“Ini Nanggad an Pinakabanal Asin Pinakadakula na Ngaran nin Dios”

Sinabi iyan ni Nicolas na taga Cusa sa sarong sermon na itinao nia kan taon 1430. * Sia sarong tawo na may dakol na pinagkakainteresan, na isinesentro an saiyang atension sa mga bagay na arog baga nin pag-adal nin Griego, Hebreo, pilosopiya, teolohiya, matematika, asin astronomiya. Sa edad na 22, sia nagin doktor sa ley kan iglesia na Katoliko Romano. Kan 1448 ninombrahan siang magin kardinal.

Mga 550 taon na an nakaagi, sarong klinika sa pag-ataman sa mga gurang an inestablisar ni Nicolas na taga Cusa sa Kues, na ngonyan inaapod na Bernkastel-Kues, sarong banwaan na mga 130 kilometros an rayo sa timog nin Bonn, sa Alemania. Ngonyan, sa mismong edipisyong ini yaon an libreriya ni Cusa na may labing 310 na manuskrito. Saro sa mga iyan an Kodise ni Cusanus 220 na dian makukua an sermon ni Cusa kan 1430. Sa sermon na iyan na may titulong In principio erat verbum (Sa Kapinonan Iyo an Tataramon), ginamit ni Nicolas na taga Cusa an termino sa Latin na Iehoua para sa Jehova. * Sa pahina 56 kaiyan yaon an minasunod na pananaram mapadapit sa ngaran nin Dios: “Itinao iyan nin Dios. Iyan an Tetragrammaton, an boot sabihon, an ngaran na kompuesto nin apat na letra. . . . Ini nanggad an pinakabanal asin pinakadakula na ngaran nin Dios.” An sinabi ni Nicolas na taga Cusa kaoyon kan bagay na an ngaran nin Dios minalataw sa orihinal na teksto kan Hebreong Kasuratan.​—Ex. 6:3.

An kodiseng ini na kaidto pang enot na kabtang kan ika-15 siglo saro sa pinakadaan na natatadang mga dokumento na dian trinadusir na “Iehoua” an Tetragrammaton. An nasusurat na testimonyang ini dagdag pang ebidensia na sa laog nin dakol na siglo an mga porma kan ngaran nin Dios na kaagid sa “Jehova” iyo an pinakaparateng ginagamit sa pagkopya kan ngaran nin Dios sa mga babasahon.

[Mga Nota sa Ibaba]

[Ritrato sa pahina 16]

Libreriya ni Cusa