Makanood nin Leksion ki Nicodemo

“KUN an siisay man boot na sumunod sa sako, paindahan nia an saiyang sadiri asin magpasan kan saiyang hariging pasakitan aroaldaw asin padagos na sumunod sa sako.” (Lucas 9:23) An hamak na mga parasira asin sarong dinuduhaging parasingil nin buhis tolos na inako an pangagdang iyan. Binayaan ninda an gabos tanganing sumunod ki Jesus.​—Mateo 4:18-22; Lucas 5:​27, 28.

An pangapodan ni Jesus nadadangog pa man giraray ngonyan, asin dakol an naghimate. Minsan siring, an nagkapira na naoogmang makipag-adal sa Biblia sa mga Saksi ni Jehova nagduduwaduwang ‘paindahan an saindang sadiri asin magpasan kan saindang hariging pasakitan.’ Nagduduwaduwa sindang akoon an responsibilidad asin pribilehio kan pagigin disipulo ni Jesus.

Taano ta habong akoon kan nagkapira an pangagda ni Jesus asin idusay an sadiri ninda ki Jehova Dios? Totoo, an mga dai nagdakula sa konsepto nin Judio-Kristianong  pagtubod na saro sana an Dios tibaad nangangaipo nin awad-awad na panahon bago lubos na masabotan an pag-eksister nin sarong persona, makakamhan sa gabos na Kaglalang. Pero, dawa pakatapos na sinda magin kombensido na an Dios tunay, an nagkapira nagsayumang magsunod sa mga lakad ni Jesus. Tibaad natatakot sinda sa iisipon sa sainda kan saindang mga paryente asin katood kun sinda magin mga Saksi ni Jehova. An iba, na nalilingawan na an pagkaapurado kan panahon na kinabubuhayan niato, an kabantogan asin kayamanan na an pinag-aaabot. (Mateo 24:36-42; 1 Timoteo 6:​9, 10) Ano man an tibaad dahelan, para sa mga pigpaparadigson an saindang desisyon na magin mga parasunod ni Jesus, igwa nin leksion na manonodan sa kasaysayan ni Nicodemo, sarong mayaman na Judiong namamahala sa kaaldawan ni Jesus.

Binendisyonan nin Marahayon na mga Oportunidad

Mga anom na bulan sana pakatapos na ponan ni Jesus an saiyang ministeryo digdi sa daga, narekonoser ni Nicodemo na si Jesus “bilang paratokdo naggikan sa Dios.” Huling naghanga sa mga milagro na ginibo pa sana ni Jesus sa Jerusalem kan Paskua kan 30 C.E., si Nicodemo nagduman, sa banggi, tanganing magtuga kan saiyang pagtubod ki Jesus asin makanood nin orog pa manongod sa paratokdong ini. Sa puntong iyan, isinabi ni Jesus ki Nicodemo an sarong hararom na katotoohan manongod sa pangangaipo na “mamundag giraray” tanganing makalaog sa Kahadean nin Dios. Sa okasyon na ini, isinabi man ni Jesus an mga tataramon na: “An Dios namoot na gayo sa kinaban na itinao nia an saiyang Aking bugtong, tanganing an lambang naggigibo nin pagtubod sa saiya dai mapahamak kundi magkaigwa nin buhay na daing katapusan.”​—Juan 3:1-16.

Abaa kamakangangalas na oportunidad an yaon sa atubangan ni Nicodemo! Puede kutana  siang magin dayupot na kaibaiba ni Jesus, na maheheling mismo an manlaenlaen na aspekto kan buhay ni Jesus sa daga. Bilang sarong namamahala sa mga Judio asin sarong paratokdo sa Israel, si Nicodemo may awad-awad na kaaraman sa Tataramon nin Dios. Sia igwa man nin alistong pakarorop, na naheling kan mamidbid nia si Jesus bilang paratokdo na isinugo nin Dios. Si Nicodemo interesado sa espirituwal na mga bagay, asin pambihira an saiyang kapakumbabaan. Siertong depisil nanggad para sa sarong miembro kan pinakahalangkaw na korte kan mga Judio na rekonoseron an aki nin sarong hamak na karpintero bilang isinugo hale sa Dios! An gabos na siring na kualidad mahalagang marhay para sa sarong magigin disipulo ni Jesus.

An interes ni Nicodemo sa tawong ini na hale sa Nazaret garo baga dai nagluya. Pakalihis nin duwa may kabangang taon, sa Kapiestahan nin mga Payag-payag, nag-atender si Nicodemo sa sarong pagtiripon kan Sanhedrin. Sa panahon na ini, si Nicodemo “saro [pa man giraray] sa sainda.” Nagsugo an poon na mga saserdote asin an mga Fariseo nin mga opisyal tanganing arestaron si Jesus. An mga opisyal nagbalik asin nagbareta: “Mayo pa nin ibang tawo na nagtaram nin arog kaini.” Nagpoon an mga Fariseo na menoson sinda: “Ano ikinalagalag man kamo? Mayo ni saro sa mga namamahala o mga Fariseo na nagtubod sa saiya, bako daw? Alagad an kadaklan na ini na dai tatao kan Ley mga tawong isinumpa.” Si Nicodemo dai na nakapagpogol. Sia nagtaram: “Dai hinohokoman kan satong ley an sarong tawo na dai nguna nadadangog sa saiya asin naaaraman kun ano an saiyang ginigibo, bako daw?” Dangan sia an nagin punteriya nin pagkritika kan ibang Fariseo: “Ano taga Galilea ka man? Siyasata asin helinga na mayo nin propetang maluwas sa Galilea.”​—Juan 7:​1, 10, 32, 45-52.

Pakalihis nin mga anom na bulan, kan Aldaw nin Paskua kan 33 C.E., minamasdan ni Nicodemo an bangkay ni Jesus na ibinababa sa hariging pasakitan. Inibanan nia si Jose na taga Arimatea, saro pang miembro kan Sanhedrin, sa pag-andam sa bangkay ni Jesus para sa lobong. Sa katuyohan na iyan, si Nicodemo nagdara nin “sarong rolyo nin mirra asin mga asibar” na may timbang na mga 100 na libra sa Romanong libra, na an katumbas 72 na libra sa Ingles na libra. Iyan dakulang kantidad nin kuarta. Nangaipo man nin kosog nin boot na sia mamidbid na kaiba  kan “impostor na iyan,” an apod ki Jesus kan mga kapwa nia Fariseo. Dali-dali na inaandam an hawak ni Jesus para sa lobong, ihinutad si Jesus kan duwa sa sarong bagong lolobngan sa harani. Minsan siring, dawa sa oras na idto dai pa man giraray minimidbid si Nicodemo bilang disipulo ni Jesus!—Juan 19:38-42; Mateo 27:63; Marcos 15:43.

Kun Taano ta Dai Sia Naghiro

Kun taano ta nagsayuma si Nicodemo na “magpasan kan saiyang hariging pasakitan” asin magsunod ki Jesus, dai ihinayag ni Juan sa saiyang pagkasaysay. Minsan siring, nagtao sia nin nagkapirang giya na tibaad makapaliwanag sa dai pakadesisyon kan Fariseong ini.

Enot sa gabos, idinoon ni Juan na an Judiong namamahala “nagduman [ki Jesus] kan banggi.” (Juan 3:2) An sarong nag-espesyalisar sa Biblia nagsusuherir: “Si Nicodemo nagduman sa banggi, bakong huli sa takot, kundi tanganing likayan an mga tawo na puede kutanang abalahon an saiyang pakikipag-olay ki Jesus.” Pero, sinambit ni Juan si Nicodemo bilang “an tawo na nagduman [ki Jesus] kan banggi kaidtong enot” sa kaparehong dahelan kan pagkasambit nia ki Jose na taga Arimatea bilang “disipulo ni Jesus alagad sekreto sana huli sa saiyang pagkatakot sa mga Judio.” (Juan 19:​38, 39) Kun siring, posible nanggad na si Nicodemo nagduman ki Jesus sa banggi huli sa “pagkatakot sa mga Judio,” kapareho kan iba pa kan kaaldawan nia na natakot mamidbid na kaibaiba ni Jesus.​—Juan 7:13.

Idinigson daw nindo an desisyon na magin saro sa mga disipulo ni Jesus huli sa tibaad sasabihon kan saindong mga paryente, katood, o kaasosyar? “An pagtakig sa mga tawo sarong siod,” sabi nin sarong talinhaga. Paano nindo aatubangon an pagkatakot na iyan? An talinhaga nagpapadagos: “Alagad an nagtitiwala ki Jehova iingatan.” (Talinhaga 29:25) Tanganing mapatalubo an pagtitiwala na iyan ki Jehova, kaipuhan na maeksperyensiahan mismo nindo na kamo susuportaran nin Dios kun kamo nasa masakit na kamugtakan. Mamibi ki Jehova, asin hagadon sa saiya na tawan kamo nin kosog nin boot na makagibo nin dawa saradit na desisyon mapadapit sa saindong pagsamba. Luway-luway, an saindong pagtubod asin pagtitiwala ki Jehova matalubo sagkod na makaya na nindong gumibo nin darakulang desisyon na kaoyon kan kabotan nin Dios.

An posisyon asin prestihio ni Nicodemo bilang miembro kan grupong namamahala tibaad nakaolang man sa saiya na gibohon an importanteng lakdang na paindahan an saiyang sadiri. Kan panahon na idto, sierto na makosog pa an saiyang pagkamuya sa saiyang posisyon bilang miembro kan Sanhedrin. Nagduduwaduwa daw kamong humiro na magin parasunod ni Cristo ta tibaad mawara sa saindo an sarong prestihiosong posisyon sa sosyedad o tibaad may kaipuhan kamong isakripisyo na mga oportunidad sa pag-asenso? Mayo sa mga bagay na ini an puedeng ikomparar sa onra na makapaglingkod sa Kaharohalangkawe sa uniberso, na andam na panigoan an saindong mga hinahagad kaoyon kan saiyang kabotan.​—Salmo 10:17; 83:18; 145:18.

An saro pang posibleng dahelan sa pag-atraso ni Nicodemo tibaad may koneksion sa saiyang mga kayamanan. Bilang sarong Fariseo, tibaad naimpluwensiahan sia kan iba, “na mga mamomoton sa kuarta.” (Lucas 16:14) An bagay na nakaya nia an mamahalon na rolyo nin mirra asin mga asibar nagpapatunay na sia may kaya. An nagkapira ngonyan padagos na inaatraso an desisyon na akoon an mga responsibilidad nin sarong Kristiano huli ta nahahadit sinda manongod sa saindang materyal na mga rogaring. Minsan siring, sinadol ni Jesus an saiyang mga parasunod: “Dai na kamo magparahadit dapit sa saindong kalag kun ano an saindong kakakanon o kun ano an saindong iinomon, o dapit sa saindong hawak kun ano an saindong gugubingon. . . . Huli ta an saindong langitnon na Ama nakaaaram na kaipuhan nindo an gabos na bagay na ini. Kun siring, padagos na hanapon nguna an kahadean asin an saiyang katanosan, asin ini gabos na ibang bagay idadagdag na sana sa saindo.”​—Mateo 6:25-33.

Dakula an Nawara sa Saiya

Interesante nanggad, an pagkasaysay manongod ki Nicodemo, na yaon sana sa Ebanghelyo ni Juan, dai nagsabi kun baga sia nagin parasunod ni Jesus o dai. Segun sa sarong tradisyon, si Nicodemo nanindogan para ki Jesus, nabautismohan, pinaglamag kan mga Judio, hinale sa saiyang posisyon, asin sa katapustapusi pinalayas sa  Jerusalem. Ano man an totoo, sarong bagay an segurado: Dakula an nawara sa saiya sa pag-atraso nia kan panahon na si Jesus yaon pa sa daga.

Kun si Nicodemo nagpoon nang sumunod ki Jesus kan mismong enot niang manuparan an Kagurangnan, sia kutana nagin dayupot na disipulo ni Jesus. Huli sa kaaraman, pakarorop, kapakumbabaan, asin pakamansay sa espirituwal na mga pangangaipo ni Nicodemo, sia kutana nagin marahayon na disipulo. Iyo, nadangog nia kutana an makangangalas na mga pahayag kan Dakulang Paratokdo, nakanood nin mahalagang marhay na mga leksion sa mga ilustrasyon ni Jesus, naheling mismo an makangangalas na mga milagro na ginibo ni Jesus, asin napakosog sa panhuring konseho ni Jesus sa saiyang mga apostol. Alagad nawara sa saiya an gabos na iyan.

An dai pakadesisyon ni Nicodemo nangahulogan nin dakulang marhay na kawaran sa saiya. Kaiba an mainit na pangagda ni Jesus: “Madia kamo sa sako, kamo gabos na nagpapagal asin nagagabatan, asin pagiginhawahon ko kamo. Pasana nindo an sakong sakal asin makanood kamo sa sako, huli ta ako mahoyo asin may kababaan an puso, asin makakukua kamo nin kaginhawahan para sa saindong kalag. Huli ta an sakong sakal maboot asin an sakong pasan magian.” (Mateo 11:28-30) Nalipasan ni Nicodemo an oportunidad na maeksperyensiahan an karepreskohan na ini sa literal hale ki Jesus mismo!

Kumusta Man Kamo?

Poon kan 1914, si Jesu-Cristo presente na sa langit bilang Hade sa langitnon na Kahadean nin Dios. Ihinuhula an mangyayari durante kan saiyang presensia, kabilang sa iba pang mga bagay na sinabi nia: “An maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan.” (Mateo 24:14) Bago dumatong an katapusan, kaipuhan na gibohon an paghuhulit na iyan sa bilog na kinaban. Ikinaoogmang marhay ni Jesu-Cristo an pakikikabtang kan bakong sangkap na mga tawo. Kamo puede man na makikabtang sa gibohon na ini.

Rinekonoser ni Nicodemo na si Jesus hale sa Dios. (Juan 3:2) Sa pag-adal sa Biblia, tibaad nakaabot na kamo sa kaparehong konklusyon. Tibaad may ginibo na kamong mga pagbabago sa saindong pamumuhay tanganing makasunod sa mga pamantayan sa Biblia. Tibaad nag-aatender na ngani kamo sa mga pagtiripon kan Mga Saksi ni Jehova tanganing kumua nin dugang pang kaaraman sa Biblia. Dapat kamong komendaran sa siring na mga paghihingoa. Pero, si Nicodemo kaipuhan na gumibo nin orog pa kisa pagpaheling sana nin pag-apresyar ki Jesus bilang isinugo nin Dios. Kinaipuhan na “paindahan [nia] an saiyang sadiri asin magpasan kan saiyang hariging pasakitan aroaldaw asin padagos na sumunod [ki Jesus].”​—Lucas 9:23.

Isapuso an sinasabi sa sato ni apostol Pablo. Isinurat nia: “Sa paggibo sa kaibanan nia, nakikimaherak man kami sa saindo na dai nindo akoon an dai na kutana maninigong kabootan nin Dios asin lipasan an katuyohan kaiyan. Huli ta sia nagsasabi: ‘Sa panahon nin pag-ako dinangog taka, asin sa aldaw nin kaligtasan tinabangan taka.’ Uya! Ngonyan an espesyalmenteng panahon nin pag-ako. Uya! Ngonyan an aldaw nin kaligtasan.”​—2 Corinto 6:​1, 2.

Ngonyan na an panahon na pataluboon an pagtubod na mapahiro sa saindo. Tanganing magibo iyan, horophoropon an mga bagay na pinag-aadalan nindo sa Biblia. Mamibi ki Jehova, asin humagad nin tabang sa saiya sa pagpaheling nin siring na pagtubod. Mantang naeeksperyensiahan nindo an saiyang pagtabang, an saindong apresasyon asin pagkamoot sa saiya an mapahiro sa saindo na booton na ‘paindahan an saindong sadiri asin magpasan kan saindong hariging pasakitan aroaldaw asin padagos na sumunod ki Jesu-Cristo.’ Mahiro na daw kamo ngonyan?

[Ritrato sa pahina 9]

Kan enot, si Nicodemo makosog an boot na nanindogan para ki Jesus

[Ritrato sa pahina 9]

Sa ibong nin pagtumang, nagtabang si Nicodemo sa pag-andam sa bangkay ni Jesus para sa lobong

[Ritrato sa pahina 10]

An personal na pag-adal asin pamibi puedeng pakosogon kamong humiro

[Ritrato sa pahina 10]

Aakoon daw nindo an pribilehio na magtrabaho sa pangengenot ni Jesu-Cristo?