan sa kababan. Pakatapos nin makosogon na oran sa tiglipot, binabaha kan salog an kaplanodohan. Tibaad iyan an dahelan kun taano ta an salog na iyan inaapod man na “katubigan nin Megido.”​—Hok. 4:13; 5:19.

¹³ Mga 15 kilometros sa ibong kan kababan hale sa Megido, yaon an bulod nin More, na dian nagtiripon kan panahon ni Hokom Gedeon an pinagsararong mga soldados na Midianita, Amalequita, asin taga Sirangan tanganing makiguerra. (Hok. 7:1, 12) Sa katapustapusi, an sadit na puersa ni Gedeon igwa sana nin 300 na lalaki, alagad sa tabang ni Jehova, dinaog ninda an dakulang puersa kan kaiwal. Paano? Sinunod ninda an instruksion nin Dios asin kan banggi pinalibotan ninda an kampo kan kaiwal mantang kapot ninda an mga dulay na igwa nin nakatagong naglalaad na mga sulo. Kan itao ni Gedeon an senyal, pinarasa kan kairiba niang lalaki an mga dulay asin bigla na sanang nagliwanag an nakatagong mga sulo. Kadungan kaiyan, pinatanog ninda an saindang mga amodyong asin nagkurahaw sinda: “An espada ni Jehova asin ni Gedeon!” Nagkariribaraw an mga kaiwal, asin naggaradanan an mga ini; an mga natadang buhay nagdurulag pasiring sa ibong kan Salog nin Jordan. Mientras tanto, mas dakol na Israelita an nag-iba sa paglapag sa mga kaiwal. Sa kabilogan, 120,000 na kaiwal na soldados an nagadan.​—Hok. 7:19-25; 8:10.

¹⁴ Mga anom na kilometro lampas pa sa bulod nin More, sa ibong kan kababan hale sa Megido, yaon an Bukid nin Tabor. Duman, naenot nang tinipon ni Hokom Barac an 10,000 na soldados nin Israel tanganing makilaban sa hukbo ni Jabin, an  Cananeong hade nin Hazor, na pinangengenotan ni Sisara na hepe sa militar kaini. An hukbo na ini nin mga Cananeo igwa nin 900 na karuwahe de guerra na may nakakagadan na matarom asin haralaba na batbat na minaitok kasabay kan mga rueda. Huling nagtitiripon sa Bukid nin Tabor an mga soldados nin Israel na kadikit sana an armas, an hukbo ni Sisara may kompiansang nagduman sa kababan. Dangan, “pinonan ni Jehova na ribarawon si Sisara asin an gabos kan saiyang mga karuwahe de guerra patin an bilog na kampo.” Posibleng marhay na dahel sa sarong bigla asin makosogon na oran, naguot an mga karuwaheng iyan huli sa naglilipwas na Salog nin Cison. Ginadan kan mga Israelita an bilog na hukbo.​—Hok. 4:13-16; 5:19-21.

15. (a) Ano an ipinapamibi kan salmista na gibohon logod ni Jehova? (b) Ano an ipinapagirumdom sa sato kan ngaran kan pangultimong pakikipaglaban nin Dios?

¹⁵ An salmista nakimaherak ki Jehova na logod gibohon man Nia an arog kaiyan sa mga nasyon na nagtataong peligro sa pag-eksister nin Israel kan panahon nia. Sia namibi: “Giboha sa sainda an siring kan sa Midian, siring kan ki Sisara, siring kan ki Jabin sa may sapang masulog na kababan nin Cison. Sinda nagkaporoho sa En-dor; sinda nagin garo odo para sa daga.” (Sal. 83:9, 10) Makahulogan nanggad, an pangultimong guerra nin Dios tumang sa kinaban ni Satanas inaapod na Har–Magedon (na nangangahulogan “Bukid nin Megido”), o Armagedon. An ngaran na iyan nagpapagirumdom sa sato kan pangultimong mga ralaban na nangyari harani sa Megido. An kapangganahan ni Jehova sa suanoy na mga guerrang idto nag-aasegurar sa sato na siertong magigin mapanggana sia sa ralaban nin Armagedon.​—Kap. 16:13-16.

Mamibi Para sa Pagbindikar ki Jehova

16. Paano ‘napano nin kasusupgan’ ngonyan an lalawgon nin mga nagtutumang?

¹⁶ Durante kan “huring mga aldaw” na ini, inoolang ni Jehova an gabos na paghihingoang paraon an saiyang banwaan. (2 Tim. 3:1) Bilang resulta, napapasupog an mga nagtutumang. Ihinula ini kan Salmo 83:16 kan sabihon kaiyan: “Panoon mo nin kasusupgan an saindang mga lalawgon, tanganing hanapon nin mga tawo an saimong ngaran, O Jehova.” Sa sunod-sunod na nasyon, an mga kalaban biyong dai nagin mapanggana sa paghihingoa nindang pasilensiohon an Mga Saksi ni Jehova. Sa mga nasyon na iyan, an karigonan asin pakatagal nin mga parasamba sa solamenteng tunay na Dios nagseserbing patotoo sa mga tawong tama an kamugtakan nin puso, asin dakol an ‘naghanap kan ngaran ni Jehova.’ Sa dakol na nasyon na dian madahas na pinepersegir kaidto an mga Saksi ni Jehova, igwa na ngonyan nin manampulong ribo, ginatos na ribo pa ngani, na maogmang nag-oomaw ki Jehova. Dakulang kapangganahan nanggad para ki Jehova! Asin kanigoan kamakasusupog para sa saiyang mga kaiwal!​—Basahon an Jeremias 1:19.

17. Anong oportunidad para sa katawohan an madali nang matapos, asin anong mga tataramon an gigirumdomon niato sa dai na mahahaloy?

¹⁷ Siempre, aram niato na dai pa tapos an ralaban. Asin padagos kitang naghuhulit kan maogmang bareta​—dawa sa mga nagtutumang. (Mat. 24:14, 21) Minsan siring, madali nang matapos an oportunidad na bukas ngonyan tanganing magsolsol asin magkamit nin kaligtasan an siring na mga nagtutumang. An pagpakangbanal sa ngaran ni Jehova mas mahalaga nanggad kisa sa kaligtasan nin tawo. (Basahon an Ezequiel 38:23.) Kun magsararo na an mga nasyon sa ihinulang pambilog na kinaban na paghihingoang laglagon an banwaan nin Dios, gigirumdomon niato an mga tataramon na ini sa pamibi kan salmista: “O sinda logod mapasupog asin mapurisaw sagkod pa man, asin sinda logod maribaraw asin mapara.”​—Sal. 83:17.

18, 19. (a) Ano an naghahalat sa determinadong mga nagtutumang sa soberaniya ni Jehova? (b) Ano an epekto sa saindo kan nagdadangadang na pangultimong pagbindikar sa soberaniya ni Jehova?

 ¹⁸ Makasusupog na katapusan an naghahalat sa determinadong mga nagtutumang sa soberaniya ni Jehova. Ihinahayag kan Tataramon nin Dios na an kaaabtan kan mga “dai nagkukuyog kan maogmang bareta”​—asin huli kaini gagadanon sa Armagedon—​iyo an “daing katapusan na pagkalaglag.” (2 Tes. 1:7-9) An paglaglag sa sainda asin an pagkatadang buhay kan mga nagsasamba ki Jehova sa katotoohan magigin nakakakombensir na prueba na si Jehova an solamenteng tunay na Dios. Sa bagong kinaban, an dakulang kapangganahan na iyan dai malilingawan. An mabaralik paagi sa ‘pagkabuhay liwat kan mga matanos asin mga bakong matanos’ makakaaram kan dakulang ginibo ni Jehova. (Gibo 24:15) Sa bagong kinaban, maheheling ninda an nakakakombensir na prueba na madonong na mamuhay sakop kan soberaniya ni Jehova. Asin an mga mahoyo na kabilang sa sainda makokombensir tolos na si Jehova an solamenteng tunay na Dios.

¹⁹ Makangangalas nanggad na ngapit an iinandam kan satong mamomoton na langitnon na Ama para sa saiyang maimbod na mga parasamba! Dai daw kamo napapahiro na mamibi na logod magtao si Jehova sa dai na mahahaloy nin pangultimong simbag sa pamibi kan salmista ki Jehova: “[An saimong mga kaiwal] logod maribaraw asin mapara; tanganing an mga tawo makaaram na ika, na an ngaran Jehova, ika sana an Kaharohalangkawe sa bilog na daga”?​—Sal. 83:17, 18.

[Nota sa Ibaba]

Ikakapaliwanag daw Nindo?

• Anong situwasyon an napaatubang sa Israel kan isurat an Salmo 83?

• Ano an pinakanangongorog na bagay para sa kagsurat kan Salmo 83?

• Sairisay an punteriya kan pakikipag-iwal ni Satanas ngonyan?

• Sa katapustapusi, paano sisimbagon ni Jehova an pamibing ipinahayag sa Salmo 83:18?

[Mga Hapot Para sa Pag-adal]

[Mapa sa pahina 15]

(Para sa aktuwal na format, hilingon an publikasyon)

Paano konektado sa satong ngapit an mga ralaban na nangyari harani sa suanoy na Megido?

Salog nin Cison

Haroset

Bukid nin Carmelo

Kababan nin Jezreel

Megido

Taanac

Bukid nin Gilboa

Bubon nin Harod

More

En-dor

Bukid nin Tabor

Dagat nin Galilea

Salog nin Jordan

[Ritrato sa pahina 12]

Ano an nakapahiro sa sarong salmista na gibohon an sarong odok sa pusong pamibi?