Bareta kan mga Parabalangibog kan Kahadean

An mga Martir sa Presenteng Aldaw Nagpatotoo sa Sweden

AN TERMINO sa Griego para sa “saksi” iyo an martyr, na pinaghalean kan termino sa Ingles na “martyr,” na nangangahulogan nin “saro na nagpapatotoo paagi sa saiyang kagadanan.” Dakol na Kristiano kan enot na siglo an nagpatotoo manongod ki Jehova sagkod sa kagadanan para sa saindang pagtubod.

Kaagid kaiyan, kan ika-20 siglo, rinibo sa mga Saksi an nagadan sa kamot kan mga alipores ni Hitler huli sa pagpadanay kan saindang neutralidad sa mga isyu sa politika asin nasyonalismo. An mga martir na ini sa presenteng aldaw nagtatao man nin mapuersang patotoo. Ini an nangyari kasuarin pa sana sa Sweden.

May koneksion sa ika-50 anibersaryo kan katapusan kan Guerra Mundial II, pinonan kan gobyernong Sueco an sarong pambilog na nasyon na edukasyonal na kampanya manongod sa Holocaust. An proyekto inapod na Buhay na Kasaysayan. Inimbitaran an mga Saksi ni Jehova na makikabtang asin ihiras an saindang mga eksperyensia.

An ginibo kan mga Saksi nagprodusir nin sarong eksibisyon para sa publiko na an titulo An Nalingawan na mga Biktima kan Holocaust. Iyan nagpoon na ipaheling sa Assembly Hall kan Mga Saksi ni Jehova sa Strängnäs. An mga Saksi na nakaligtas sa Holocaust yaon tanganing isaysay an saindang mga eksperyensia sa labing 8,400 na bisita na nag-abot sa enot na aldaw! Sa katapusan kan 1999, an eksibisyon ipinaluwas na sa haros 100 na museo asin pampublikong mga libreriya sa bilog na Sweden, asin mga 150,000 katawo an nakaheling kaiyan. Kaiba sa mga bisita an dakol na opisyal kan gobyerno, na paborable an komento sa naheling ninda.

Daing kapareho an sarong pangyayaring ini may koneksion sa mga aktibidad kan Mga Saksi ni Jehova sa Sweden na nagkaigwa nin siring kahiwas na pagpaheling sa publiko asin nag-ako nin siring kapaborableng publisidad. Dakol na bisita an naghapot: “Taano ta dai nindo sinabi sa samo kaidto an manongod sa mga eksperyensia nindo sa Holocaust?”

Pakatapos na ipaheling an eksibisyon sa saindang lugar, an sarong kongregasyon nagreport nin 30 porsientong aumento sa mga pag-adal sa Biblia! Inimbitaran nin sarong Saksi an sarong katrabaho na helingon an eksibit. Maogmang inako iyan kan katrabaho asin iiniba an sarong katood. Pagkatapos, an katood nagsabi na depisil niang maintindihan kun taano an mga tawo ta may siring kakosog na pagtubod na pipilion pa nindang gadanon kisa magpirma sa dokumentong nagsasabing tinatalikdan na ninda an saindang pagtubod. Nagresulta ini sa dugang pang pag-oolay, asin naponan siang adalan sa Biblia.

Arog kan mga kapareho ninda kan enot na siglo, an fiel na mga martir na ini sa ika-20 siglo pusoan na nagpatotoo na si Jehova an iyo sanang tunay na Dios, na maninigo sa satong masarig na pagtubod asin kaimbodan.​—Kapahayagan 4:11.

[Picture Credit Line sa pahina 13]

Preso sa kampo: Państwowe Muzeum Oświęcim-Brzezinka, sa karahayan nin boot kan USHMM Photo Archives