Mga Hapot Hale sa mga Parabasa

Sagkod saen aplikado sa mga Kristiano ngonyan an mga restriksion manongod sa pag-agoman nin mga magkadugo segun sa Ley ni Moises?

An Ley na itinao ni Jehova sa nasyon nin Israel bakong detalyado manongod sa mga seremonya asin prosedimiento sa kasal. Minsan siring, may nagkapirang pag-agoman na talagang ibinabawal kaiyan. Halimbawa, sa Levitico 18:​6-​20, manonompongan niato an sarong lista nin bawal na relasyon may koneksion sa sarong ‘haraning kadugo.’ An halipot na kabtang na iyan nagtatao nin awad-awad na detalye na sinasabi kun siisay na mga magkadugo an dai dapat magkaigwa nin seksuwal na relasyon. Siempre, an mga Kristiano dai sakop kan Ley ni Moises o obligadong otobon an mga dekreto kaiyan. (Efeso 2:15; Colosas 2:14) Dawa siring, dai ini nangangahulogan na puede na sanang palimanlimanan kan mga Kristiano an bagay na ini kun nagpipili nin aagomon. May nagkapirang dahelan kun taano ta siring.

Primero, may sekular na mga ley na nagtatao nin regulasyon dapit sa pag-agoman nin haraning magkadugo, asin an mga Kristiano sa pundamental obligadong kuyogon an mga ley kan nasyon na ineerokan ninda. (Mateo 22:21; Roma 13:1) Siempre, an siring na mga ley nagkakalaenlaen depende sa lugar. An kadaklan sa siring kaining klase nin ley sa presenteng panahon sa pangenot basado sa henetikong mga dahelan. Minimidbid na sarong katunayan na an pag-agoman nin haraning magkadugo mas posibleng marhay na isapeligro an arin man na aki sa henetikong mga kakundian asin helang. Sa dahelan na ini asin huli sa saindang ‘pagpasakop sa superyor na mga autoridad,’ an mga Kristiano na nag-aagom nagkukuyog sa lokal na mga ley sa pag-agoman.

Dangan yaon man an kuestion manongod sa kun ano an puede asin dai puede sa komunidad na ineerokan nin saro. Haros gabos na kultura igwa nin susundon asin kostumbre na ibinabawal an pag-agoman nin haraning magkadugo, na sa parate minamansay an siring na pagsasaro bilang incesto asin huli kaini iyan bawal. Minsan ngani tibaad nagkakalaenlaen na marhay sa manlaenlaen na kultura an espesipikong mga relasyon na ibinabawal, “sa pankagabsan, mientras na orog na harani an henetikong relasyon nin duwang tawo, orog man na makosog asin mas maigot an pangangalad o pagdesganar sa seksuwal na relasyon ninda,” an sabi kan The Encyclopædia Britannica. Sa siring, dawa mayong kalabot na incestong relasyon, dai bobooton kan mga Kristiano na biyong dai pag-intindihon an establisadong mga kostumbre o lehitimong pagkasensitibo kan komunidad, tangani na dai magtao nin katuyawan sa Kristianong kongregasyon o sa ngaran nin Dios.​—2 Corinto 6:3.

Dai dapat ignorohon an satong tao nin Dios na konsensia. An gabos na tawo namundag na igwa nin pakaaram nin tama asin sala, nin marahay asin maraot. (Roma 2:15) An saindang konsensia nagsasabi sa sainda kun ano an normal asin tama saka an bakong natural asin nakaaanggot, apuera sana kun iyan rinaot o pinabagol na huli sa maraot na mga gibo. Nanabihan ni Jehova an bagay na ini kan itinao nia sa mga Israelita an saiyang ley tumang sa pag-agoman nin haraning magkadugo. Mababasa niato: “An iginagawe kan daga nin Egipto, na inistaran nindo, dai nindo dapat na paggibohon; asin an iginagawe kan daga nin Canaan, na sakuyang dinadarahan sa saindo, dai nindo dapat na paggibohon; asin sa saindang mga reglamento dai kamo dapat na maglakaw.” (Levitico 18:3) Iniingatan kan mga Kristiano an saindang konsensia na basado sa Biblia asin dai ninda totogotan na iyan raoton kan biribid na pakasabot nin tama asin sala kan mga nasyon.​—Efeso 4:17-19.

Kun siring, ano an ikakokonklusyon niato? Minsan ngani an mga Kristiano dai sakop kan Ley ni Moises, an saindang konsensia nagsasabi nin malinaw sa sainda na an pag-agoman nin haraning magkadugo​—arog baga kan ama asin aking babae, ina asin aking lalaki, magtugang​—dai nanggad puede sa Kristianong komunidad. a Mantang nagrarayo an relasyon sa dugo, rinerekonoser kan mga Kristiano na igwa nin mga ley asin reglamento na naggigiya sa legal na pag-agoman asin na may mga pamantayan na inaako kan sosyedad asin kultura. Ini dapat na maingat na konsideraron tangani na kita makasunod sa pagboot kan Kasuratan: “Magin logod kagalanggalang sa gabos an pag-aragoman.”​—Hebreo 13:4.

[Nota sa Ibaba]